Hao for Lanem Olketa Niu Wan for Preach
1. Wanem nao feeling bilong iu long firstaem wea iu go preach?
1 Waswe, iu tingim firstaem wea iu preach long haos tu haos? Maet iu fraet lelebet. Sapos iu waka witim brata or sista wea study witim iu or nara pablisa, masbi iu hapi for hem helpem iu. Distaem iu savve hao for preach nao, and iu fit for helpem olketa niu wan for preach.
2. Wanem nao olketa niu pablisa need for lanem?
2 Olketa niu pablisa need for lanem hao for startim story witim haosholder, iusim Bible, duim olketa return visit, and for startim olketa Bible study. Olketa shud lane tu for preach long olketa difren wei, olsem stret witnessing and bisnis territory. Iu savve helpem olketa tu for kamap gud long olketa wei hia, taem olketa lukim wanem iu duim and talem.
3. Hao nao iumi savve helpem olketa narawan taem iumi showim hao for preach?
3 Showim Hao for Preach: Jesus showim olketa disaepol bilong hem hao for preach. (Luke 8:1; 1 Pet. 2:21) Taem iu plan for waka witim wanfala niu pablisa, redyim wanfala simpol story wea bae isi for hem followim. Maet iu savve iusim samfala idea wea stap long olketa buk bilong iumi. Then, story long first tu-thri haos mekem pablisa savve herem wanem iu talem. Bihaen iutufala lusim haos, maet iu askem tingting bilong pablisa abaotem story bilong iu and sapos hem heregud or nomoa. Diswan bae helpem hem luksavve, gud samting savve kamaot taem man waka witim olketa narawan long ministry, and bihaen hem story bae hem isi for hem acceptim eni idea wea iu talem.
4. Hao nao iumi savve helpem wanfala niu pablisa bihaen iumi herem story bilong hem?
4 Talem Samfala Idea: Jesus lanem olketa disaepol bilong hem hao for preach. (Matt. 10:5-14) Iu tu savve helpem niu pablisa olsem. Lisin gud long niu pablisa taem hem story. Bihaen iutufala lusim haos, praisem and tok kaen long hem nomata sapos hem need for kamap gud long samfala samting. Bifor iu talem eni idea, maet iu savve herehere long hao hem story long next haos, for savve sapos hem kamap gud long datfala samting. Maet hem fraet nomoa. Tingim diswan, evri pablisa difren and no garem sem savve, and staka difren wei stap for iumi duim wanfala samting long stretfala wei.—1 Cor. 12:4-7.
5. Wanem nao iumi savve talem taem iumi laek duim samting for helpem narawan?
5 Samfala taem niu pablisa savve askem iu for helpem hem. Bat sapos nomoa, iu nao mas duim samting for helpem hem. Hao nao iumi savve duim diswan long kaenfala wei? Samfala pablisa wea savve gud maet ask olsem, “Hem olraet sapos mi talem wanfala samting?” or, “Hao nao tingting bilong iu abaotem datfala story bilong iu?” Iu savve sei olsem tu, “Taem mi wanfala niu pablisa, mi faendem hem hard for . . . , bat diswan nao helpem mi. . . . ” Samfala taem hem gud for iutufala lukluk long Reasoning buk. For mekem hem no feel nogud, trae for helpem hem firstaem long wanfala samting long story bilong hem.
6. Taem iumi sei ‘iron savve sharpenem iron,’ hao nao diswan fitim ministry bilong iumi?
6 Iron Savve Sharpenem Iron: Paul encouragem Timothy wea savve tumas for preach, for gohed for teach and kamap strongfala Christian. (1 Tim. 4:13, 15) Nomata iu start for preach long taem finis hem gud for iu trae for kamap gud long wei for preach. Lane from olketa pablisa wea iu preach witim nomata olketa no savve gud olsem iu, and redi for helpem olketa long kaenfala wei. Diswan minim tu for helpem olketa niu wan for savve gud hao for preachim gud nius.—Prov. 27:17.