Olketa Niu Song for Worship!
1 Long annual meeting bilong Watch Tower Bible and Tract Society of Pennsylvania long October 4, 2014, olketa announcem plan for changem samfala toktok long songbuk bilong iumi and addim samfala niu song. Datwan hem wanfala hapi nius! Brata wea givim tok storyim hao olketa Kingdom song hem important tumas long worship bilong iumi.—Ps. 96:2.
2 Why nao iumi mas duim olsem? First samting, wei wea iumi minim Bible hem gohed for kamap moa klia, and datwan savve affectim olketa word long olketa song bilong iumi. (Prov. 4:18) Nara samting, samfala toktok from Bible wea stap long songbuk bilong iumi hem change insaed revised English New World Translation. So iumi mas changem olketa word bilong olketa song for fitim datfala revised Bible. From diswan hem bigfala waka, mifala disaed for addim samfala niu song tu.
3 Waswe, bae iumi weit go kasem taem wea olketa printim niu songbuk bifor iumi start for iusim olketa niu song? Nomoa. Mifala hapi for announcem insaed next tu-thri month samfala niu song bae kamap long Web site bilong iumi, jw.org. Taem wanfala niu song hem kamap long Web site, bae iumi singim tu long end bilong wanfala Service Meeting. Long botom long schedule bae hem sei “niu song” and talem title bilong hem.
4 Wei for Lanem Olketa Niu Song: Hem no isi for lanem wanfala niu song. Nomata olsem, iumi laek for followim example bilong man wea raetem psalm and singsing big long olketa kongregeson meeting and “no stap kwaet.” (Ps. 30:12) For lanem wanfala niu song, duim olketa samting hia.
Pleim datfala recording wea bae kamap long Web site and lisin gud long hem. Taem iu herem datfala tune staka taem, bae hem isi for iu savve gud long hem.
Traem best for baeheartim olketa word.
Singim datfala song followim stretfala tune bilong hem. Practicem gud gogo iu savve long hem.
Practicem olketa niu song tu-thri taem long Famili Worship gogo famili bilong iu savve gud.
5 Long olketa month wea bae kam, taem iumi singim wanfala niu song for finisim Service Meeting, kongregeson bae herehere firstaem long recording bilong datfala song. Then iumi bae singim datfala song followim music olsem iumi savve duim evritaem.
6 Long olketa Christian meeting, iumi hapi for singsing witim olketa narawan for praisem Jehovah. Dastawe, long taem for singsing, hem shud no wei bilong iumi for go aot nomoa.
7 Nara wei stap tu for iumi showimaot iumi tinghae long music bilong iumi for worship. Long olketa assembly and convention, iumi lisin long music bifor session hem start. Tufala taem evri year, olketa brata and sista wea kam from olketa difren kantri long world peim pasis bilong olketa seleva for kam long Patterson, New York, for recordim naesfala music for iumi iusim long worship. So taem chairman askem iumi for sidaon and lisin long music, iumi shud duim olsem. Diswan bae redyim heart bilong iumi for information wea bae iumi herem.—Ezra 7:10.
8 Long end bilong meeting bilong iumi tuday, bae iumi singim wanfala niu song wea garem title “Kingdom Hem Rul—Hem Mas Kam!” Disfala song wea olketa herem long annual meeting, olketa raetem for mekhae long 100 year from taem wea Kingdom hem start for rul.
9 Olketa niu song hem wanfala long olketa “gudfala samting” wea iumi kasem from Jehovah. (Matt. 12:35a) Iumi laekem tumas for lanem olketa niu song hia and singim from heart bilong iumi for praisem and mekhae long God bilong iumi!—Ps. 147:1.