HAO FOR LUSIM WEI FOR HEIT

4 | God Savve Helpem Iu for Lusim Wei for Heit

Wat Bible Teachim:

“Spirit hem mekem man for garem love, hapi, peace, and for patient. . . . for kaen long narawan, duim gudfala samting, garem faith, hambol, and kontrolem seleva.”—GALATIA 5:22, 23.

Wat Hem Minim:

God nomoa savve helpem iumi for lusim wei for heit. Holy spirit blo God savve helpem iumi for garem olketa wei wea iumiseleva hard for garem. So iumi need for depend lo God and no trae for duim samting seleva for lusim wei for heit. If iumi duim olsem, iumi bae garem tu sem feeling olsem aposol Paul wea sei: “Nomata wanem samting hem kasem mi, paoa wea mi kasem from God nao hem strongim mi for gohed.” (Philippi 4:13) Dastawe iumi fit for sei: “[Jehovah] nomoa bae hemi helpem mi.”—Sams 121:2.

Wat Iu Savve Duim:

“Firstaem mi man for raf, bat Jehovah helpem mi for change and distaem mi stap gud witim olketa narawan.”—WALDO

Prea and askem Jehovah for holy spirit. (Luke 11:13) Askem hem for helpem iu for garem olketa gud wei. Studyim wat Bible talem abaotem olketa wei olsem love, peace, patient, and for kontrolem seleva, bikos datwan savve helpem iumi for lusim wei for heit. Luk for chance for showim olketa wei hia and associate witim olketa wea laek for garem olketa gud wei olsem tu. Olketa fren olsem savve “encouragem [iu] for showimaot love and duim olketa gudfala samting.”—Hebrew 10:24.

Experience—WALDO

Lusim Wei for Raf and Heit

Laef blo Waldo barava hard tumas taem hem growap, so datwan mekem hem garem wei for heit. Hem sei: “Staka taem mi savve faet witim olketa drug dealer . . . Wantaem, wanfala rabis gang haerem wanfala man wea savve killkill tumas for killim mi dae. Hem busam mi bat mi ranawe.”

Waldo no hapi taem waef blo hem start for studyim Bible witim Olketa Jehovah’s Witness. Hem sei: “Mi heitim olketa Witness and staka taem mi swear lo olketa. Nomata olsem, olketa evritaem tok kaen lo mi.”

Gogo, Waldo tu start for studyim Bible. Hem sei: “Hem no isi for mi followim wat mi lanem. Mi tingse bae hem hard nao for mi lusim wei for kros and raf.” Bat samting wea hem lanem from Bible barava helpem hem.

Waldo sei: “Wanday, study conductor blo mi Alejandro sei for mi readim Galatia 5:22, 23. . . . Alejandro explainim dat holy spirit blo God nomoa savve helpem mi for garem olketa wei hia. Datwan barava changem tingting blo mi!”

From Waldo trustim God, datwan nao helpem hem for lusim wei for heit. Hem sei: “Olketa relative and frens blo mi bifor tingse mi bae hard for change nao.” Hem sei moa: “Firstaem mi man for raf, bat Jehovah helpem mi for change and distaem mi stap gud witim olketa narawan.”