No Fraet for Talemaot Tru Samting Abaotem Jesus

Taem iumi savve hao for explainim olketa tru samting abaotem Jesus long nara pipol, datwan mekem iumi no fraet for duim datwan. For man garem trufala faith hem mas savve long tru samting abaotem Jesus. (Eph. 2:20) Sapos Jesus no dae for iumi, bae iumi no garem eni hope for laef olowe. (Acts 4:12) Dastawe hem important for luksavve long position wea Jesus garem long plan bilong God. Staka pipol bilivim olketa teaching abaotem Jesus wea no stret witim wanem Bible talem. Datwan minim maet olketa no kasem olketa blessing wea God promisim for olketa wea showimaot faith long Jesus. From iumi laekem tumas for sapotim tru worship, datwan mekem iumi laek for helpem pipol for kasem stretfala savve abaotem Jesus, for luksavve hem son bilong God, and for savve long wanem hem duim long plan bilong God. Iumi laek for no fraet for storyim olketa tru samting abaotem Jesus long March, April, and May.