Kwestin Box
◼ Hao nao iumi bae luksavve sapos hem fitim for givim magasin or buk long samwan?
Main samting wea bae helpem iumi for luksavve nao hem sapos man hem interest. Sapos hem interest tru, maet iumi savve givim hem tufala magasin, wanfala brochure, or eni nara buk wea iumi offerim long datfala month. Sapos iumi luksavve hem interest iumi savve givim magasin or buk long hem, nomata hem no givim eni donation or hem givim lelebet donation nomoa. (Job 34:19; Rev. 22:17) Bat, iumi bae no givim olketa buk bilong iumi long olketa wea no tinghae long hem.—Matt. 7:6.
Wanem nao mekem iumi luksavve sapos haosholder hem interest? First samting, wei wea hem willing for story witim iumi. Sapos hem lisin gud, ansarem iumi taem iumi askem hem kwestin, and hem talemaot tingting bilong hem datwan showimaot hem interest long story bilong iumi. Nara samting, sapos hem lukluk long Bible taem iumi readim scripture datwan showimaot hem respectim Word bilong God. And tu, sapos hemseleva nao askem magasin or buk bilong iumi datwan showimaot hem interest. Olketa pablisa shud iusim gudfala tingting for luksavve sapos man hem interest or nomoa. Olsem example, taem iu duim street witnessing, hem bae no stret for sharemaot olketa magasin, brochure or buk long eniwan nomoa wea wakabaot go pas. Sapos iumi no fit for luksavve sapos man interest, maet hem gud for givim hem wanfala tract.
Saed long wei for givim donation for magasin or buk wea iumi tekem from bukrum, pablisa shud tekem followim wanem hem needim long ministry, no followim haomas donation hem fit for givim. Donation wea iumi givim hem for sapotim Kingdom waka wea gohed long full world, and hem no for peim olketa magasin and buk bilong iumi nomoa. Nomata iumi rich or poor, iumi no givim donation long taem wea iumi garem extra selen nomoa, bat wei wea iumi tinghae bae mekem iumi willing for givim wanem iumi garem for sapotim Kingdom waka. (Mark 12:41-44; 2 Cor. 9:7) Wei for tinghae bae mekem iumi tekem nomoa olketa magasin and buk wea iumi needim mekem iumi no weistim olketa donation.
[Blurb long page 2]
Olketa pablisa shud iusim gudfala tingting for luksavve sapos man hem interest or nomoa