LAEF BLO CHRISTIAN
Parents, Teachim Pikinini blo Iu lo Wanem Olketa Need for Savve
Iumi stap lo world wea sei gud samting hem nogud and nogud samting hem gud. (Aesaea 5:20) Sorre nao, samfala pipol duim olketa samting wea Jehovah heitim, insaed diswan hem wei wea tufala wea sem sex duim samting wea no stret. Olketa young wan lo skul or olketa narawan trae for switim olketa young wan blo iumi for followim wei blo olketa. Hao nao iu savve redyim olketa pikinini blo iu for deal witim disfala challenge and olketa nara test?
Teachim pikinini blo iu for savve lo olketa standard blo Jehovah. (Levitikas 18:3) Isisi teachim olketa information wea fitim age blo olketa abaotem wanem Bible talem saed lo sex. (Diutronomi 6:7) Askem iuseleva: ‘Waswe, mi teachim olketa pikinini blo mi abaotem stretfala wei for showimaot love, why hem important for werem gud kaleko, and abaotem hao for olketa narawan respectim olketa? Waswe, olketa pikinini blo mi savve wanem for duim sapos eniwan laek for showim pornography lo olketa or askem olketa for duim samting wea Jehovah sei hem rong?’ Taem pikinini savve firstaem wanem for duim bae olketa misstim trabol. (Provebs 27:12; Eklesiastes 7:12) Taem iu teachim gud pikinini blo iu, iu lovem datfala present wea iu kasem from Jehovah.—Sams 127:3.
WATCHIM VIDEO BUILDIM HAOS WEA BAE STAP FOR OLOWE—PROTECTIM PIKININI BILONG IU FROM “OLKETA RABIS SAMTING,” AND THEN ANSAREM OLKETA KWESTIN HIA:
Why nao samfala hol bak for teachim pikinini blo olketa abaotem sex?
Why nao olketa parents mas “trainim olketa [pikinini] followim samting wea Jehovah talem”?—Eph 6:4
Savve hem wanfala protection
Wanem nao organization blo Jehovah provaedem for helpem parents teachim pikinini blo olketa abaotem sex?—w19.05 12, box
Why nao iu shud story evritaem witim olketa pikinini blo iu bifor problem kamap?