Helpem Pipol for Followim Toktok Bilong God
1. Wanem tufala brochure nao release long “Kingdom Bilong God Bae Kam!” Distrik Convention? And why nao tufala brochure hia savve helpem iumi long ministry?
1 Long “Kingdom Bilong God Bae Kam!” Distrik Convention, olketa releasem tufala niu brochure. Wanfala brochure hem, Followim Toktok Bilong God Mekem Iu Laef Olowe, and narawan hem, Followim Toktok Bilong God. Tufala brochure hia hem isi for transleitim bikos olketa no garem staka toktok. Taem tufala brochure hia release long English languis, olketa appruvim finis for transleitim long 431 languis.
2. Hu nao savve kasem gud samting from tufala brochure hia?
2 Hu nao savve kasem gud samting from tufala brochure hia? Tingim olketa difren kaen pipol hia:
• Haosholder wea pablisa meetim long haos tu haos waka or return visit wea hem no savve read or hem savve read lelebet nomoa.
• Pipol wea story long languis wea iumi no transleitim eni buk long hem or iumi transleitim tu-thri buk nomoa long datfala languis. Or pipol wea no savve readim languis wea olketa savve story long hem.
• Olketa earpas wea pablisa iusim saen languis for preach long olketa.
• Olketa pikinini wea no savve read yet wea dadi and mami laek for teachim truth long olketa.
3. Wanem nao iu savve lukim long Followim Toktok Bilong God brochure?
3 Wanem Nao Iu Lukim Long Tufala Brochure Hia?: Followim Toktok Bilong God brochure no garem staka toktok. Long botom bilong evri page hem garem Scripture and short toktok wea mekhae long olketa main point. Why nao hem olsem? Tingim sapos samwan givim iu wanfala brochure wea stap long languis wea iu no savve hao for readim, or hem garem kaen raeting wea iu no savve. Waswe, bae iu interest long datfala brochure, nomata hem garem olketa naes piksa? Nomoa. Pipol wea no savve read tu no interest long buk wea garem staka toktok insaed. So main samting iu bae lukim long disfala brochure hem olketa piksa wea garem olketa arrow wea point go long next piksa for storyim.
4. Wanem nao iu savve lukim long Followim Toktok Bilong God Mekem Iu Laef Olowe brochure?
4 Disfala brochure, Followim Toktok Bilong God Mekem Iu Laef Olowe, hem garem olketa sem piksa olsem Followim Toktok Bilong God brochure. Olketa redyim disfala brochure for iumi studyim witim olketa wea no savve read gud and olketa wea lane for read. Pablisa wea conductim study savve iusim tu disfala brochure, nomata student hem study long Followim Toktok Bilong God brochure. Each leson hem garem tufala page. Antap long left page long datfala leson hem garem wanfala kwestin and ansa hem stap long tufala page hia. Olketa piksa hem garem olketa toktok and olketa scripture. Botom long samfala page hem garem wanfala box wea garem samfala toktok and Scripture tu. Sapos student laek savve moa iu savve storyim diswan.
5. Hu nao iu savve offerim brochure long olketa and hao nao for duim datwan?
5 Hao for Iusim Tufala Brochure Hia: Iu savve offerim eniwan long tufala brochure hia long preaching waka taem iu meetim samwan wea iu luksavve bae hem kasem gud samting from datwan, nomata brochure hem no offer bilong datfala month. (Lukim box “Hao for Offerim Long Ministry.”) Iu savve iusim disfala brochure taem iu duim return visit long man wea interest. Talem hem iu garem wanfala samting for showim long hem and then givim hem datfala brochure.
6. Hao nao iu savve iusim olketa brochure hia taem iu conductim study?
6 From Followim Toktok Bilong God brochure no garem olketa kwestin olsem Wanem Bible Teachim buk, wei for studyim disfala brochure bae hem difren from wei for studyim datfala buk. Long evri ples pipol laek for herem olketa story, so iusim olketa piksa for storyim olketa story wea stap insaed long Bible and explainim olketa piksa hia. Showimaot iu interest long samting iu storyim and askem student for talemaot tingting bilong hem. Readim and story raonem olketa scripture wea stap long botom bilong page. Hem gud for askem kwestin long student mekem iutufala savve story and for mek sure hem minim datfala leson. Sapos iu study witim student long Followim Toktok Bilong God Mekem Iu Laef Olowe brochure, readim tugeta olketa toktok and scripture taem iufala storyim wanfala piksa.
7. Wanem nao iu savve duim for helpem student bilong iu for kasem moa savve?
7 Helpem Student for Kasem Moa Savve: Hem gud sapos datfala study wea iutufala duim long datfala brochure helpem student bilong iu for laek lane for read, mekem hemseleva savve lane moa abaotem Jehovah. (Matt. 5:3; John 17:3) So sapos firstaem iutufala study insaed Followim Toktok Bilong God brochure, gogo maet iu savve helpem student for lane hao for read, and iutufala savve iusim Followim Toktok Bilong God Mekem Iu Laef Olowe brochure for study long hem. Nomata bihaen iutufala studyim eniwan long tufala brochure hia, student bae no redi yet for baptaes. Iutufala shud studyim Wanem Bible Teachim buk or eni nara buk wea bae helpem student for savve moa abaotem Bible.
8. Why nao iumi hapi for garem tufala brochure hia for iusim long ministry?
8 Sapos pipol laek for laef olowe olketa mas lisin long Ruler bilong universe, Jehovah. (Isa. 55:3) Jehovah hem laekem “evri difren kaen man,” and olketa wea no savve read tu, for lane hao for lisin long hem. (1 Tim. 2:3, 4) Iumi hapi for garem tufala niu brochure hia wea iumi savve iusim for teachim pipol hao for lisin long God!
[Box long page 3]
Hao for Offerim Long Ministry
Showim page 2 and 3 long haosholder and sei: “Waswe, iu laek stap long wanfala ples wea luk naes olsem? [Weit for hem ansa.] Bible hem promis klosap nao God bae mekem disfala earth wanfala naes ples for stap long hem, wea no eniwan bae poor or sik. Lukim wanem Bible sei iumi mas duim for stap long wanfala ples olsem. [Readim Isaiah 55:3 wea stap antap long page 3.] Hem sei for iumi ‘kam long God’ and ‘lisin’ long hem. Bat hao nao God story long iumi?” Storyim ansa wea stap long page 4 and 5 witim hem. Sapos hem busy, leavim brochure witim hem and markem taem for go bak and storyim ansa long hem.