1924​—Wan Handred Year Go Finis

START FOR IUSIM RADIO FOR PREACH

For winim wan year finis, olketa brata lo Bethel gohed for wakem WBBR radio station lo Staten Island, New York City. Bihaen olketa kliarem datfala area, olketa wakem wanfala building for olketa wakaman stap insaed and narawan for olketa equipment. Taem datfala waka complete, olketa brata start for kolektem evri equipment wea olketa needim for broadcast “on air.” Bat, olketa feisim samfala challenge.

Wanfala challenge wea olketa feisim nao hem for apim datfala main antenna for radio station. Datfala antenna hem 91-meter-long (300-ft-long) and hem need for hange between tufala wooden post wea each wan hem 61 meter (200 ft) hae. Lo firstaem, olketa fail for apim datfala antenna. Nomata olsem, olketa brata gohed trustim Jehovah for helpem olketa and gogo olketa succeed. Calvin Prosser wea waka lo datfala project sei: “If lo firstaem mifala succeed for apim datfala antenna, bae mifala fit for sei, ‘Mifala nao ia!’” Bat olketa brata luksavve dat Jehovah nao helpem olketa. Then, olketa feisim nara challenge moa.

Radio broadcasting hem niu samting lo datfala taem, and hem no isi for kasem olketa equipment. Nomata olsem, gogo olketa brata faendem wanfala home-made 500-watt transmitter from samwan lo datfala ples. Instead for peim wanfala microphone, olketa iusim microphone blo telephone. Then, wan naet lo February, olketa brata disaed for testim evri equipment hia. Olketa no garem program for broadcastim, so olketa disaed for singim olketa Kingdom song. Ernest Lowe storyim wanfala fani samting wea happen taem olketa singsing, hem sei nomata Judge Rutherfordb hem stap farawe lo Brooklyn, wea hem samting olsem 25 kilometer (15 mi) hem herem singsing blo olketa lo radio, so hem ring kam.

Brata Rutherford sei olsem: “Iufala stop singsing. Iufala here olsem olketa puskat wea mek noes!” Kwiktaem nomoa olketa brata offem datfala transmitter, bat olketa hapi bikos olketa sure dat olketa redi nao for duim first broadcasting.

Lo February 24, 1924, during lo first official broadcast, Brata Rutherford dedicatem datfala radio station “for duim waka for sapotim kingdom blo Messiah.” Hem sei purpose blo disfala radio station hem for “helpem pipol for understandim spiritual laet wea kam from Bible nomata olketa garem difren religion or biliv, and hem helpem evriwan for luksavve lo barava important taem wea iumi stap lo hem.”

Datfala first broadcasting hem barava successful. And WBBR hem gohed for 33 years, hem nao main radio broadcasting station blo organization.

STRONG MESSAGE AGAINSTIM OLKETA BIGMAN BLO RELIGION

Lo July 1924, olketa Bible Student hipap lo wanfala convention lo Columbus, Ohio. Olketa delegate kam from evriwea lo world, and herem olketa tok lo olketa languis olsem Arabic, English, French, German, Greek, Hungarian, Italian, Lithuanian, Polish, Russian, Ukrainian, and olketa Scandinavian languis. Samfala part lo program olketa broadcastim lo radio, and olketa brata arrange for Ohio State Journal niuspepa for raetem article abaotem convention program each day.

Lo Thursday, July 24, winim 5,000 wea attendim convention go preach lo datfala day. Olketa givim aot winim 30,000 buk and startim staka thousand Bible study. The Watch Tower sei datfala day “hem wanfala happiest part blo convention.”

Nara interesting samting kamap lo Friday, July 25. Brata Rutherford readim wanfala announcement wea talem strongfala message againstim olketa bigman blo religion. Hem presentim datfala message olsem wanfala legal document wea accusim olketa politikol, religious, and commercial leader, and sei hao “olketa stopem pipol for lanem truth abaotem wat God provaedem for sevem laef blo olketa.” And tu, datfala message tok againstim hao olketa man hia “sapotim datfala League of Nations and sei datwan hem ‘representim kingdom blo God lo earth.’” Olketa Bible Student mas no fraet for talemaot disfala message lo pipol.

For reviewim olketa gud samting wea kamap lo datfala convention The Watch Tower hem sei: “Smol army blo Lord wea hipap lo datfala Columbus Convention kasem strong for gohed faithful . . . , and for deal witim eni samting wea olketa enemy duim for againstim olketa.” Leo Claus, wea attendim datfala convention sei: “Afta datfala convention, mifala hapi and strong for sharem datfala message lo territory blo mifala.”

Lo October, olketa Bible Student start for distributim staka million copy blo datfala tract Ecclesiastics Indicted, wea hem nao printed copy blo datfala message wea Brata Rutherford talemaot. Lo wanfala smol taon lo Cleveland, Oklahoma, Frank Johnson distributim olketa tract hia, then hem mas weit for 20 minute bifor olketa nara pablisa kam for pikim hem. Samfala man lo datfala taon kros bikos hem preach, and olketa lukaotem hem, so hem no fit for weit lo eni klia ples. Brata Johnson disaed for haed insaed lo wanfala church wea stap klosap. Taem hem go insaed lo church no eniwan lo there, so hem putim copy blo Ecclesiastics Indicted lo Bible blo bigman blo church blo olketa and lo evri chair. Then hem kwiktaem go aot from datfala church. From hem still garem taem yet, hem go lo nara tufala church moa and duim sem samting.

Frank kwiktaem go bak lo ples wea olketa arrange for pikim hem. Hem haed bihaen lo wanfala fuel station, and hem gohed for watch aot for olketa man wea lukaotem hem. Olketa man hia draev go pas, bat no lukim hem. No longtaem bihaen, olketa nara pablisa finis preaching and arrive kam for pikim Frank, then olketa draev go nao.

Wanfala brata tingim bak wat happen and sei: “Taem mifala redi for lusim taon, mifala go pas lo thrifala church. Samting olsem 50 pipol nao standap front lo each church. Samfala gohed for readim datfala tract, and olketa narawan holem ap for bigman blo olketa lukim. Mifala lusim ples hia lo barava raet taem! Mifala thankiu lo Jehovah God blo mifala bikos hem protectim and givim mifala wisdom for winim olketa enemy blo Kingdom.”

EVRIWEA LO WORLD OLKETA NO FRAET FOR PREACH

Lo olketa nara kantri, olketa Bible Student followim sem wei for no fraet for preach. Lo northern France, Józef Krett hem preach lo olketa immigrant wea kam from Poland for waka lo mining company. Hem bae givim wanfala tok wea title blo hem, “The Resurrection of the Dead Soon.” Taem olketa givimaot invitation for pipol lo datfala taon, wanfala priest stopem olketa member lo church blo hem for no attend. Bat opposite samting nao happen. Winim 5,000 pipol kam for lisin lo datfala tok, includim datfala priest! Brata Krett invaetem datfala priest for defendim biliv blo hem, bat priest hia les. Brata Krett givimaot evri literature wea hem garem and hem luksavve pipol hia barava thirsty for Word blo God.—Amos 8:11.

Lo Africa, Claude Brown tekem go gud nius lo Gold Coast, wea distaem hem Ghana. Olketa Bible tok and literature wea hem givimaot barava help for kwiktaem spredim truth lo datfala kantri. John Blankson, wea hem skul for kamap wanfala pharmacist, attendim wanfala tok blo Brata Brown. Hem kwiktaem luksavve dat hem faendem truth. John sei: “Mi hapi tumas for faendem truth and mi storyim datwan lo skul.”

Wanday, bihaen John lanem dat Trinity hem no wanfala Bible teaching, hem go lo Anglican church for kwestinim priest abaotem datwan. Priest raosem hem and singaot olsem: “Iu no wanfala Christian, iu blo Devil. Iu go aot from hia!”

Taem John kasem haos, hem raetem wanfala leta go lo datfala priest for askem priest hia for defendim teaching blo Trinity lo wanfala pablik hipap. Datfala priest reportim hem lo main lecturer blo pharmacy skul, and lecturer hia kolem John kam lo office and ask if hem raet go lo datfala priest.

John sei: “Yes Sir, mi duim datwan.”

Datfala lecturer talem John for mas raet and sei sorre lo datfala priest. So John hem raet and sei olsem:

“Sir, instructor blo mi sei mi mas raet kam and sei sorre lo iu and mi willing for sei sorre if iu willing for agree dat iu teachim olketa false teaching.”

Datfala lecturer sapraes and sei: “Blankson, hem nao wat bae iu raetem?”

“Yes Sir. Hem nomoa wat mi savve talem.”

“Sapos olsem iu bae expel from skul. Hao kam nao iu tok againstim wanfala priest blo church blo gavman, then iu expectim for gohed skul lo skul blo gavman?”

Bat, Sir, . . . taem iu teachim mifala and mifala no understandim samfala point, hao, mifala no allowed for askem iu eni kwestin?”

“Nomoa, iufala savve askem.”

“Well, Sir, hem nomoa wat happen. Disfala man hem teachim Bible lo mifala and mi askem hem wanfala kwestin. If hem no fit for ansarem datfala kwestin, why nao mi shud raet for sei sorre lo hem?”

Blankson hem no expel from skul. And tu, hem no need for raetem leta for sei sorre.

LUK AHED FOR WAT BAE KAMAP

For reviewim waka wea gohed lo datfala year, The Watch Tower hem sei: “Iumi barava agree witim wat David hem sei: ‘Iu bae redyim mi mekem mi strong for faet.’ (Psalm 18:39) Disfala year hem wanfala barava encouraging year bikos iumi lukim hand blo Lord lo staka waka blo iumi . . . Olketa wea dedicate lo God . . . barava hapi for preachim gud nius.”

Lo end blo datfala year, olketa brata mekem plan for expandim ministry lo radio. Olketa start for wakem nara radio station klosap lo Chicago. Disfala niu radio station hem garem kol-saen wea nem blo hem barava fitim, wea hem nao WORD. From olketa iusim wanfala 5,000-watt transmitter, WORD savve transmitim Kingdom message for staka handred miles, even kasem Canada wea stap lo north.

Year 1925 hem nara interesting year, bikos Jehovah provaedem olketa barava interesting niu spiritual laet, wea helpem olketa Bible Student for understandim Revelation chapter 12. Disfala niu understanding mekem samfala lo datfala taem for stambol. Bat staka narawan, olketa hapi for lanem wat hem happen lo heven and hao datfala niu understanding hem affectim pipol blo God lo earth.