Singsing Long Jehovah!
“Mi bae singsing long God bilong mi long full laef bilong mi.”—PS. 146:2.
1. Wanem nao mekem David raetem samfala song bilong hem?
TAEM David young, hem evritaem lukaftarem olketa sheepsheep bilong dadi bilong hem klosap long Bethlehem. Taem hem duim datwan, hem lukluk long olketa nambawan samting wea Jehovah wakem. Hem lukim olketa star long skae, “olketa wild animal long bush,” and “olketa bird long skae.” Hem barava tinghae long olketa samting wea hem lukim and datwan mekem hem for raetem olketa naesfala song for praisem God. Staka long olketa song wea David raetem hem long buk bilong Psalms.a—Readim Psalm 8:3, 4, 7-9.
2. (a) Music savve mekem man feel hao? Storyim example. (b) Wanem nao iumi lanem abaotem wei wea David fren witim Jehovah long Psalm 34:7, 8 and Psalm 139:2-8?
2 Luk olsem long datfala taem nao David lanem gud hao for pleim music. From hem savve tumas, King Saul askem hem for pleim harp for hem. (Prov. 22:29) Music wea David pleim mekem king hapi moa, olsem gudfala music tu savve mekem pipol hapi distaem. Evritaem David pleim harp, “Saul hem savve feel gud.” (1 Sam. 16:23) Olketa song wea David raetem helpem pipol kam kasem distaem. Nomata winim 3,000 year bihaen David hem born, staka million pipol distaem readim olketa song wea hem raetem for comfortim and givim hope long olketa.—2 Chron. 7:6; readim Psalm 34:7, 8; 139:2-8; Amos 6:5.
Music Hem Important Part Long Tru Worship
3, 4. Wanem nao David arrangem saed long music?
3 David savve tumas long music and hem iusim savve bilong hem for praisem Jehovah. Taem David kamap king long Israel, hem arrangem olketa Levite for pleim naesfala music long tabernacle. Long 38,000 Levite wea waka long temple, hem markem 4,000 long olketa for “pleim music and singsing for praisem God,” wea 288 “barava savve tumas long hao for singsing long Jehovah.”—1 Chron. 23:3, 5; 25:7.
4 David nao raetem staka long olketa song wea olketa Levite pleim and singim. Olketa Israelite wea garem privilege for herem olketa song wea David raetem, olketa hapi tumas and tinghae long wanem olketa herem. Taem olketa Levite tekem ark bilong covenant long Jerusalem, “David sei long olketa chief bilong olketa Levite for chusim samfala brata bilong olketa wea singsing for pleim olketa instrument wea garem string and olketa harp and olketa nara samting olsem belo for mekem naesfala music.”—1 Chron. 15:16.
5, 6. (a) Why nao music hem important samting long taem bilong David? (b) Why nao iumi savve music hem important part long tru worship long Israel bifor?
5 Why nao music hem important samting long taem bilong David? Waswe, hem bikos David savve tumas long hao for pleim music? Nomoa. Bible storyim nara reason staka handred year bihaen, taem King Hezekiah startim moa wei for worship long temple. Long 2 Chronicles 29:25, hem sei: “[Hezekiah] talem olketa Levite for tekem kam olketa instrument olsem belo witim olketa instrument wea garem string and olketa harp long haos bilong Jehovah, olsem David, profet Gad, and profet Nathan talem. Jehovah nao talem diswan long olketa profet bilong hem.”
6 Jehovah talem olketa profet hao pipol bilong hem mas singim olketa song for praisem hem. Olketa Levite wea singsing no need for duim samfala waka wea olketa nara Levite duim mekem olketa garem taem for raetem olketa song and for practicem.—1 Chron. 9:33.
7, 8. Taem iumi singim olketa Kingdom song, wanem nao important long Jehovah?
7 Maet iu sei, “Taem olketa chusim olketa man for singsing long tabernacle, hard tumas for olketa chusim mi bikos mi no savve singsing gud!” Bat no evri Levite wea singsing and pleim music savve tumas long datwan. Long 1 Chronicles 25:8 hem sei samfala long olketa “lane” tu. Maet samfala long olketa nara tribe bilong Israel tu savve tumas for pleim music and singsing, bat Jehovah markem olketa Levite nomoa for duim datwan. Nomata olketa Levite “savve tumas” or “lane” nomoa for pleim music and singsing, evriwan long olketa faithful for duim assignment bilong olketa.
8 David laekem tumas music and hem savve tumas long datwan. Bat waswe, wei for savve tumas long samting nao hem important long God? Long Colossians 3:23, Paul sei: “Eni samting wea iufala duim, duim witim full heart and strong bilong iufala. Duim datwan olsem iufala waka for Jehovah and no for olketa man.” So samting wea important long Jehovah nao hem for iumi singsing ‘witim full heart and strong bilong iumi’ for praisem hem.
Music Long Taem Bilong Olketa Narawan
9. Sapos iu stap taem olketa dedicatem temple, wanem nao maet iu lukim and herem?
9 Taem Solomon hem king, music hem barava important part long tru worship. Taem olketa dedicatem temple, olketa garem wanfala band wea pleim olketa music instrument and 120 pipol wea blowim olketa trumpet. (Readim 2 Chronicles 5:12.) Bible sei: “Taem olketa man [olketa priest] blowim trumpet and olketa man singsing datwan here naes tumas. Olketa praisem and thankiu long Jehovah, . . . ‘bikos hem gud tumas and hem evritaem kaen.’ ” Long datfala taem, “wanfala cloud hem fulimap haos bilong Jehovah” wea showimaot hem hapi long wanem olketa duim. Hem mas naes tumas for herem olketa Levite blowim olketa trumpet witim staka thousand man wea singsing tugeta!—2 Chron. 5:13.
10, 11. Hao nao iumi savve music hem important part long worship bilong olketa Christian long first century?
10 Music hem important part long worship bilong olketa Christian long first century tu. Olketa hia no hipap long tabernacle or temple, bat long haos bilong olketa brata. Nomata pipol spoelem olketa and olketa kasem staka nogud samting, olketa Christian hia gohed for singim olketa song for praisem God.
11 Aposol Paul sei long olketa brata long Colossae: “Gohed . . . encouragem narawan long wei for singim olketa psalm, witim olketa song for praisem God, and olketa naesfala song for worshipim God.” (Col. 3:16) Taem Paul and Silas stap long prison, olketa “gohed prea and singsing for praisem God” nomata tufala no garem eni songbuk. (Acts 16:25) Sapos iu stap long prison and no garem songbuk, haomas Kingdom song nao iu savve rememberim?
12. Wanem nao iumi savve duim for showimaot iumi tinghae long olketa Kingdom song?
12 From music hem important part long worship, hem gud for tingim olketa kwestin hia: ‘Waswe, mi showimaot mi tinghae long olketa Kingdom song? Waswe, mi trae hard for kam early long olketa meeting, assembly, and convention mekem mi savve singim firstfala song witim olketa brata and sista? Waswe, mi singsing witim feeling? Waswe, mi helpem pikinini bilong mi for luksavve hao song for finisim Theocratic Ministry Skul or song bifor Wastaoa Study hem no taem for man spel or wakabaot aotsaed?’ Singsing hem part long worship bilong iumi. Tru tumas, nomata sapos iumi “savve tumas” hao for singsing or “lane” nomoa, iumi evriwan savve singsing tugeta for praisem Jehovah and iumi shud duim datwan.—Markem witim 2 Corinthians 8:12.
Olketa Change Kamap
13, 14. Why nao hem gud tumas for singsing from heart taem iumi singim olketa Kingdom song? Storyim example.
13 Winim 100 year go finis, Zion’s Watch Tower storyim wanfala reason why olketa Kingdom song hem important. Hem sei: “Wei for singsing abaotem olketa tru samting long Bible hem gudfala wei for mekem truth kasem mind and heart bilong pipol bilong God.” Staka long olketa Kingdom song hem garem olketa toktok from Bible, so taem iumi baeheartim samfala song datwan savve mekem truth kasem heart bilong iumi. Taem staka wea kam long meeting long firstaem herem kongregeson singsing tugeta, datwan mekem olketa laek savve long truth.
14 Long wanfala evening long 1869, taem Charles Russell go bak long haos bihaen waka, hem herem pipol singsing long wanfala building. For samfala year finis hem tingse bae hem hard tumas for lanem tru samting abaotem God, so hem disaed for gohed busy long bisnis bilong hem. Hem tingse sapos hem kasem selen, hem savve iusim datwan for helpem pipol long physical wei nomata hem no savve helpem olketa long spiritual wei. Charles Russell disaed for go long datfala ples wea hem herem pipol singsing and hem lukim hao pipol hia hipap for worship. Hem sidaon and lisin long olketa. Hem sei samting wea hem herem long datfala naet ‘hem olsem God nao leadim hem mekem datwan strongim faith bilong hem long Bible.’ So tingim, samting wea mekem Brata Russell go long datfala meeting nao hem singsing wea hem herem.
15. Mining bilong olketa wanem samting nao hem change wea mekem iumi needim niu songbuk?
15 Long olketa year wea go pas, hao iumi minim samfala scripture hem change. Proverbs 4:18 sei: “Wei bilong olketa wea raeteous hem olsem laet wea kakamap braet go kasem taem hem big daylaet.” From diswan, samfala change mas kamap tu long olketa song bilong iumi. For winim 25 year, Olketa Jehovah’s Witness long staka kantri iusim songbuk Singim Praise Long Jehovah.b Long olketa year bihaen olketa pablisim datfala songbuk, hao iumi minim samfala scripture hem change, and samfala toktok long songbuk hem no fitim for iusim distaem. Olsem example, distaem iumi no sei “niu order” bat iumi sei “niu world.” And iumi no sei love, hapi, and peace hem “olketa frut bilong holy spirit” bat “holy spirit mekem man for garem” olketa wei hia. From hao iumi minim samfala scripture hem change, iumi needim songbuk wea fitim distaem.
16. Long wanem wei nao niu songbuk bae helpem iumi for followim kaonsel long Ephesians 5:19?
16 So from diswan and olketa nara reason, Governing Body appruvim for iumi garem niu songbuk Singsing Long Jehovah. Datfala songbuk garem 55 song. From iumi no garem staka song olsem bifor, hem bae isi for baeheartim samfala long olketa niu song hia. Diswan followim kaonsel wea Paul talem long Ephesians 5:19.—Readim.
Showimaot Iu Tinghae
17. Sapos iumi savve shame for singsing long kongregeson meeting, wanem nao hem gud for tingim?
17 Sapos iu man wea savve shame, waswe, datwan stopem iu for no singsing big long olketa kongregeson meeting? Tingim diswan: “Iumi evriwan savve sin staka taem” long toktok bilong iumi. (Jas. 3:2) Nomata olsem, datwan no stopem iumi for preach long haos tu haos for praisem Jehovah. So nomata iumi no savve singsing gud, iumi shud no letem datwan for stopem iumi for singsing long God for praisem hem! Jehovah wea “givim mouth long man” hem hapi taem iumi singsing for praisem hem.—Ex. 4:11.
18. Wanem nao helpem staka brata and sista for lanem olketa niu song?
18 Olketa CD wea garem title Sing to Jehovah—Piano Accompaniment barava helpem olketa brata and sista for lanem olketa niu song. Wei for lisin long olketa music hia hem barava naes. Sapos iu lisin long datwan long haos and singsing followim long songbuk bilong iu, datwan bae helpem iu for lanem olketa song hia and no fraet for singim long Kingdom Hall.
19. Storyim wanem olketa brata and sista duim for redyim olketa Kingdom song.
19 Maet samfala taem iumi no tinghae tumas long music wea iumi herem long olketa spesol assembly day, circuit assembly, and distrik convention. Olketa brata and sista duim bigfala waka for redyim music hia. Bihaen olketa brata chusim music for iusim, olketa mas raetem music for 64 brata and sista wea insaed long band for pleim. Olketa brata and sista hia iusim staka hour for practicem music and then olketa recordim long Bethel studio long Patterson, New York. Tenfala long olketa brata and sista hia no stap long America. Bat evriwan long band barava tinghae long privilege wea olketa garem for redyim olketa naesfala music for iumi herem long olketa assembly and convention. Iumi savve showimaot iumi tinghae long hard waka bilong olketa. Long olketa assembly and convention, hem gud for iumi sidaon and lisin long music wea olketa brata and sista redyim taem chairman askem iumi for duim datwan.
20. Wanem nao iu disaed strong for duim?
20 Jehovah hem lisin long olketa song wea iumi singim for praisem hem. Hem tinghae long olketa song hia. Iumi savve mekem Jehovah hapi long wei for singsing from heart bilong iumi taem iumi hipap for worshipim hem. Tru tumas, nomata iumi savve tumas long hao for singsing or lane nomoa, hem gud for iumi gohed “singsing long Jehovah”!—Ps. 104:33.
[Footnotes]
a Interesting samting, winim 1,000 year bihaen David dae, staka angel kam long olketa man wea lukaftarem sheepsheep klosap long Bethlehem taem Messiah hem born.—Luke 2:4, 8, 13, 14.
b Disfala songbuk wea garem 225 song hem stap long winim 100 languis bat long Solomon Islands Pidgin hem garem 100 song.
Wanem Nao Tingting Bilong Iu?
• Wanem nao olketa example long bifor wea showimaot music hem important part long worship?
• Hao nao samting wea Jesus talem long Matthew 22:37 join witim wei for singim olketa Kingdom song?
• Wanem nao iumi savve duim for showimaot iumi tinghae long olketa Kingdom song?
[Piksa long page 23]
Waswe, iu helpem pikinini bilong iu luksavve taem bilong singsing hem no taem for spel or wakabaot aotsaed?
[Piksa long page 24]
Waswe, iu lanem olketa niu song long haos?