Storyim Samting wea Bae Mekem Pipol Interest
1. Wanem nao iumi savve lanem from samting wea olketa Christian long first century duim taem olketa meetim pipol from difren ples and wea garem difren religion?
1 Olketa Christian long first century talemaot gud nius long pipol from difren ples and wea garem difren religion. (Col. 1:23) Nomata Kingdom bilong God nao main subject, olketa storyim samting wea fitim pipol wea olketa meetim. Olsem example, first samting wea Peter storyim long olketa Jew wea respectim olketa Holy Raeting, hem samting wea profet Joel talem bifor. (Acts 2:14-17) Bat long Acts 17:22-31, lukim wanem Paul storyim long olketa man bilong Greece. Distaem, long samfala territory pipol respectim Bible, and iumi savve iusim Bible taem iumi go preach long haos tu haos. Bat sapos iumi story witim pipol wea no interest long Bible, no interest long religion, or wea no Christian, then iumi mas tingting gud abaotem wanem iumi storyim.
2. Hao nao iumi savve iusim wanem iumi offerim for helpem pipol wea tinghae long Bible and pipol wea no interest long Bible?
2 Iusim Gud Wanem Iumi Offerim: Wanem iumi offerim long disfala service year bae change evri tu month. Iumi bae offerim olketa magasin, olketa tract, and olketa brochure. Nomata sapos pipol long territory no interest long Bible, iumi savve offerim samting wea olketa interest long hem. Maet iumi no readim scripture long firstaem iumi meetim samwan, bat sapos hem interest iumi savve go bak and helpem hem for lane abaotem God and abaotem Bible wea kam from hem. Bat sapos iumi preach long pipol wea respectim Bible, iumi savve offerim literature and storyim samting wea fitim olketa. Maet iumi savve offerim Wanem Bible Teachim buk, or tufala brochure hia, Followim Toktok Bilong God or Followim Toktok Bilong God Mekem Iu Laef Olowe, nomata offer bilong datfala month hem difren. Important samting nao hem for storyim samting wea bae mekem pipol interest.
3. Hao nao heart bilong pipol long territory hem olsem graon?
3 Redyim Graon: Heart bilong iumi olketa man hem olsem graon. (Luke 8:15) Samfala graon iu mas redyim gud firstaem bifor iu plantim seed long hem, semsem tu for seed long truth bilong Bible start for grow iumi mas redyim heart bilong man. Olketa Christian long first-century hapi and satisfae bikos olketa savve helpem evri difren kaen pipol for savve long truth bilong Bible. (Acts 13:48, 52) Iumi tu savve helpem evri difren kaen pipol taem iumi storyim samting wea bae mekem olketa interest.