Preach Long “Evri Didifren Kaen Man”
1. Long wanem wei nao man wea talemaot gud nius hem olsem datfala man wea savve tumas for wakem samting?
1 Man wea savve tumas for wakem samting, hem garem staka tul, and hem savve wanem taem and hao for iusim olketa tul hia. Iumi tu garem olketa difren kaen tul for helpem iumi long disfala waka for talemaot gud nius. Olsem example, iumi garem olketa brochure wea story abaotem staka difren topic for helpem iumi preach long “evri didifren kaen man.” (1 Cor. 9:22) Insert long disfala Kingdom Ministry Bilong Iumi, hem garem list long samfala brochure hia, hem talem olketa brochure hia for hu, and hem garem samfala idea long hao iumi savve offerim.
2. Wanem taem nao hem gud for offerim brochure long preaching waka?
2 Taem wea Hem Fitim for Offerim Olketa Brochure: Man wea savve tumas for wakem samting bae iusim wankaen tul long taem wea hem savve datfala tul bae helpem hem for duim waka bilong hem. Iumi savve offerim brochure tu long taem wea iumi savve bae hem helpem man wea iumi meetim, and no long month wea Kingdom Ministry talem for offerim nomoa. Olsem example, sapos offer hem Wanem Bible Teachim buk and iumi meetim man wea no interest long Bible, bae hem gud for offerim brochure wea storyim samting wea hem interest long hem. Bihaen interest hem grow, then iumi savve showim hem datfala Wanem Bible Teachim buk.
3. Why nao iumi laek for savve hao for iusim gud olketa tul bilong iumi?
3 Bible hem praisem olketa wea savve tumas for duim waka bilong olketa. (Prov. 22:29) No eni waka hem moa important distaem winim disfala ‘holy waka for talemaot gud nius.’ (Rom. 15:16) For kamap wanfala “wakaman wea no shame long waka bilong hem,” iumi mas waka hard for savve hao for iusim gud olketa tul bilong iumi.—2 Tim. 2:15.