Circuit Assembly wea Bae Helpem Iumi Protectim Gud Spiritual Wei Bilong Iumi
1. Wanem nao wanfala samting wea Jehovah givim wea helpem iumi for talemaot gud nius?
1 For helpem iumi talemaot disfala gud nius, Jehovah givim staka samting for trainim and strongim iumi. (Matt. 24:14; 2 Tim. 4:17) Circuit assembly bilong iumi hem wanfala long olketa samting wea Jehovah givim for helpem iumi. Niu program for 2010 service year bae story raonem disfala theme “Protectim Gud Spiritual Wei Bilong Iu,” wea kam from Romans 8:5 and Jude 17-19.
2. (a) Wanem nao olketa gud samting wea iumi savve kasem long circuit assembly? (b) Hao nao olketa circuit assembly bifor helpem iu long ministry?
2 Gud Samting wea Iumi Bae Kasem: Datfala program bae helpem iumi for luksavve long olketa nogud samting wea savve spoelem iumi, olsem olketa samting wea savve weistim taem bilong iumi and wea mekem iumi for no tinghae long samting wea important. Iumi bae lanem hao for winim olketa nogud samting long disfala world wea God no laekem, and iumi bae storyim tu wanem nao olketa wei bilong spiritual man. Tok wea garem thrifala part wea kamap long Sunday bae showimaot wanem nao man wanwan, and olketa famili savve duim for strongim wei wea olketa fren witim God. Diswan savve helpem olketa taem olketa kasem hevi and hard taem from olketa no laek for duim samting wea no stret. Program bae helpem iumi for protectim tingting bilong iumi, for gohed gud long spiritual wei, and for helpem iumi tingim evritaem olketa gudfala blessing wea pipol bae kasem sapos olketa protectim spiritual wei bilong olketa.
3. Wanem taem nao circuit assembly bae kamap, and wanem nao iu plan for duim?
3 Taem iu savve long taem and ples wea circuit assembly bae kamap, mekem plan for kam and lisin gud long tufala day evriwan. Iumi savve Jehovah hem evritaem blessim olketa wea plan gud.—Prov. 21:5.
4. Wanem nao iumi bae kasem long circuit assembly?
4 Tru tumas, Jehovah nao Givim disfala nambawan present. Disfala program wea faithful and wise slave redyim hem samting wea iumi barava needim, for helpem iumi kamap olketa strongfala Christian. Iumi thankiu long Jehovah for evri samting wea hem givim wea helpem iumi “hol strong long wei for talemaot long pablik hope bilong iumi and no garem daot.”—Heb. 10:23-25; Jas. 1:17.