Jehovah Nao Mekem Iumi for “Barava Hapi”

1-2. (a) Wat nao olketa situation wea staka pipol feisim distaem? (b) Wat nao bae iumi discussim lo disfala article?

IUMI stap lo world wea pipol aftarem nomoa samting wea mekem olketa seleva hapi. Bat, hapi wea olketa kasem hem for lelebet taem nomoa. And really, staka pipol barava feel emti and sorre. Samtaems pipol blo Jehovah feel olsem tu. Bikos iumi stap lo “olketa last day,” iumi expectim dat iumi bae feisim olketa situation and feeling wea “hard tumas” for deal witim.—2 Tim. 3:1.

² Lo disfala article, bae iumi discussim wat nao savve stealim hapi blo iumi and hao iumi savve kasem bak datwan if iumi lusim. Bat first, iumi mas luksavve trufala hapi hem kam from Hu.

TRUFALA HAPI KAM FROM JEHOVAH

3. Wat nao creation teachim iumi abaotem Jehovah? (Lukim tu piksa.)

³ Jehovah hem evritaem hapi. And hem laekem iumi tu for hapi. Iumi savve lukim datwan lo olketa creation blo hem, olsem beautiful planet earth blo iumi, staka difren kala wea iumi lukim, olketa fani samting wea olketa animal duim, and staka naes kaikai. God barava lovem iumi and laekem iumi for enjoyim laef!

Baby elephant: Image © Romi Gamit/Shutterstock; penguin chicks: Vladimir Seliverstov/500px via Getty Images; baby goats: Rita Kochmarjova/stock.adobe.com; two dolphins: georgeclerk/E+ via Getty Images

4. (a) Hao nao Jehovah gohed for hapi nomata hem lukim safaring wea gohed lo world? (b) Wat nao present wea Jehovah givim iumi? (Psalm 16:11)

⁴ Nomata Jehovah hem “datfala hapi God,” hem barava minim bigfala sorre and safaring wea gohed lo world distaem. (1 Tim. 1:11) Bat hem no letem datwan for spoelem hapi blo hem. Hem savve wei for safa hem for lelebet taem nomoa. Hem markem finis taem wea bae hem finisim datwan. And hem gohed patient go kasem taem wea hem bae barava finisim evri wei for safa and sorre. Go kasem datfala taem, Jehovah minim wat iumi gohed for deal witim and laek for helpem iumi. Hao nao hem duim datwan? Hem givim iumi hapi, wea hem wanfala present. (Readim Psalm 16:11.) Lukim hao hem givim datfala present lo Son blo hem, Jesus.

5-6. Why nao Jesus hem barava hapi?

⁵ Lo evri creation, Jesus nao hem hapi winim eni nara creation blo Jehovah. Why? Tingim tufala reason hia. (1) “Hem image blo datfala God wea no eniwan savve lukim” and lo evri samting wea hem duim hem showimaot personality blo Dadi blo hem lo perfect wei. (Col. 1:15; lukim “happy” lo English study note lo 1 Timothy 6:15.) (2) Winim eni nara person, Jesus spendem staka taem witim Dadi blo hem, wea Hem nao Source blo wei for hapi.

⁶ Jesus evritaem kasem hapi from wei for duim eni samting wea Dadi blo hem askem hem for duim. (Prov. 8:​30, 31; John 8:29) And from Jesus faithful, Jehovah hapi lo hem and appruvim hem.—Matt. 3:17.

7. Hao nao iumi savve kasem trufala hapi?

⁷ Iumi tu savve kasem trufala hapi taem iumi fren klos witim Jehovah, wea Hem nao Source blo wei for hapi. Taem iumi spendem moa taem for lane abaotem Jehovah and followim olketa wei blo hem, iumi bae hapi go moa. Bae iumi hapi tu taem iumi duim will blo God and taem iumi savve dat hem appruvim iumi.a (Ps. 33:12) Bat hao if samfala taem iumi no feel hapi or maet datfala feeling for no hapi hem gohed for longtaem? Hao, diswan minim God no hapi lo iumi? Nomoa! Iumi no perfect and samfala taem iumi safa from pain, sorre, and depression. Jehovah luksavve lo datwan. (Ps. 103:14) Distaem bae iumi discussim wat nao savve stealim hapi blo iumi and hao iumi savve kasem bak datwan.

NO LETEM ENI SAMTING STEALIM HAPI BLO IU

8. Hao nao olketa problem lo laef savve affectim iumi?

⁸ (1) Olketa problem lo laef savve stealim hapi blo iumi. Hao, iu kasem persecution, natural disaster, wei for poor, sik, or olo? Taem iumi feisim olketa problem olsem, datwan savve stealim hapi blo iumi, especially taem datfala situation hem hard for iumi kontrolem. Bible talem tu “heart wea barava sorre hem mekem man feel daon tumas.” (Prov. 15:13) Babis, wanfala elder wea dadi and mami and brata blo hem dae insaed fofala year nomoa, hem sei: “Mi feel lonely and helples. Samfala taem, mi feel sorre tumas, bikos mi shud spendem moa taem witim parents and brata blo mi bifor olketa dae, bat mi no duim datwan bikos mi mas deal witim staka samting.” Olketa problem lo laef savve mekem iumi barava taed and discourage.

9. Wat nao savve helpem iumi for kasem bak hapi blo iumi? (Jeremiah 29:​4-7, 10)

⁹ Wat nao savve helpem iumi for kasem bak hapi blo iumi? Iumi savve kasem bak hapi taem iumi acceptim situation blo iumi and tinghae lo wat iumi garem. World promotim disfala idea dat for iumi hapi, evriting lo laef hem mas perfect. Bat diswan hem no tru. For example, Jehovah talem olketa Jew wea stap olsem prisoner lo Babylon for acceptim niu laef blo olketa lo datfala ples and traem best for hapi nomata laef hem no isi. (Readim Jeremiah 29:​4-7, 10.) Wat nao leson? Traem best for acceptim situation blo iu, and hapi lo olketa gud samting wea iu garem. Remember, Jehovah bae gohed for helpem iu. (Ps. 63:7; 146:5) Sista Effie, wea paralaes from wanfala accident sei: “Mi kasem staka help and sapot from Jehovah, famili blo mi, and kongregeson. So mi feel if mi givap, datwan showim mi no tinghae lo help wea mi kasem. Mi laek for showim thankiu blo mi lo Jehovah and olketa brata and sista for big help blo olketa.”

10. Why nao iumi savve barava hapi nomata taem iumi feisim olketa problem?

¹⁰ Even taem laef hem no mas gud or taem olketa nogud samting happen lo iumi or famili blo iumi, iumi still savve barava hapi.b (Ps. 126:5) Why? Bikos hapi blo iumi no depend lo situation blo iumi. Maria, wanfala pioneer sista, sei: “Taem iu feisim olketa problem, for gohed hapi hem no minim dat iu bae no krae or talem feeling blo iu. Bat, hem minim dat iu no forgetim olketa promis blo Jehovah. Dadi blo iumi bae helpem iumi for gohed keepim hapi blo iumi.” Remember, nomata laef hem hard tumas distaem, evri problem blo iumi hem for lelebet taem, olsem olketa footprint lo sandbis. No longtaem nomoa sea bae wasim aot, and iu bae no lukim moa.

11. Hao nao example blo aposol Paul savve encouragem iu?

¹¹ Samfala taem maet iumi start for wonder, ‘Hao, olketa problem wea mi kasem hem minim Jehovah no hapi lo mi?’ If iu feel olsem, hem gud for tingim samfala faithful servant blo Jehovah wea feisim olketa barava hard situation. Tingim example blo aposol Paul. Jesus nao chusim hem for talemaot truth “lo olketa nation and lo olketa king and lo pipol blo Israel.” (Acts 9:15) Datwan hem spesol privilege! Nomata olsem, Paul kasem staka problem. (2 Cor. 11:​23-27) Hao, staka problem wea Paul kasem hem minim dat Jehovah no hapi lo hem? Nomoa! Wei wea Paul no givap hem showim dat Jehovah gohed for sapotim hem. (Rom. 5:​3-5) So ting abaotem situation blo iu. Iu tu gohed faithful nomata iu feisim staka hard taem. So iu tu savve barava sure dat Jehovah hapi lo iu.

12. Taem iumi no kasem wat iumi expectim, hao nao datwan savve stealim hapi blo iumi?

¹² (2) Taem man no kasem wat hem expectim, datwan savve stealim hapi blo hem. (Prov. 13:12) Love and wei wea iumi tinghae lo Jehovah hem motivatim iumi for markem olketa spiritual goal. Bat, if iumi markem olketa goal wea no fitim situation blo iumi, datwan savve mekem iumi feel wikdaon. (Prov. 17:22) Wanfala pioneer sista wea nem blo hem Holly sei: “Mi laek for attendim Skul for Olketa Kingdom Evangelizer, for go serve lo nara ples, or for waka lo Ramapo construction project. Bat situation blo mi change, and mi no fit nao for kasem olketa goal hia. Taem man laek for duim samting, bat hem hard, datwan savve mekem man barava feel nogud.” Staka servant blo Jehovah experiencem datwan.

13. If situation blo iumi mekem hem hard for duim samfala samting, wat nao samfala goal iumi savve markem?

¹³ Wat nao savve helpem iumi for kasem bak hapi blo iumi? Remember, Jehovah no savve demandim man. Hem no expectim iumi for duim wat iumi no fit for duim, and tu, hao Jehovah ting lo iumi no depend lo haomas samting iumi duim lo service blo hem. Jehovah laekem iumi for hambol for luksavve lo wat iumi fit for duim and for faithful. (Mic. 6:8; 1 Cor. 4:2) Samting wea important lo Jehovah, hem no wat iumi duim bat wat kaen man nao iumi. So hao, hem stret for iumi expect for duim moa samting winim wat Jehovah expectim iumi for duim?c Barava nomoa nao! Bat if situation blo iu mekem hem hard for duim wat iu laekem lo service blo Jehovah, trae focus lo wat iu fit for duim. Maet iu savve help for trainim olketa young wan or encouragem olketa olo brata and sista. Maet iu savve markem goal for encouragem samwan, maet lo phone, or even text message. Jehovah bae blessim iu witim hapi taem iu waka hard for kasem olketa goal wea iu fit for kasem! And tingim, klosap nao bae iumi garem staka chance lo niu world blo Jehovah for servem hem lo olketa wei wea hem winim wat iumi expectim! Sista Holly wea iumi storyim finis sei: “Mi savve stop and ting olsem, ‘Mi bae garem staka taem from mi bae laef olowe.’ Witim help blo Jehovah, lo niu world bae mi kasem olketa goal blo mi.”

14. Wat moa nara samting wea savve stealim hapi blo iumi?

¹⁴ (3) Wei for duim samting wea iumiseleva nomoa laekem savve stealim hapi blo iumi. Samfala iusim social media for promotim idea dat trufala hapi and wei for satisfae hem kam from wei for duim samting wea iuseleva nomoa laekem. Pipol savve encouragem wei for focus lo olketa hobby, shopping, and travel. Hem no rong for enjoyim olketa samting olsem. Jehovah creatim iumi for enjoyim olketa beautiful tings. Bat staka faendem dat olketa samting wea olketa tingse bae mekem olketa hapi, really hem stealim hapi blo olketa. Eva, wanfala pioneer sista, sei, “Taem iu focus nomoa lo olketa samting wea iuseleva laekem, bae iu no satisfae.” So wei for duim samting wea iumiseleva nomoa laekem, savve mekem iumi for feel emti.

15. Wat nao iumi savve lanem from King Solomon?

¹⁵ Iumi savve lane from experience blo King Solomon abaotem sorre samting wea kamaot from wei for duim samting wea man seleva nomoa laekem. Hem trae for kasem hapi from wei for satisfaem feeling blo hem, olsem for enjoyim olketa gud kaikai, naes music, and olketa expensive samting wea hem baem. Bat olketa samting hia nating mekem hem hapi, hem sei: “Eye hem lukim samting bat no satisfae. And ear tu hem herem samting bat no satisfae.” (Eccl. 1:8; 2:​1-11) Idea blo world abaotem wei for hapi hem olsem feik selen. Hem luk olsem hem garem value, bat hard for iu iusim for baem samting.

16. Hao nao wei for givim samting savve helpem iumi for kasem bak hapi blo iumi? (Lukim tu piksa.)

¹⁶ Wat nao savve helpem iumi for kasem bak hapi blo iumi? Jesus teachim iumi dat “bigfala hapi hem kam from wei for givim samting winim wei for kasem samting.” (Acts 20:35) Wanfala elder wea nem blo hem Alekos, sei: “Mi traem best for duim olketa smol samting for helpem olketa narawan. Evritaem mi give for olketa narawan, datwan helpem mi for no tingim miseleva tumas, and mi barava hapi.” Wat nao iu savve duim for olketa narawan? If iu lukim samwan hem stragol for deal witim laef, trae for encouragem hem. Maet iu no savve solvem problem blo hem, bat iu savve comfortim hem taem iu lisin gud and minim feeling blo hem, kaen, and remindim hem for torowem hevi blo hem lo Jehovah. (Ps. 55:22; 68:19) Iu savve helpem hem for luksavve tu dat Jehovah no lusim hem. (Ps. 37:28; Isa. 59:1) Maet iu savve duim samting for helpem hem, olsem for kukim kaikai for hem or for go wakabaot tugeta. Invaetem hem for joinim iu lo ministry, wea datwan bae encouragem hem. Letem Jehovah iusim iu olsem wanfala tul lo hand blo hem. Taem iumi focus lo olketa narawan winim iumiseleva datwan bae mekem iumi for kasem trufala hapi!—Prov. 11:25.

17. For kasem trufala hapi, wat nao iumi mas duim? (Psalm 43:4)

¹⁷ Iumi savve garem trufala hapi if iumi gohed for fren klos witim Dadi blo iumi lo heven. Bible promisim iumi dat Jehovah nao savve mekem iumi for “barava hapi.” (Readim Psalm 43:4.) So nomata wat kaen situation nao iumi feisim lo laef, iumi no need for fraet. Iumi laek gohed focus lo Jehovah, wea hem nao Source blo hapi blo iumi for olowe!—Ps. 144:15.