“Askem Olketa Elder” for Help

1. Hao nao Jehovah showim dat hem lovem olketa sheepsheep blo hem?

JEHOVAH barava lovem olketa wea servem hem and kea for olketa olsem shepherd wea kea for olketa sheepsheep blo hem. Hem baem olketa witim blood blo Jesus and hem markem olketa elder lo kongregeson for lukaftarem olketa. (Acts 20:28) God laekem olketa elder for treatim gud sheepsheep blo hem. Anda lo leadership blo Christ, olketa savve strongim and protectim olketa sheepsheep from spiritual danger.—Isa. 32:​1, 2.

2. Hu nao olketa wea Jehovah barava interest lo hem? (Ezekiel 34:​15, 16)

² Jehovah hem barava tingim evri sheepsheep blo hem, bat hem especially kea for olketa wea safa. Hem iusim olketa elder for helpem olketa wea safa lo spiritual wei. (Readim Ezekiel 34:​15, 16.) Nomata olsem, Jehovah laekem iumi for askem help lo taem wea iumi needim. Lo taem wea iumi needim help, iumi savve barava prea strong lo God for help blo hem, and askem help from “olketa shepherd and olketa man for teach” lo kongregeson.—Eph. 4:​11, 12.

3. Taem iumi story raonem waka blo olketa elder, hao nao datwan savve helpem iumi evriwan?

³ Lo disfala article, bae iumi storyim arrangement blo God for iumi kasem spiritual help from olketa elder. Bae iumi kasem ansa for olketa kwestin hia: Wat taem nao iumi shud askem olketa elder for help? Why nao iumi shud duim datwan? And hao nao olketa savve helpem iumi? Even if iumi maet no needim help distaem, ansa for olketa kwestin hia bae helpem iumi for barava appreciatim arrangement blo God, and maet wanday datwan savve sevem laef blo iumi.

WAT TAEM NAO IUMI SHUD “ASKEM OLKETA ELDER” FOR HELP?

4. Hao nao iumi savve dat James 5:​14-16, 19, 20 hem storyim olketa wea sik lo spiritual wei? (Lukim tu piksa.)

⁴ Disaepol James storyim arrangement blo God for kasem spiritual help taem hem sei: “Hao, eniwan lo iufala hem sik? Hem mas askem olketa elder lo kongregeson for helpem hem.” (Readim James 5:​14-16, 19, 20.) Context showim dat James story abaotem olketa wea sik lo spiritual wei. For example, hem sei man wea sik mas askem help from olketa elder, no from wanfala doctor. Nara samting wea showim diswan hem spiritual sik, hem bikos James story abaotem forgiveness for olketa sin. So, wat man need for duim taem hem sik lo spiritual wei, hem klosap semsem witim samting man need for duim taem hem sik lo physical wei. Taem man sik hem need for go lukim doctor, storyim sik blo hem, and followim advaes wea doctor givim. Lo sem wei tu, taem iumi sik lo spiritual wei, iumi shud go lo wanfala elder, storyim situation blo iumi, and followim eni kaonsel from Bible wea iumi kasem.

5. Hao nao bae iumi luksavve if iumi start for sik lo spiritual wei?

⁵ Datfala arrangement wea James chapter 5 storyim, encouragem iumi for go story witim olketa elder taem iumi feel dat spiritual saed blo iumi hem start for safa. Bat hem wise for iumi kasem help bifor situation blo iumi kamap serious and spoelem frenship blo iumi witim God! Iumi mas honest lo iumiseleva. Bible warnim iumi for no laea lo iumiseleva and tingse spiritual saed blo iumi hem gud nomoa. (Jas. 1:22) Samfala Christian lo Sardis bifor garem datkaen tingting, and Jesus warnim olketa abaotem spiritual situation blo olketa. (Rev. 3:​1, 2) Wanfala wei for chekim spiritual saed blo iumi, hem for comparem hao iumi feel abaotem worship blo iumi distaem, witim hao iumi feel abaotem datwan bifor. (Rev. 2:​4, 5) Iumi savve askem iumiseleva olketa kwestin hia: ‘Hao, mi still enjoyim Bible reading and for ting raonem? Hao, mi still savve prepare and attendim meeting evritaem? Hao, mi still enjoyim ministry olsem bifor? Hao, wat mi laekem and olketa samting mi garem nao tekem tumas taem blo mi?’ If ansa lo eni kwestin hia hem yes, datwan maet showim iumi garem wanfala wik point wea savve kamap worse if iumi no stretem datwan. If iumi hard for stretem datfala wik point seleva or datfala wik point mekem iumi for brekem finis standard blo God, iumi shud askem olketa elder for helpem iumi.

6. Wat nao olketa wea duim serious sin shud duim?

⁶ Bat, samwan wea duim wanfala serious sin, wea maet datwan savve mekem hem for aot from kongregeson, hem shud story witim wanfala elder. (1 Cor. 5:​11-13) Eniwan wea duim wanfala serious sin hem needim help for stretem bak frenship blo hem witim Jehovah. For Jehovah iusim ransom for forgivim iumi, iumi mas “duim olketa samting wea showimaot [iumi] repent.” (Acts 26:20) Wanfala samting wea showimaot iumi repent, hem nao for go story lo olketa elder if iumi duim wanfala serious sin.

7. Hu nao olketa narawan wea needim help blo olketa elder?

⁷ Olketa elder no helpem nomoa olketa wea duim serious sin, bat olketa helpem tu olketa wea wik lo spiritual wei. (Acts 20:35) For example, iu maet feel hem hard for iu faet againstim feeling for laek duim rong samting. Maet datwan hem hard go moa if iu samwan wea bin addict lo drug, lukluk lo pornography, or man for durong. No ting dat iu mas deal witim olketa challenge hia seleva. Iu savve disaed for story lo wanfala elder wea bae lisin lo iu, givim iu gud advaes, and helpem iu luksavve dat iu savve mekem Jehovah hapi taem iu gohed faet againstim olketa feeling for laek duim rong samting. (Eccl. 4:12) If iu feel discourage bikos iu still stragol witim olketa feeling olsem, olketa elder savve remindim iu dat wei wea iu feel olsem, hem showim dat iu no laek for spoelem frenship blo iu witim Jehovah and hem showim iu no ova tumas for trustim iuseleva.—1 Cor. 10:12.

8. Wat nao samfala situation wea iumi no need for go storyim lo olketa elder?

⁸ Iumi no need for go story lo olketa elder abaotem evri samting wea maet affectim spiritual saed blo iumi. For example, maet iu talem samting wea mekem wanfala brata or sista feel nogud, and maet iu no kontrolem tu kros blo iu. Winim wei for go story lo elder, iu savve followim kaonsel blo Jesus for mek peace witim datfala brata or sista. (Matt. 5:​23, 24) Iu savve duim research abaotem olketa subject olsem mildness, patient, and for kontrolem seleva mekem iu savve followim gud olketa quality hia lo future. Bat, if hem still hard for iu solvem datfala problem, iu savve askem wanfala elder for helpem iu. Lo leta blo aposol Paul for olketa lo Philippi, hem askem wanfala brata wea Bible no talem nem blo hem for helpem Euodia and Syntyche for solvem raoa blo tufala, and maet wanfala elder lo kongregeson blo iu savve duim sem samting for helpem iu.—Phil. 4:​2, 3.

WHY NAO IUMI SHUD ASKEM OLKETA ELDER FOR HELP?

9. Why nao iumi shud no letem wei for shame stopem iumi for askem help from olketa elder? (Proverbs 28:13)

⁹ Iumi needim faith and courage mekem iumi savve askem help from olketa elder taem iumi duim wanfala serious sin or taem iumi faendem hem hard for faet againstim feeling for laek duim rong samting. Iumi shud no letem wei for shame stopem iumi for askem help from olketa elder. Why nao olsem? Taem iumi followim arrangement blo Jehovah, iumi showim dat iumi trustim hem and olketa instruction blo hem for helpem iumi for gohed strong and healthy lo spiritual wei. And iumi luksavve, iumi needim help blo hem taem iumi klosap for foldaon. (Ps. 94:18) And if iumi duim sin, bae iumi kasem mercy from God if iumi confessim sin blo iumi and stop for duim datwan.—Readim Proverbs 28:13.

10. Wat nao savve happen if iumi trae for haedem sin wea iumi duim?

¹⁰ Iumi savve kasem gud samting taem iumi story lo wanfala elder lo taem wea iumi needim help, bat if iumi trae for haedem sin wea iumi duim, bae situation blo iumi kamap worse. Taem King David trae for haedem olketa sin blo hem, datwan barava affectim feeling, spiritual saed, and physical saed blo hem tu. (Ps. 32:​3-5) Taem man sik or garekil and no kwiktaem kasem treatment wea hem needim, sik blo hem bae kamap worse. Lo sem wei tu, taem iumi duim serious sin and no kasem help, situation blo iumi savve kamap worse. Jehovah luksavve lo datwan dastawe hem askem iumi for “stretem olketa samting” between iumi and hem thru lo arrangement wea hem markem for iumi kasem spiritual healing.—Isa. 1:​5, 6, 18.

11. If iumi haedem olketa serious sin, hao nao datwan savve affectim olketa narawan?

¹¹ If iumi haedem olketa serious sin, datwan savve affectim olketa narawan. Iumi bae blokem flow blo holy spirit blo God for full kongregeson and hem savve spoelem peace wea iumi garem midolwan olketa brata and sista. (Eph. 4:30) And tu, if iumi savve dat samwan hem duim serious sin, iumi shud encouragem hem for go story lo olketa elder abaotem datwan.a Taem iumi haedem serious sin wea samwan duim bae iumi tu guilty lo datwan. (Lev. 5:1) Love blo iumi for Jehovah shud muvim iumi for no haedem datfala sin, bat go and storyim lo olketa elder. Taem iumi duim olsem, iumi help for keepim kongregeson klin and iumi helpem datfala man wea duim sin for fren bak moa witim Jehovah.

HAO NAO OLKETA ELDER SAVVE HELPEM IUMI?

12. Hao nao olketa elder savve helpem olketa wea wik lo spiritual wei?

¹² Bible talem olketa elder for sapotim olketa wea wik lo spiritual wei. (1 Thess. 5:14) If iu duim sin, olketa savve askem samfala kwestin for helpem iu talem tingting and feeling blo iu. (Prov. 20:5) Nomata maet iu no feel free for story bikos lo culture blo iu, iu no man for story, or iu shame for tok abaotem wat nao happen, iu savve helpem olketa elder if iu storyim klia situation blo iu. No fraet for story nomata iu feel olsem toktok blo iu hem here “karangge.” (Job 6:3) Olketa elder bae no kwiktaem mekem eni disison, bat olketa bae traem best for lisin gud and savve lo full story bifor olketa givim iu eni kaonsel. (Prov. 18:13) Olketa luksavve for lukaftarem sheepsheep hem savve tek taem, so maet olketa need for story witim iu staka taem for helpem iu lo situation blo iu.

13. Hao nao prea and advaes from Bible wea olketa elder givim, savve helpem iumi? (Lukim tu piksa.)

¹³ Taem iu askem olketa elder for help, olketa bae traem best for no mekem iu feel guilty go moa. Bat, olketa bae prea for iu. Maet iu bae sapraes lo hao prea blo olketa hem “garem paoa and hem savve barava helpem” iu. Olketa bae helpem iu tu taem olketa “putim oil lo [iu] lo nem blo Jehovah.” (Jas. 5:​14-16) Disfala “oil” hem minim truth from Word blo God. Olketa elder savve iusim gud olketa Scripture for comfortim iu, and helpem iu for fren bak moa witim Jehovah. (Isa. 57:18) Advaes from Bible wea olketa givim savve helpem iu for disaed strong for gohed duim stret samting. Thru lo olketa elder, iu savve herem voice blo Jehovah, wea sei: “Diswan nao road. Wakabaot followim.”—Isa. 30:21.

14. Olsem Galatians 6:1 storyim, hao nao olketa elder savve helpem eniwan wea “start for go difren”? (Lukim tu piksa.)

¹⁴ Readim Galatians 6:1. Taem wanfala Christian “start for go difren,” datwan minim hem no wakabaot followim olketa raeteous standard blo God. Maet hem mekem wanfala disison wea no wise or duim wanfala serious sin. Love muvim olketa elder for “trae for stretem man hia . . . witim mildness.” Greek word wea olketa transleitim olsem “stretem,” hem wanfala word wea olketa savve iusim for describem taem doctor stretem bak bone wea miss mekem datfala person hem no disable. Olsem wanfala gud doctor wea traem best for mekem patient for no feel pain tumas taem hem stretem bone wea brek, olketa elder tu traem best for no addim eni pain taem olketa trae for healim spiritual sik blo iumi. Bible remindim olketa elder tu for “lukluk gud lo [olketa] seleva.” Taem olketa gohed helpem iumi for stretem gogo blo iumi, olketa luksavve dat olketa tu no perfect and isi for go difren. Winim wei for ting dat olketa nao gud or raeteous, or garem wei for judgem narawan, olketa traem best for tingim feeling blo narawan.—1 Pet. 3:8.

15. Wat nao iumi savve duim if iumi garem wanfala problem?

¹⁵ Iumi savve trustim olketa elder lo kongregeson blo iumi. Olketa kasem training for keepim confidential eni information abaotem problem blo iumi, and for givim kaonsel wea kam from Bible winim for talem tingting blo olketa seleva, and for gohed helpem iumi for deal witim problem blo iumi. (Prov. 11:13; Gal. 6:2) Wei blo evri elder hem difren, samfala garem moa experience winim olketa narawan. Nomata olsem, iumi savve feel free for story witim eni elder abaotem problem blo iumi. Bat, iumi no laek for go askem advaes lo wanfala elder then go lo nara elder moa, just bikos iumi laek faendem elder wea bae talem samting wea iumi laek for herem. If iumi duim datwan, iumi olsem olketa wea laekem samwan for “tikolem ear blo olketa,” winim for lanem “teaching wea stret” lo Word blo God. (2 Tim. 4:​3, ftn.) Taem iumi go story lo wanfala elder abaotem problem blo iumi, maet hem bae askem iumi if iumi storyim finis datwan lo olketa nara elder and askem wat kaen advaes nao olketa givim. And from datfala elder hem hambol, maet datwan muvim hem for askem advaes from wanfala nara elder.—Prov. 13:10.

EACH WAN LO IUMI GAREM RESPONSIBILITY

16. Wat nao responsibility blo each wan lo iumi?

¹⁶ Nomata olketa elder lukaftarem iumi from iumi olketa sheepsheep blo God, olketa bae no talem iumi wat for duim. Each wan lo iumi garem responsibility for obeyim God lo evri samting lo laef blo iumi. Iumiseleva mas givim ansa lo God for eni samting wea iumi talem and duim. From God hem sapotim iumi, iumi savve gohed for faithful. (Rom. 14:12) So winim wei for olketa elder talem iumi wat for duim, olketa bae showim iumi insaed lo Bible wat nao tingting blo God. Taem iumi followim kaonsel wea olketa givim from Bible, iumi savve trainim tingting blo iumi “for luksavve lo samting” for helpem iumi mekem olketa wise disison.—Heb. 5:14.

17. Wat nao iumi shud disaed strong for duim?

¹⁷ Hem wanfala spesol privilege for iumi kamap olketa sheepsheep blo Jehovah! Jehovah sendem kam Jesus, datfala “nambawan shepherd,” for peim ransom for iumi mekem iumi garem chance for laef olowe. (John 10:11) And Jehovah iusim olketa elder lo Christian kongregeson for fulfillim disfala promis blo hem: “Mi bae givim iufala olketa shepherd wea bae duim samting followim will blo mi, and olketa bae feedim iufala witim knowledge and wei for minim samting.” (Jer. 3:15) Taem iumi wik or sik lo spiritual wei, iumi shud no hol bak for askem olketa elder for helpem iumi. Iumi laek for disaed strong for barava kasem gud samting from wei wea Jehovah provaedem olketa elder lo kongregeson.