Gohed Kamap Gud Long Wei for Preach
1. Olketa wanem example nao showimaot iumi shud gohed for kamap gud long wei for preach?
1 Olketa Christian shud gohed waka hard for kamap gud long wei for preach. Dastawe Jesus gohed trainim olketa disaepol bilong hem. (Luke 9:1-5; 10:1-11) Hem tu why Aquila and Priscilla tekem Apollos go long haos bilong tufala and “helpem hem for minim gud moa teaching bilong God.” (Acts 18:24-26) And hem sem reason why Paul encouragem Timothy wea strong for preach for gohed followim wanem hem lanem mekem “evriwan lukim” wei wea hem gohed for kamap strongfala Christian. (1 Tim. 4:13-15) Nomata iumi duim waka bilong Lord for talemaot gud nius for longfala taem finis, iumi mas gohed for kamap gud long wei for preach.
2. Wanem nao iumi savve duim mekem iumi savve lane from olketa narawan?
2 Lane From Olketa Narawan: Wanfala samting wea savve helpem iumi for kamap gud long wei for preach hem for lane from olketa narawan. (Prov. 27:17) Dastawe taem nara pablisa hem story, iumi mas lisin gud. Askem samfala idea abaotem hao for storyim wanfala subject from olketa wea savve gud hao for preach, and lisin gud long wanem olketa talem. (Prov. 1:5) Waswe, iu hol bak for duim return visit, startim Bible study, or for duim olketa nara samting long ministry? Sapos olsem, askem grup overseer bilong iu or eni nara pablisa wea savve gud hao for duim olketa samting hia for trainim iu. No forget, holy spirit bilong Jehovah tu savve helpem iu, so gohed askem Jehovah for datwan long prea bilong iu.—Luke 11:13.
3. Sapos samwan talem iumi samting wea bae helpem iumi, wanem nao iumi shud duim?
3 Sapos iu no ask for eni advaes, bat samwan talem samting wea bae helpem iu for kamap gud long wei for preach, no feel nogud. (Eccl. 7:9) Followim example bilong Apollos for hambol and tinghae long help wea iu kasem. Taem iumi duim olsem, datwan showimaot iumi wise.—Prov. 12:15.
4. Why nao Jesus sei iumi mas kamap gud long wei for preach?
4 Mekhae Long God: Jesus iusim wanfala tokpiksa for encouragem olketa disaepol for gohed kamap gud long wei for preach. Hem sei hemseleva olsem wanfala grape tree and olketa anointed Christian nao olketa branch. Hem sei Dadi bilong hem prunim evri branch wea garem frut mekem hem “savve garem samfala frut moa.” (John 15:2) Man wea garem grape planteison laekem olketa branch for garem samfala frut moa, and Jehovah tu laekem iumi for gohed kamap gud long wei for “iusim mouth bilong iumi” for preach. (Heb. 13:15) Wanem nao savve happen taem iumi kamap gud long wei for preach? Jesus sei: “Samting wea mekhae long Dadi bilong mi nao hem for iufala gohed garem staka frut.”—John 15:8.