Meeting for Field Service Hem Encouragem, Redyim, and Organizem Iumi for Preach

1. Why nao iumi garem meeting for field service?

¹ Wanfala taem, Jesus and 70-fala disaepol bilong hem hipap tugeta bifor olketa disaepol go preach. (Luke 10:1-11) Jesus encouragem olketa taem hem sei “man wea ownim planteison” wea hem nao Jehovah, hem sendem olketa for duim disfala waka and Hem bae helpem olketa. And tu Jesus talem wanem for olketa duim and hem “markem tufala man for waka tugeta.” Distaem tu meeting for field service hem encouragem, redyim, and organizem iumi for preach.

2. Olketa wanem change nao kamap saed long meeting for field service?

² Kam kasem distaem, meeting for field service savve gohed for 10 minute go kasem 15 minute. Insaed long taem hia hem for organizem grup, talem territory for duim, and for prea. Start long April, diswan bae change. Meeting for field service bae gohed for faev minute go kasem seven minute. Bat taem diswan hem kamap bihaen long kongregeson meeting, hem shud gohed for lelebet taem nomoa bikos evriwan herem finis olketa samting from Bible. Taem meeting for field service hem short nomoa, datwan savve helpem iumi for iusim gud taem bilong iumi long ministry. Nara samting tu, sapos olketa pioneer or pablisa startim taem bilong olketa bifor grup hem hipap, olketa bae gohed duim preaching waka bihaen tu-thri minute nomoa.

3. Wanem nao bae mekem hem isi for olketa pablisa duim preaching waka?

³ Olketa elder shud arrangem olketa ples for hipap for meeting for field service wea bae mekem hem isi for olketa pablisa duim preaching waka. Long samfala kongregeson hem gud for olketa pablisa hipap long tu-thri difren ples winim wei for hipap long wanfala ples nomoa. Datwan bae mekem hem isi for olketa pablisa go long grup and for go long territory. From olketa grup hia smol nomoa, brata wea leadim grup bae kwiktaem organizem olketa pablisa and tu bae hem isi for grup overseer helpem olketa pablisa long grup bilong hem. Olketa elder bae ting raonem olketa samting hia and disaedem wanem hem fitim kongregeson bilong olketa. Evriwan shud savve long territory and hu nao for waka witim bifor brata talem prea for finisim meeting for field service.

4. Why nao meeting for field service hem important olsem olketa nara kongregeson meeting?

⁴ Hem Important Olsem Olketa Nara Kongregeson Meeting: Meeting for field service hem for olketa wea bae go preach, so no evriwan long kongregeson bae joinim datwan. Nomata olsem, datfala meeting hem important tu olsem olketa nara kongregeson meeting. Evri meeting hia hem for encouragem iumi for showimaot love and for duim olketa gudfala samting. (Heb. 10:24, 25) So hem important for brata wea leadim grup for prepare gud mekem wanem hem storyim bae mekhae long Jehovah and helpem olketa pablisa. Olketa pablisa shud traem best bilong olketa for go long datfala meeting.

Meeting for field service hem important olsem olketa nara kongregeson meeting

5. (a) Wanem nao service overseer duim for arrangem meeting for field service? (b) Wanem nao wanfala sista shud duim taem hem conductim meeting for field service?

⁵ Wanem Conductor Bilong Grup Bae Duim: Olketa wea kasem assignment for duim eni part long meeting shud savve firstaem long datwan mekem olketa prepare gud. Diswan hem semsem tu for meeting for field service. Taem olketa field service grup hipap seleva, grup overseer or assistant bilong hem bae conductim meeting. Bat sapos kongregeson hipap tugeta for field service, service overseer nao bae markem samwan for conductim datfala meeting. Samfala service overseer raetem schedule and givim long olketa conductor and putim wanfala long notis board. Taem service overseer chusim olketa wea bae conductim grup, hem gud for hem tingim disfala meeting bae gohed long gudfala wei sapos olketa hia savve teach gud and organize gud. Sapos samfala day no eni elder or ministerial servant or wanfala brata wea fit hem stap for conductim datfala meeting, service overseer bae markem wanfala sista wea baptaes wea fit for duim datwan.—Lukim article “Taem Sista Conductim Meeting for Field Service.”

6. Why nao hem important for conductor prepare gud?

⁶ Taem iumi kasem assignment for duim wanfala part long Theocratic Ministry Skul or Service Meeting, iumi prepare gud for datwan. Iumi bae no weit go kasem taem iumi gogo for meeting then iumi ting raonem datfala part. Olketa wea kasem assignment for duim meeting for field service shud prepare gud tu. From distaem meeting for field service hem bae short nomoa, hem important for olketa brata hia prepare gud mekem datwan hem encouragem olketa pablisa and for datfala meeting finis long barava taem. And tu conductor shud savve firstaem long wanem territory for iumi preach long hem.

7. Wanem nao samfala samting wea conductor savve storyim?

⁷ Wanem for Storyim: From evri territory hem no semsem, Governing Body no talem wanem for olketa conductor storyim long olketa grup. Datfala box “Samfala Samting for Duim Long Meeting for Field Service” garem samfala idea for followim. Brata wea conductim datfala meeting savve storyim wanfala idea long olketa idea hia or samfala taem duim demonstration or showim video from jw.org. Taem conductor prepare for grup, hem shud ting raonem wanem savve encouragem and helpem olketa wea go preach long datfala day.

Taem conductor prepare for field service, hem shud ting raonem wanem bae encouragem and redyim olketa wea go preach long datfala day

8. Wanem nao hem gud for storyim long meeting for field service long olketa Saturday and Sunday?

⁸ Olsem example, long olketa Saturday, klosap evri pablisa offerim olketa Wastaoa and Awake! magasin. Staka wea preach long olketa Saturday olketa no preach long midol week, so maet hem no isi for olketa rememberim wanem olketa practicem long Famili Worship. So maet hem gud for conductor storyim wanfala idea wea stap long last page long Kingdom Ministry Bilong Iumi. Hem savve storyim wanfala samting long nius or eni samting olsem Christmas or Easter wea bae kamap, and joinim story hia witim wanfala magasin. Or hem savve storyim wanem for talem sapos wanfala man tekem magasin mekem pablisa savve duim return visit. Sapos samfala pablisa iusim finis olketa idea for offerim olketa magasin, conductor savve askem olketa for storyim diswan or for talem eni naes experience. Long olketa Sunday, conductor savve iusim olketa sem kaen idea for offerim pablikeson for datfala month. Iumi savve offerim olketa pablikeson wea iumi iusim for study witim pipol olsem Gud Nius and Followim Toktok Bilong God brochure and Wanem Bible Teachim buk long eni taem nomoa, so conductor savve storyim hao for offerim wanfala long olketa pablikeson hia.

9. Long weekend wea kongregeson duim spesol campaign, wanem nao conductor savve storyim?

⁹ Sapos long weekend kongregeson duim spesol campaign, conductor savve storyim hao for offerim invitation or tract and olketa magasin tu, or hem savve storyim wanem for duim sapos wanfala man hem interest long gud nius. Or conductor savve storyim eni experience wea showimaot hem important for duim olketa campaign olsem.

10, 11. Wanem nao olketa pablisa savve duim mekem meeting for field service hem gohed long gudfala wei?

¹⁰ Wanem Olketa Pablisa Savve Duim: Olketa pablisa savve duim samting tu for mekem meeting for field service hem gohed long gudfala wei. From olketa prepare firstaem, maet long taem bilong famili worship, olketa bae garem point for storyim long datfala meeting. Hem gud for olketa pablisa garem olketa pablikeson wea olketa bae offerim bifor olketa go long meeting for field service mekem evriwan no delay for go long territory.

¹¹ Hem important for olketa pablisa garem plan for kasem ples for hipap bifor meeting for field service hem start. Iumi evriwan traem best for no leit for evri kongregeson meeting. Bat taem iumi leit for grup, datwan savve mekem olketa samting no gohed gud. Why nao olsem? Bikos brata wea leadim grup hem mas tingim staka samting bifor hem organizem datfala grup. Olsem example, sapos tu-thri pablisa nomoa kam, olketa savve duim territory wea olketa no finisim long wanfala taem. Sapos territory hem long ples wea pipol savve raf, conductor savve markem olketa brata for gogo tugeta witim olketa sista. Hem savve markem olketa pablisa wea olo or garem health problem for waka long ples wea fitim olketa. Hem savve markem olketa niu pablisa for waka witim olketa wea savve gud hao for preach. Bat sapos olketa pablisa kam leit, conductor mas changem moa evri samting mekem hem fitim olketa wea kam leit. Hem tru, samfala taem maet iumi garem gud reason why iumi leit. Bat sapos hem wei bilong iumi for leit, hem gud for iumi tingim why iumi leit. Waswe, hem bikos iumi no tinghae long meeting for field service or iumi no prepare gud firstaem?

12. Sapos iu laek for chusim pablisa wea iu laek waka witim, wanem nao hem gud for tingim?

¹² Olketa pablisa wea go long grup savve chusim firstaem hu nao olketa bae waka witim, or conductor bae markem partner for olketa. Sapos iu laek for chusim partner bilong iu, waswe sapos samfala taem iu waka witim olketa difren pablisa and no witim olketa gudfala fren bilong iu nomoa? (2 Cor. 6:11-13) Maet samfala taem hem gud for waka witim wanfala niu pablisa mekem iu savve helpem hem for kamap gud long wei for teach. (1 Cor. 10:24; 1 Tim. 4:13, 15) Lisin gud long wanem conductor storyim, and mek sure iu savve wea nao territory hem start. Bihaen long meeting for field service, hem gud for no changem olketa arrangement and no delay for kasem territory.

13. Sapos iumi evriwan duim wanem iumi shud duim, hao nao meeting for field service savve helpem iumi?

¹³ Bihaen 70-fala disaepol wea Jesus sendem olketa for go preach olketa kam bak, “olketa barava hapi.” (Luke 10:17) From Jesus hipap firstaem witim olketa bifor olketa go preach, masbi datwan helpem olketa for duim gud datfala waka. Distaem, olketa meeting for field service savve helpem iumi tu. Sapos iumi evriwan duim wanem iumi shud duim, meeting for field service bae encouragem, redyim, and organizem iumi for duim waka for preach “mekem pipol long evri kantri mas herem” gud nius.—Matt. 24:14.

Taem Sista Conductim Meeting for Field Service

Taem sista conductim grup hem mas kavarem hed bilong hem and hem savve sidaon. Hem savve iusim wanfala long olketa idea long disfala article long wei for storyim datwan tugeta, bat hem shud no duim long wei wea hem olsem hem teachim olketa. Sapos hem askem nara sista wea baptaes for prea, sista hia mas kavarem hed bilong hem tu. Sapos wanfala brata wea baptaes hem kam taem datfala meeting hem start finis, sista shud askem hem for finisim datfala meeting. Service overseer shud talem datfala sista eni samting wea maet kamap long grup taem hem conductim meeting for field service mekem sista savve long wanem for duim long taem olsem. Olsem example, wanfala pikinini boy wea baptaes maet kam for grup taem wanfala sista conductim datfala meeting, bat olketa elder disaed hem no fitim for datfala pikinini conductim datfala meeting. Sapos olsem, service overseer bae talem olketa hia datfala sista bae conductim meeting, bat boy hia savve prea sapos olketa elder sei hem fit for duim datwan. Or maet wanfala brata no savve conductim meeting or prea bikos long samfala samting wea olketa elder nomoa savve long hem. Olketa elder shud talem datfala sista for conductim meeting and prea, nomata datfala brata hem joinim datfala meeting, bat datfala sista no need for savve why nao olsem. Olketa elder savve talem datfala brata long olketa wanem day nao olketa sista bae conductim grup.

Samfala Samting for Duim Long Meeting for Field Service:

Storyim wanfala idea wea stap long Kingdom Ministry Bilong Iumi.
Showim wanfala video abaotem preaching waka from jw.org.
Storyim gudfala wei for startim story, or hao for leadim story for wanfala return visit, or hao for storyim donation long man wea tekem eni pablikeson.
Storyim wanfala scripture wea savve encouragem evriwan or wea join witim ministry.
Storyim lokol experience abaotem preaching waka or eni experience olsem from olketa pablikeson.
Storyim information from wanfala article long Kingdom Ministry Bilong Iumi.
Storyim information from wanfala part long Service Meeting.
Storyim information wea join witim ministry from Wastaoa.
Storyim information wea join witim ministry from Ministry Skul buk or olketa nara pablikeson.
Storyim samting from jw.org wea iumi savve iusim long ministry.
Storyim hao for startim story witim man wea bilivim God hem no stap, man wea bilivim teaching bilong evolution, wanfala Muslim, or wanfala Bahai.
Storyim wanem for talem taem wanfala man trae for stopem story.
Storyim hao for helpem pablisa wea iutufala waka tugeta for kamap gud long ministry.
Storyim wanem for duim taem pablisa meetim samwan wea story long difren languis.
Storyim hao for duim pablik witnessing, return visit, or Bible study.
Remindim olketa pablisa abaotem wei for stap klia long eni danger wea kamap, for changem story sapos hem fitim, showim gudfala wei, garem gudfala tingting, or eni nara samting olsem.