Instruction for Olketa wea Duim Part Long Service Meeting
Start long disfala Kingdom Ministry Bilong Iumi, olketa toktok insaed schedule for olketa part long Service Meeting hem change lelebet. Olketa instruction and reminder hia bae changem lelebet olketa toktok long article “Wanem for Duim Mekem Iumi Redi for Service Meeting,” wea kamap long May 2009 Kingdom Ministry Bilong Iumi.
◼ Tok: Diswan hem wanfala tok wea brata hem iusim buk wea olketa markem, bat kongregeson bae no givim koment. Brata wea givim disfala tok shud mekhae long olketa point wea bae barava helpem kongregeson.
◼ Kwestin and Ansa: Disfala part hem semsem olsem Wastaoa Study, wea garem shortfala toktok for startim and finisim, and brata wea duim disfala part bae askem olketa kwestin long evri paragraf. Hem shud no story tumas. Savve readim olketa main scripture sapos taem hem fitim. No readim olketa paragraf sapos no eni instruction talem for duim.
◼ Story Witim Kongregeson: Diswan hem wanfala tok wea kongregeson savve givim koment. Disfala part hem no wanfala tok nomoa, and hem no wanfala part for askem staka koment from kongregeson.
◼ Olketa Demonstration and Interview: Instruction for duim demonstration hem minim brata wea duim disfala part savve markem samfala for duim demonstration, hemseleva no need for duim demonstration. Olketa wea hem chusim for duim demonstration shud fit and showimaot gudfala example, and sapos hem fitim, hem shud arrange witim olketa firstaem. Hem bae gud for no iusim olketa niu wan and olketa pablisa wea no garem savve for duim demonstration. Maet samfala tingse hem chance bilong olketa hia for go long stage, brata wea givim disfala part savve iusim samfala hia olsem haosholder. Olketa pablisa wea duim demonstration shud feis kam long kongregeson taem olketa story. Olketa wea iu interviewim mas go ap long stage for duim part bilong olketa, winim wei for sidaon long chair bilong olketa. Duim rehearsal witim olketa wea iu iusim for duim demonstration and interview. Nomata sapos meeting hem go ovataem and brata mas katem short part bilong hem, hem mas duim olketa demonstration and interview. Olketa ministerial servant shud chek witim chairman bilong olketa elder or nara elder bifor olketa chusim hu nao olketa laek for iusim.
Sapos wanfala part hem garem spesol instruction, mas barava followim datwan. Taem olketa wea garem part long Service Meeting followim gud olketa instruction hia, evriwan bae “duim evri samting long wei wea hem stret and wea no olobaot.”—1 Cor. 14:40.