Gohed Strongim Love blo Iu for Jehovah and Olketa Narawan

1. Olketa wanem Bible truth nao iu lanem taem iu start for studyim Bible?

WASWE, iu tingim taem wea iu start for studyim Bible? Maet iu sapraes tumas taem iu lanem God hem garem nem. Masbi iu barava hapi for savve God no mekem pipol safa lo hellfire. And iu mas hapi tu for savve iu bae lukim moa olketa loved wan wea dae finis, and bae iufala stap tugeta moa lo paradaes lo earth.

2. From iu lanem finis olketa Bible truth, wat moa iu need for gohed impruv lo hem? (Ephesus 5:1, 2)

² Taem iu gohed studyim Bible, iu barava lovem go moa Jehovah. Datfala love hem mekem iu for laek followim wat iu lanem. Hem helpem iu for mekem gud disison followim olketa Bible principle. Attitude and wei blo iu tu hem impruv bikos iu laek for mekem God hapi. Olsem pikinini wea followim wei blo loving parents blo hem, iu followim wei blo Dadi blo iu lo heven.​—Readim Ephesus 5:1, 2.

3. Olketa wanem kwestin nao iumi savve askem iumiseleva?

³ Maet iumi savve askem iumiseleva olsem: ‘Waswe, mi barava lovem Jehovah distaem winim taem wea mi kamap Christian? Bihaen mi baptaes, waswe, mi barava followim tingting and wei blo Jehovah, especially for showimaot love lo olketa brata and sista?’ If “love wea iu garem long firstaem” hem no strong distaem, no discourage. Sem samting tu happen lo olketa first century Christian. Bat Jesus no givap lo olketa, and hem no givap lo iumi tu. (Rev. 2:4, 7) Hem savve bae iumi showim moa datfala love wea iumi garem taem iumi start for lanem truth.

4. Wat nao bae iumi storyim lo disfala article?

⁴ Lo disfala article, bae iumi storyim hao iumi savve gohed showimaot love for Jehovah and for olketa narawan. Bae iumi lanem tu samfala gud samting wea iumi and olketa narawan bae kasem, taem iumi gohed strongim love blo iumi.

GOHED STRONGIM LOVE BLO IU FOR JEHOVAH

5-6. Olketa wanem challenge nao Paul feisim taem hem duim ministry blo hem, bat wat nao helpem hem for gohed?

⁵ Aposol Paul hapi and satisfae taem hem duim waka blo Jehovah, bat hem feisim tu staka challenge. Staka taem Paul travel lo olketa farawe ples, and lo datfala taem datwan no isi. Lo olketa trip hia, samfala taem hem “stap long danger from olketa big river” and “olketa man for steal.” Samfala taem olketa enemy whipim hem nogud tu. (2 Cor. 11:23-27) And staka taem olketa brata and sista no appreciatim tu wat Paul duim for helpem olketa.—2 Cor. 10:10; Phil. 4:15.

⁶ Wat nao helpem Paul for gohed duim waka blo Jehovah? Paul lanem staka samting abaotem olketa wei blo Jehovah from olketa Holy Raeting and from olketa own experience blo hemseleva. Paul barava sure Jehovah God lovem hem. (Rome 8:38, 39; Eph. 2:4, 5) And datwan mekem hem barava lovem Jehovah go moa. Paul showimaot datwan taem hem “helpem olketa holy wan and gohed for duim datwan.”​—Heb. 6:10.

7. Wat nao wanfala wei for gohed strongim love blo iumi for Jehovah?

⁷ Iumi savve gohed strongim love blo iumi for God taem iumi studyim gud Bible. Taem iu readim Bible, trae for ting raonem wat nao diswan teachim mi abaotem Jehovah. Tingim diswan: ‘Hao nao disfala story showim Jehovah lovem mi? Wat nao mi lanem from disfala story wea mekem mi for lovem Jehovah?’

8. Hao nao prea savve gohed strongim love blo iumi for God?

⁸ Iumi savve gohed strongim love blo iumi for Jehovah tu taem iumi prea evritaem from heart. (Ps. 25:4, 5) Taem iumi duim olsem, Jehovah bae ansarem prea blo iumi. (1 John 3:21, 22) Wanfala sista lo Asia sei: “Firstaem, love blo mi for Jehovah hem base lo knowledge nomoa, bat datfala love hem strong go moa taem mi lukim hem ansarem olketa prea blo mi. Datwan mekem mi laek for duim samting wea mekem hem hapi.”

GOHED STRONGIM LOVE BLO IU FOR OLKETA NARAWAN

9. Hao nao Timothy showimaot hem lovem olketa brata and sista?

⁹ Samfala year bihaen Paul kamap Christian, hem meetim Timothy, wanfala young man wea lovem Jehovah and pipol. Paul talem kongregeson lo Philippi: “Mi no savve tingim eniwan wea olsem Timothy wea bae barava tingim and lukaftarem iufala.” (Phil. 2:20) Lo verse hia, Paul no storyim dat Timothy savve gud hao for organize or hem gud speaker, bat Paul barava tinghae lo Timothy bikos hem lovem olketa brata and sista. Masbi olketa kongregeson wea Timothy visitim luk forward for hem visitim olketa.​—1 Cor. 4:17.

10. Hao nao Anna and hasband showimaot tufala lovem olketa brata and sista?

¹⁰ Iumi tu savve tingim samfala samting wea iumi savve duim for helpem olketa brata and sista. (Heb. 13:16) Tingim experience blo Anna,b wea iumi storyim lo article bifor diswan. Bihaen wanfala big rain and strong wind, hem and hasband visitim wanfala Witness famili and faendaot ruf lo haos blo olketa hem damage. From datwan, famili no garem eni klin kaleko. Anna sei: “Mifala tekem olketa kaleko, wasim, ironim and foldim, then tekem go bak. For mitufala, datwan hem smol samting nomoa, bat hem mekem mifala barava fren gud kam kasem distaem.” From Anna and hasband lovem olketa brata and sista, tufala duim samting for help.​—1 John 3:17, 18.

11. (a) Taem iumi showimaot love lo olketa narawan, hao nao datwan affectim olketa? (b) Olsem Provebs 19:17 (SIPB) storyim, hao nao Jehovah ting lo love wea iumi showimaot lo olketa narawan?

¹¹ Taem iumi kaen and showimaot love lo olketa narawan, olketa bae luksavve iumi followim tingting and wei blo Jehovah. And samfala taem maet iumi no savve, bat olketa barava appreciatim gud samting wea iumi duim for olketa. Sista lo Asia wea iumi storyim finis no savve forgetim olketa wea helpem hem. Hem sei: “Mi tinghae tumas lo olketa sista wea savve tekem mi lo ministry. Olketa kam pikim mi, invaetem mi for snacks or lunch, and dropim mi bak lo haos. Distaem mi luksavve olketa waka hard for helpem mi, bikos olketa lovem mi.” Nomata olsem, no evriwan bae appreciatim wat iumi duim for help. Datfala sista sei olsem abaotem olketa wea helpem hem: “From olketa kaen tumas lo mi, mi wish nomoa mi savve duim samting tu for olketa, bat mi no savve wea nao evriwan stap distaem. Bat Jehovah lukim, and mi prea for hem nao changem bak wat olketa duim for mi.” Wat hem talem hem tru. Jehovah lukim nomata smol samting wea iumi duim for kaen lo olketa narawan. Hem ting lo datwan olsem best sakrifaes and kaon wea hem nao bae changem.​—Readim Provebs 19:17, SIPB.

12. Hao nao olketa brata savve showimaot olketa lovem olketa lo kongregeson? (Lukim tu olketa piksa.)

¹² Hao nao wanfala brata savve showimaot hem lovem olketa narawan and laek duim samting for help? Jordan, wanfala young brata askem wanfala elder abaotem wat moa hem savve duim for help lo kongregeson. Datfala elder praisem hem for olketa samting wea hem impruv lo hem finis, then hem givim samfala advaes lo hao for duim samfala samting moa. For example, hem encouragem Jordan for arrive early lo Kingdom Hall and greetim olketa narawan, koment lo meeting, joinim preaching grup evritaem, and ting abaotem wat hem savve duim for helpem narawan. Taem Jordan duim datwan, hem lanem hao for duim samfala niu samting, and tu, hem barava lovem go moa olketa brata and sista. Jordan luksavve taem wanfala brata kamap ministerial servant, hem no taem for start for helpem olketa narawan, bat hem taem for gohed helpem olketa.​—1 Tim. 3:8-10, 13.

13. Hao nao love helpem Brata Christian for qualify moa for elder?

¹³ Hao if iu wanfala ministerial servant or elder bifor? Jehovah no forgetim waka wea iu duim bifor and love wea iu garem for datwan. (1 Cor. 15:58) Hem lukim tu love wea iu gohed for showimaot. Brata Christian hem sorre tumas taem hem delete from elder. Nomata olsem, hem sei: “Mi disaed for duim best blo mi for servem Jehovah from mi lovem hem and no bikos mi kasem privilege for elder.” Gogo olketa appointim hem for elder moa. Christian sei: “Mi hol bak for kamap elder moa. Bat from mi luksavve Jehovah showimaot mercy lo mi finis and hem laekem mi for elder, bae mi duim bikos mi lovem hem and olketa brata and sista.”

14. Wat nao iumi lanem from experience blo wanfala sista from Georgia?

¹⁴ Pipol blo Jehovah duim samting tu for showimaot olketa lovem nara pipol. (Matt. 22:37-39) For example, Sista Elena wea stap lo Georgia sei: “Firstaem, only samting wea mekem mi laek for preach hem love blo mi for Jehovah. Bat taem love blo mi for Dadi blo mi lo heven kamap strong, love blo mi for pipol tu kamap strong. Mi trae for tingim hard taem wea olketa feisim and wat topic nao olketa interest lo hem. Taem mi gohed tingting olsem abaotem olketa, datwan mekem mi barava laek for helpem olketa.”​—Rome 10:13-15.

GUD SAMTING IUMI KASEM TAEM IUMI SHOWIMAOT LOVE LO OLKETA NARAWAN

15-16. Olsem olketa piksa showim, wanem gud samting nao iumi kasem taem iumi showimaot love?

¹⁵ Taem iumi showimaot love lo olketa brata and sista, olketa narawan tu bae kasem gud samting. Bihaen COVID-19 pandemic start, Brata Paolo and waef blo hem helpem staka olo sista for lanem hao for iusim electronic device blo olketa mekem olketa savve preach. Firstaem wanfala sista faendem hard for iusim device blo hem, bat gogo hem savve nao. Hem iusim for invaetem olketa relative for Memorial. Sixti lo olketa connect lo videoconferencing! From Paolo and waef blo hem duim samting for help, datfala sista and olketa relative blo hem kasem gud samting. Bihaen datfala sista raet go lo Paolo and sei: “Thankiu tumas for teachim mifala olketa olo. Mi bae no forgetim hao Jehovah kea for mifala and hao iutufala waka hard for helpem mifala.”

¹⁶ Paolo lanem important leson from olketa experience olsem. Hem luksavve hao love hem important winim knowledge or skill wea hem garem for duim samting. Hem sei: “Mi duim circuit waka bifor. Distaem mi luksavve nomata maet olketa pablisa forgetim olketa tok blo mi, bat olketa no forgetim olketa samting mi duim for helpem olketa.”

17. Hu moa bae kasem gud samting taem iumi showimaot love?

¹⁷ Taem iumi showimaot love lo olketa narawan, iumiseleva bae kasem gud samting wea iumi no expectim. Jonathan, wea stap lo New Zealand luksavve datwan hem tru. Lo wanfala hot Saturday aftanun, hem lukim wanfala pioneer brata preach seleva followim road. Jonathan disaed for waka tugeta witim datfala brata lo olketa Saturday aftanun. Lo datfala taem hem no luksavve hao hem bae kasem gud samting from hem helpem datfala pioneer. Jonathan sei: “Bifor datwan, mi nating enjoyim preaching waka. Bat taem mi lisin lo hao hem teach and lukim hao hem helpem staka lo ministry, datwan mekem mi barava laek for duim disfala waka. And tu, datfala brata kamap klos fren blo mi wea helpem mi lo spiritual wei, for enjoyim ministry, and for fren gud witim Jehovah.”

18. Wat nao Jehovah laekem iumi for duim?

¹⁸ Jehovah laekem iumi evriwan for strongim love blo iumi for hem and for olketa narawan. Olsem iumi lanem finis, iumi savve duim datwan taem iumi readim Bible, ting raonem, and prea evritaem lo Jehovah. Iumi savve strongim love blo iumi for olketa brata and sista taem iumi duim samting for helpem olketa. Taem iumi garem strongfala love, bae iumi fren klos witim Jehovah and olketa brata and sista. And bae iumi enjoyim frenship blo iumi for olowe!