Mas Brave and No Fraet Olsem Zadok

1-2. Hu nao Zadok? (1 Chronicles 12:​22, 26-28)

IMAGINIM wanfala big crowd blo winim 340,000 man. Olketa hipap for mekem David kamap king ovarem Israel. For thrifala day, olketa man hia hipap klosap lo Hebron, and olketa hapi, laflaf, story, and singsing for praisem Jehovah. (1 Chron. 12:39) Wanfala young man wea insaed datfala crowd, nem blo hem Zadok. Hem ordinary person nomoa. Bat, lo Jehovah hem spesol and Hem laekem iumi for savve dat Zadok hem lo there. (Readim 1 Chronicles 12:​22, 26-28.) Hu nao Zadok?

² Zadok hem wanfala priest wea waka klos witim Hae Priest Abiathar. And tu, Zadok hem wanfala seer wea God givim hem wisdom and ability for luksavve lo wat nao will blo Jehovah. (2 Sam. 15:27) Pipol savve kam lo Zadok for kasem wise advaes. And hem man wea brave and no fraet tu. Lo disfala article, bae iumi lane abaotem wei blo hem for brave and no fraet.

3. (a) Why nao olketa wea worshipim Jehovah need for brave and no fraet? (b) Wat nao bae iumi storyim lo disfala article?

³ During lo olketa last day distaem, Satan increasim go moa attak blo hem againstim pipol blo God. (1 Pet. 5:8) Iumi need for brave and no fraet taem iumi weitim Jehovah for distroem Satan and wicked system blo hem. (Ps. 31:24) Distaem bae iumi storyim thrifala wei wea iumi savve followim example blo Zadok for brave and no fraet.

SAPOTIM KINGDOM BLO GOD

4. Why nao pipol blo Jehovah need for no fraet for sapotim Kingdom blo hem? (Lukim tu piksa.)

⁴ Iumi pipol blo Jehovah sapotim Kingdom blo hem witim full heart, bat staka taem iumi need for brave for duim datwan. (Matt. 6:33) For example, bikos iumi stap insaed disfala wicked world, hem no isi for followim olketa standard blo Jehovah and for preachim gud nius abaotem Kingdom. (1 Thess. 2:2) And staka taem, man need for brave and no fraet for gohed neutral saed lo politik bikos tingting blo pipol lo world hem divaed. (John 18:36) Bikos pipol blo Jehovah no joinim politik or military activity, olketa safa taem olketa mas lusim selen, pipol killim olketa, or olketa go lo prison.

5. Why nao Zadok need for brave for sapotim David?

⁵ Zadok hem no just go lo Hebron for celebratem wei wea David kamap king. Hem tekem olketa weapon witim hem and redi for faet. (1 Chron. 12:38) Hem willing for sapotim David for faet and defendim Israel from olketa enemy. Nomata Zadok hem no wanfala warrior, hem barava brave.

6. Hao nao David hem gudfala example for Zadok followim? (Psalm 138:3)

⁶ Zadok hem wanfala priest, so wat nao mekem hem for brave? Hem associate witim olketa man wea strong and no fraet. For sure, example blo olketa helpem hem. For example, David no fraet for “leadim Israel go lo olketa faet,” datwan mekem olketa Israelite laek for sapotim hem witim full heart. (1 Chron. 11:​1, 2) David evritaem depend lo Jehovah for helpem hem faet againstim olketa enemy. (Ps. 28:7; readim Psalm 138:3.) Nara samting wea helpem Zadok, hem example blo olketa man olsem Jehoiada and warrior son blo hem, Benaiah, and 22-fala nara leader lo famili laen blo hem wea sapotim David. (1 Chron. 11:​22-25; 12:​26-28) Evri man hia barava sapotim wei wea David hem king.

7. (a) Wat nao samfala example blo olketa wea brave and no fraet distaem? (b) Olsem iumi lukim lo video, wat nao iu lanem from example blo Brata Nsilu?

⁷ Taem iumi tingim example blo olketa wea no fraet for sapotim rul blo Jehovah, datwan strongim and helpem iumi tu for no fraet. King blo iumi, Jesus Christ, hem strong for againstim pressure for involve insaed politik lo system blo Satan. (Matt. 4:​8-11; John 6:​14, 15) Hem evritaem depend lo Jehovah for strongim hem. Distaem tu, iumi garem example blo staka young man wea disaed strong for no joinim military or no join insaed olketa activity blo politik. Hem bae gud tumas for readim experience blo samfala olsem lo jw.org.a

HELPEM OLKETA BRATA AND SISTA

8. Wat taem nao olketa elder maet need for brave mekem olketa provaedem help for olketa brata and sista?

⁸ Pipol blo Jehovah laek for helpem each other. (2 Cor. 8:4) Nomata olsem, samfala taem man mas brave for duim datwan. For example, taem war hem happen, olketa elder luksavve olketa brata and sista needim encouragement, sapot, and maet olketa needim help for kasem olketa spiritual or physical need blo olketa. From olketa elder lovem olketa brata and sista, olketa putim laef blo olketa lo danger for provaedem wat olketa needim. (John 15:​12, 13) Taem olketa duim datwan, olketa followim example blo Zadok for no fraet.

9. Olsem iumi readim lo 2 Samuel 15:​27-29, wat nao David talem Zadok for duim? (Lukim tu piksa.)

⁹ Laef blo David stap lo danger. Son blo hem Absalom barava laek for kamap king and tekovarem kingdom blo hem. (2 Sam. 15:​12, 13) David need for lusim Jerusalem kwiktaem! Hem sei lo olketa servant blo hem: “Iumi mas lusim Jerusalem and ranawe!” (2 Sam. 15:14) Taem olketa start for lusim Jerusalem, David luksavve hem needim samwan for stay bak mekem datfala person savve updatem hem lo olketa plan blo Absalom. So David talem Zadok and olketa nara priest for stay bak lo Jerusalem mekem olketa savve report go bak lo hem. (Readim 2 Samuel 15:​27-29.) Olketa mas barava careful. Wat David talem olketa priest hia for duim maet riskim laef blo olketa and danger tumas. Imaginim sapos Absalom, wea hem bighed, raf, and no faithful, hem faendaot dat Zadok and olketa nara priest olketa spae blo David!

10. Wat nao Zadok and olketa narawan duim for protectim David?

¹⁰ David mekem wanfala plan witim Zadok and Hushai, wea hem nara loyal fren blo David. (2 Sam. 15:​32-37) Hushai followim datfala plan and mekem Absalom trustim hem. Hushai advaesem Absalom lo hao for attakim David, bat datwan givim chance for David redi for datfala attak. Then, Hushai talem Zadok and Abiathar abaotem datfala plan. (2 Sam. 17:​8-16) So tufala man hia pasim message go lo David. (2 Sam. 17:17) Witim help blo Jehovah, Zadok and olketa nara priest duim important waka for protectim David.—2 Sam. 17:​21, 22.

11. Hao nao iumi savve followim example blo Zadok for brave taem iumi helpem olketa brata and sista?

¹¹ If olketa askem iumi for helpem olketa brata and sista lo olketa dangerous taem, hao nao iumi savve showimaot wei for brave and no fraet olsem Zadok? (1) Followim direction. Lo taem olsem, hem barava important for iumi evriwan mas wan mind. Obeyim instruction from branch office lo kantri blo iu. (Heb. 13:17) Olketa elder shud evritaem reviewim olketa arrangement blo kongregeson for taem blo disaster, and taem wanfala disaster hem klosap for happen, olketa need for reviewim instruction from organization lo wat for duim. (1 Cor. 14:​33, 40) (2) Mas brave bat careful. (Prov. 22:3) Tingting gud bifor iu duim samting. No riskim laef nating. (3) Depend lo Jehovah. Remember, Jehovah barava interest lo safety blo iu and olketa brata and sista. Hem savve helpem iu for duim samting for mekem olketa brata and sista for sef.

12-13. Wat nao iu lanem from experience blo Viktor and Vitalii? (Lukim tu piksa.)

¹² Tingim example blo Viktor and Vitalii, tufala spiritual brata wea savve deliverim kaikai and wata for olketa brata and sista lo Ukraine. Viktor sei: “Mifala savve go evriwea for lukaotem kaikai. Staka taem, sutsut gohed lo ples wea mifala go lo hem. Wanfala brata donatem kaikai from stoa blo hem. For lelebet longtaem, kaikai hia nao olketa pablisa laef lo hem. Taem mifala loadim olketa kago insaed lo trak, wanfala rocket hem landing samting olsem 20 meter away from mifala. Lo datfala full day, mi gohed for askem Jehovah for helpem mi for brave mekem mi savve gohed helpem olketa pablisa.”

¹³ Vitalii sei: “Man need for barava brave and no fraet. First trip blo mifala hem tekem samting olsem 12 hours. Full taem mifala lo road, mi prea lo Jehovah.” Vitalii brave and no fraet, bat hem mas careful tu. Hem sei: “Mi gohed askem Jehovah for wisdom and for luksavve wat mi fit for duim. Mi only draev lo road wea gavman markem. Hem barava encouragem mi taem mi lukim olketa brata and sista waka tugeta. Olketa help for kliarem road, kolektem and loadim olketa relief supply, and provaedem kaikai and ples for mifala rest.”

GOHED LOYAL LO JEHOVAH

14. Hao nao iumi maet feel taem samwan wea iumi klos lo hem no loyal lo Jehovah?

¹⁴ Wanfala barava hard taem wea savve mekem iumi feel discourage tumas, hem taem wanfala klos fren or famili member lusim Jehovah. (Ps. 78:40; Prov. 24:10) Taem iu barava klos lo datfala person, bae hem moa hard for deal witim datfala situation. If iu mas deal witim sorre samting olsem, example blo wei wea Zadok loyal hem savve helpem iu.

15. Why nao Zadok need for brave for gohed loyal lo Jehovah? (1 Kings 1:​5-8)

¹⁵ Zadok gohed loyal lo Jehovah taem klos fren blo hem Abiathar chus for no loyal. Diswan happen taem David klosap for dae. Lo datfala taem, Adonijah trae for kamap king nomata Jehovah promis finis dat Solomon nao bae kamap king. (1 Chron. 22:​9, 10) Abiathar chus for sapotim Adonijah. (Readim 1 Kings 1:​5-8.) Taem Abiathar duim datwan, hem no loyal lo David and Jehovah tu! Tingim hao datwan mas mekem Zadok for feel nogud and sorre tumas. For winim 40 years, hem and Abiathar tufala priest wea waka klos tugeta. (2 Sam. 8:17) Tufala lukaftarem “Ark blo tru God.” (2 Sam. 15:29) Lo firstaem, tufala man hia sapotim rul blo David, and duim staka nara samting for Jehovah.—2 Sam. 19:​11-14.

16. Wat nao maet helpem Zadok for gohed loyal?

¹⁶ Zadok gohed loyal lo Jehovah nomata Abiathar no loyal. No enitaem David daotem dat Zadok hem loyal. Taem plan blo Adonijah showaot klia, David trustim Zadok, Nathan, and Benaiah for anointim Solomon olsem king. (1 Ki. 1:​32-34) Taem Zadok associate witim olketa wea loyal for worshipim Jehovah olsem Nathan and olketa narawan wea sapotim King David, datwan mas barava strongim and encouragem Zadok. (1 Ki. 1:​38, 39) Bihaen Solomon kamap king, hem appointim ‘Zadok for changem Abiathar.’—1 Ki. 2:35.

17. If samwan wea hem klos fren blo iu chus for no loyal lo Jehovah, hao nao iu savve followim example blo Zadok?

¹⁷ Hao nao iu savve followim example blo Zadok? If samwan wea hem klos fren blo iu, hem lusim Jehovah, duim samting for showimaot klia dat iu loyal lo Jehovah. (Josh. 24:15) Jehovah bae helpem iu for strong and no fraet. Gohed prea and fren klos witim olketa wea loyal for worshipim God. Jehovah tinghae lo wei wea iu loyal and hem bae rewardim iu.—2 Sam. 22:26.

18. Wat nao iu lanem from experience blo Marco and Sidse?

¹⁸ Tingim example blo Marco and waef blo hem, Sidse wea tufala gele blo tufala lusim truth. Marco sei: “Start from day wea olketa pikinini blo iu born, iu lovem olketa tumas. Iu bae willing for duim eni samting for protectim olketa. So taem olketa chus for lusim Jehovah, datwan hem sorre samting.” Hem sei tu: “Bat Jehovah hem stap witim mitufala. Hem mek sure taem mi feel wikdaon waef blo mi encouragem mi, taem waef blo mi feel wikdaon, mi encouragem hem.” Sidse sei: “Hard for mitufala gohed and no givap if Jehovah hem no givim mitufala strong wea mitufala needim. Mi sorre tumas and blamem miseleva for wei wea tufala gele blo mi lusim Jehovah, so mi storyim lo Jehovah. No longtaem bihaen, wanfala sista wea mi no lukim for staka year kam lo mi, putim hand blo hem lo shoulder blo mi, luk stret lo mi and sei, ‘Remember Sidse, no blamem iuseleva!’ So witim help blo Jehovah, mi fit for gohed hapi for worshipim Jehovah.”

19. Wat nao iu disaed strong for duim?

¹⁹ Jehovah laekem evriwan wea worship hem for brave and no fraet olsem Zadok. (2 Tim. 1:7) Bat, hem no laekem iumi for depend lo strong blo iumiseleva. Hem laekem iumi for depend lo hem. So taem iu insaed situation wea iu need for brave, luk lo Jehovah. Iu savve sure hem bae helpem iu for brave and no fraet olsem Zadok!—1 Pet. 5:10.