Wanem for Talem

For Startim Bible Study Long First Saturday Long December

“Iumi evriwan laek for garem gudfala gavman, iaman? Waswe, iu tingse eni gavman savve finisim olketa problem olsem wei wea pipol raf and no duim stret samting?” Weit for hem ansa. Talem haosholder hao Jesus teachim olketa disaepol for prea for wanfala gavman olsem for kam, wea hem nao Kingdom bilong God. Showim firstfala kwestin long page 16 bilong November-December Wastaoa. Storyim ansa bilong firstfala kwestin and readim wan or tufala scripture. Offerim olketa magasin and markem taem for go bak and storyim ansa bilong next kwestin.

November-December

“Mifala kam for story abaotem datfala prea wea Jesus teachim olketa disaepol bilong hem wea staka pipol savve long hem. [Readim Matthew 6:9, 10.] Waswe, enitaem eniwan explainim gud long iu wanem nao Kingdom bilong God and why nao Jesus storyim datwan evritaem? [Weit for hem ansa.] Disfala magasin storyim wanem Bible talem abaotem Kingdom bilong God and olketa gud samting wea pipol bae kasem from datwan.”

November

“Evriwan laek for hapi, bat staka pipol no hapi. Long tingting bilong iu, wanem nao savve mekem man for hapi? [Weit for hem ansa.] Taem mi followim wanem Bible talem, datwan mekem mi hapi. Olsem example, lukim wanem disfala Bible principle talem. [Readim Hebrew 13:5.] Disfala magasin storyim fofala Bible principle wea taem man followim hem bae hapi.”