Iusim Enjoyim Laef for Olowe! for Mekem Grow Faith blo Bible Student lo Jehovah and Jesus

Sapos Bible student garem strong faith, datwan mekem God hapi. (Heb 11:6) Iumi savve kasem heart blo student taem iumi iusim buk Enjoyim Laef for Olowe! Study buk hia garem olketa key scripture, hem storyim klia information, garem gudfala kwestin, video wea savve kasem heart, and olketa naesfala piksa. Taem iumi helpem student for garem olketa gudfala wei and fren gud witim God, hem olsem iumi build witim material wea fire no savve bonem.​—1Co 3:12-15.

Samfala pipol faendem hem hard for fren witim God wea olketa no savve lukim. So iumi need for helpem olketa for savve gud lo Jehovah and garem faith lo hem.

WATCHIM VIDEO IUSIM “ENJOYIM LAEF FOR OLOWE!” FOR MEKEM GROW FAITH LO JEHOVAH AND THEN ANSAREM OLKETA KWESTIN HIA:

• Hao nao iumi savve sista hia hem prepare gud for datfala study?

• Hao nao hem iusim olketa extra kwestin for helpem student minim Aesaea 41:10, 13?

• Hao nao video and olketa verse wea tufala readim hem affectim Bible student?

Staka pipol no minim gud ransom, or olketa no ting lo hem olsem present wea God givim for each wan lo iumi. (Ga 2:20) Dastawe, iumi mas helpem olketa for garem faith lo ransom sakrifaes blo Jesus.

WATCHIM VIDEO IUSIM “ENJOYIM LAEF FOR OLOWE!” FOR MEKEM GROW FAITH LO JESUS AND THEN ANSAREM OLKETA KWESTIN HIA:

• Hao nao iumi savve brata hia hem prepare gud for datfala study?

• Hao nao hem iusim datfala information lo “Faendaot Moa” for helpem student?

• Why nao hem important for prea for Bible student?