HAO FOR LUSIM WEI FOR HEIT

3 | Aotem Feeling for Heit

Wat Bible Teachim:

“Changem wei bilong iufala long wei for changem tingting, mekem iufala luksavve long samting wea God laekem iumi for duim, wea hem gudfala and stret and wea hem hapi long hem.”—ROME 12:2.

Wat Hem Minim:

Olketa samting wea iumi tingim hem important lo God. (Jeremaea 17:10) Iumi shud no talem toktok or duim samting wea showim iumi heitim narawan, and iumi shud duim nara samting tu. Feeling for heit hem start kam insaed mind and heart blo iumi. So if iumi garem feeling for heit, iumi shud kwiktaem duim samting for stopem datwan. Datwan nomoa savve helpem iumi for change and lusim wei for heit.

Wat Iu Savve Duim:

Trae for luksavve lo hao iu ting abaotem olketa narawan, especially olketa wea kam from difren kantri or garem difren kala skin. Tingim olketa kwestin hia: ‘Hao nao mi ting lo olketa? Hao, mi ting lo olketa followim wat miseleva savve lo hem abaotem olketa, or from mi ting daonem olketa?’ No lukluk lo social media, movie, or entertainment wea mekhae lo wei for raf and heit.

Bible savve helpem iumi for lusim wei for heit insaed mind and heart blo ium

Hem no isi for iumiseleva luksavve lo tingting and feeling blo iumi. Bat Bible savve helpem iumi for ‘luksavve long tingting bilong iumi, and samting wea heart hem laekem.’ (Hebrew 4:12) So gohed for studyim Bible. Comparem olketa teaching lo Bible witim olketa samting iu tingim and traem best for changem tingting blo iu followim wat Bible teachim. Bible savve helpem iumi for lusim wei for heit wea “strong tumas” insaed mind and heart blo iumi.—2 Corinth 10:4, 5.

Experience—STEPHEN

Changem Tingting blo Hem

Stephen and olketa lo famili blo hem kasem nogud samting from wei for heit from white pipol. Datwan mekem hem for joinim wanfala grup lo politik wea faet for raet blo pipol. Gogo, hem start for duim samting wea showim hem heitim olketa narawan. Stephen sei: “Wantaem mi and olketa fren blo mi watchim movie wea showim pipol treatim nogud olketa from Africa wea slave lo United States. Mifala kros tumas so mifala killim olketa whiteman pikinini lo datfala cinema. Then, mifala go lo ples wea olketa whiteman stap for killim olketa.”

Stephen changem tingting blo hem taem hem start for studyim Bible witim Olketa Jehovah’s Witness. Hem sei: “Mi lukim staka samting wea showim pipol wea garem difren kala skin heitim each other, bat Olketa Jehovah’s Witness duim samting wea mekem mi sapraes tumas. Olsem example, taem wanfala whiteman Witness go lo nara kantri, hem leavim fofala pikinini blo hem lo famili blo wanfala blakman for lukaftarem olketa. And tu, famili blo wanfala whiteman lukaftarem wanfala blak boy.” Stephen lukim olketa Witness olsem wanfala famili wea lovem each other. Diswan helpem hem for luksavve olketa hia nao showim tru love wea Jesus storyim.—John 13:35.

Wat nao helpem Stephen for lusim wei for raf and for heitim olketa narawan? Scripture lo Rome 12:2 nao helpem hem. Stephen sei: “Mi luksavve mi mas changem tingting blo mi mekem mi stap gud witim olketa narawan and garem gud laef.” Distaem, Stephen lusim feeling for heit for winim 40 years finis.