Remember for Prea for Olketa Narawan

1. Hao nao iumi savve olketa prea blo iumi hem important lo Jehovah?

PREA hem wanfala spesol present. Tingim: Jehovah assignim olketa angel for duim samfala waka. (Ps. 91:11) Hem givim tu Son blo hem olketa big responsibility. (Matt. 28:18) Bat hao, Jehovah assignim eniwan for lisin lo olketa prea? Nomoa, only Jehovah savve lisin lo olketa prea blo iumi. Jehovah nao “Man wea herem olketa prea” blo each wan lo iumi.—Ps. 65:2.

2. Wat nao iumi lanem from example blo Paul abaotem wei for prea for olketa narawan?

² Iumi savve feel free for story abaotem olketa wari blo iumi lo Jehovah, nomata olsem, iumi shud prea for olketa narawan tu. Aposol Paul duim datwan. For example, hem raet olsem lo kongregeson lo Ephesus: “Mi evritaem storyim iufala lo olketa prea blo mi.” (Eph. 1:16) And Paul savve prea tu for each person. For example, hem sei olsem lo Timothy: “Mi thankiu lo God, . . . No enitaem mi stop for tingim iu taem mi barava prea strong naet and day.” (2 Tim. 1:3) Paul garem olketa own wari blo hem wea hem savve prea abaotem. (2 Cor. 11:23; 12:​7, 8) Nomata olsem, hem spendem taem for prea for olketa narawan.

3. Wat nao savve mekem iumi for no prea for olketa narawan?

³ Samfala taem maet iumi forget for prea for olketa narawan. Why? Wanfala sista wea nem blo hem Sabrinaa storyim wanfala reason. Hem sei: “Laef savve busy tumas. Iumi savve wari tumas abaotem olketa own problem blo iumi, gogo iumi prea nomoa abaotem olketa need blo iumiseleva.” Hao, samfala taem iu olsem tu? If olsem, disfala article savve helpem iu. Hem bae (1) explainim why hem important for iu prea for olketa narawan and (2) bae hem storyim samfala idea lo hao iu savve duim datwan.

WHY NAO IUMI SHUD PREA FOR OLKETA NARAWAN?

4-5. Hao nao olketa prea blo iumi for narawan “hem garem paoa”? (James 5:16)

⁴ Wei for prea for olketa narawan “hem garem paoa and hem savve barava helpem pipol.” (Readim James 5:16.) Hao, wei for prea for olketa narawan hem savve really affectim situation blo samwan? Yes, hem savve affectim. Taem Jesus savve dat klosap aposol Peter bae denyim hem, hem sei: “Mi barava prea strong for iu mekem faith blo iu hem no wik.” (Luke 22:32) Paul tu luksavve prea savve affectim situation blo samwan. Nomata Paul no duim eni rong samting hem kamap wanfala prisoner lo Rome, lo datfala taem hem raet olsem lo Philemon: “Mi hope dat bae mi kam bak lo iufala bikos lo olketa prea blo iufala.” (Philem. 22; lukim English study note “for I am hoping that through your prayers.”) Then no longtaem bihaen datwan, Paul kamap free and hem continue for duim preaching waka blo hem.

⁵ Bat datwan no minim taem iumi prea, iumi forcem Jehovah for duim samting. Hem savve lo wat olketa servant blo hem wari abaotem, and samfala taem hem savve disaed for duim wat olketa askem. Taem iumi savve lo datwan, hem bae mekem iumi for prea strong lo Jehovah abaotem wanfala situation, and then iumi confident for leavim evriting lo hand blo hem.—Ps. 37:5; lukim 2 Corinthians 1:11 and olketa English study note.

6. Hao nao wei for prea for olketa narawan savve affectim feeling blo iumi for olketa? (1 Peter 3:8)

⁶ Wei for prea for olketa narawan hem helpem iumi for “kaen” and “tingim” olketa. (Readim 1 Peter 3:8.) Man wea kaen and tingim narawan, hem luksavve taem samwan safa and hem laek for helpem hem. (Mark 1:​40, 41) Wanfala elder wea nem blo hem Michael sei: “Taem mi prea for olketa narawan abaotem need blo olketa, mi luksavve wat olketa stragol witim and diswan strongim love blo mi for olketa. Mi feel klos lo olketa, nomata olketa no savve lo datwan.” Nara elder wea nem blo hem Richard storyim nara benefit. Hem sei: “Taem iumi prea for samwan, datwan bae motivatim iumi for laek duim samting for helpem hem.” Hem sei tu: “Taem iumi duim samting for datfala person wea iumi prea for hem, hem olsem iumi help for ansarem datfala prea blo iumi for hem.”

7. Hao nao wei for prea for olketa narawan helpem iumi for garem stret tingting abaotem olketa own problem blo iumi? (Philippians 2:​3, 4) (Lukim tu piksa.)

⁷ Wei for prea for olketa narawan savve helpem iumi for garem stret tingting abaotem olketa own problem blo iumi. (Readim Philippians 2:​3, 4.) Each wan lo iumi deal witim samfala hard samting bikos iumi stap lo world wea Satan nao kontrolem. (1 John 5:19; Rev. 12:12) Taem wei for prea for olketa narawan kamap habit blo iumi, datwan remindim iumi dat “olketa brata blo [iumi] evriwea lo world tu safa lo olketa sem samting wea [iumi] safa lo hem.” (1 Pet. 5:9) Wanfala pioneer wea nem blo hem Katherine sei: “Taem mi prea for olketa narawan, datwan remindim mi dat olketa tu feisim olketa challenge. Datwan helpem mi for no focus tumas lo olketa own problem blo mi.”

OLKETA NARAWAN NEEDIM PREA BLO IUMI

8. Hu nao iumi savve prea for olketa? Storyim example.

⁸ Hu nao iumi savve prea for olketa? Iumi savve prea for olketa didifren grup blo pipol. For example, olketa wea garem health problem, olketa young wan wea feisim hard taem lo skul, or olketa wea safa bikos olketa olo. Staka brata and sista mas deal witim wei wea olketa narawan againstim olketa, olsem famili member or gavman. (Matt. 10:​18, 36; Acts 12:5) Samfala brata and sista mas ranawe from haos blo olketa bikos lo politikol unrest. Samfala kasem natural disaster. Iumi maet no savve lo olketa brata and sista hia. Bat taem iumi prea for olketa, iumi showim dat iumi followim komand blo Jesus for “lovem” each other.—John 13:34.

9. Why nao iumi shud prea for olketa wea lead insaed organization blo Jehovah and olketa waef blo olketa?

⁹ Iumi savve prea tu for olketa wea lead insaed organization blo Jehovah. Olsem Governing Body and olketa helper blo olketa, olketa Branch Komiti, olketa overseer lo olketa branch office, olketa circuit overseer, olketa elder lo kongregeson, and olketa ministerial servant. Olketa brata hia waka hard for helpem iumi, and lo semtaem olketa mas deal witim own wari blo olketa tu. (2 Cor. 12:15) For example, wanfala circuit overseer wea nem blo hem Mark sei: “Wanfala big challenge wea mi feisim, hem taem mi stap farawe from parents blo mi wea olo. Tufala evriwan garem health problem. Nomata sista blo mi and hasband blo hem nao lukaftarem tufala, mi sorre tumas bikos mi no savve duim staka samting for helpem tufala.” Nomata iumi no savve lo wat olketa brata hia wea waka hard mas deal witim, hem gud for iumi tingim olketa lo prea blo iumi. (1 Thess. 5:​12, 13) And tu, iumi savve prea for olketa waef blo olketa brata hia wea loyal for sapotim hasband blo olketa for continue lo assignment blo olketa.

10-11. Hao, Jehovah hapi lo olketa prea wea iumi talem for olketa brata and sista? Explainim.

¹⁰ Olsem iumi storyim finis, staka taem iumi savve prea for didifren grup blo olketa brata and sista. For example, maet iumi no tingim wanfala specific person taem iumi prea, bat iumi maet askem Jehovah for helpem olketa wea stap lo prison or for comfortim olketa wea lusim loved wans blo olketa lo dae. Wanfala elder wea nem blo hem Donald sei, “Iumi garem staka brata and sista wea go thru lo hard taem, so samfala taem iumi savve talem wanfala prea wea olsem ambrela for kavarem evriwan wea safa.”

¹¹ Hao, Jehovah hapi lo olketa prea olsem? Yes! Really, hem hard for iumi savve lo specific need blo evri brata and sista. So hem fitim for iumi talem general prea for olketa didifren grup blo olketa brata and sista blo iumi. (John 17:20; Eph. 6:18) Olketa prea olsem showimaot iumi “lovem evri Christian brata” blo iumi.—1 Pet. 2:17.

TAEM IUMI PREA FOR EACH WAN

12. Hao nao wei for luksavve lo situation blo narawan savve helpem iumi for prea for olketa?

¹² Luksavve lo situation blo each wan. Nara samting wea iumi savve prea abaotem, hem nao for prea for each wan and talem nem blo olketa. Hao, samwan insaed kongregeson blo iu hem sik? Hao, wanfala young wan hem feel wikdaon, maet bikos lo pressure lo skul? Hao, wanfala singol parent stragol for givim “discipline and training wea kam from Jehovah” for pikinini blo hem? (Eph. 6:4) Wei for luksavve lo situation blo each wan, bae helpem iu for tingim narawan, and datwan bae strongim feeling blo iu for laek prea for olketa.b—Rom. 12:15.

13. Hao nao iumi savve prea for olketa wea iumi no savve lo olketa?

¹³ Talem nem blo man lo prea blo iu. Iumi savve duim datwan even for olketa wea iumi no meetim yet. For example, tingim olketa brata and sista blo iumi wea stap lo prison lo olketa kantri olsem Crimea, Eritrea, Russia, and Singapore. Lo jw.org, iu savve faendem nem blo olketa hia wea stap lo prison.c Wanfala circuit overseer wea nem blo hem Brian sei: “Mi faendem dat for raetem daon nem blo olketa brata and sista wea stap lo prison and then talem big, hem helpem mi for rememberim nem blo olketa and then mi savve talem nem blo olketa lo prea blo mi.”

14-15. Hao nao iumi savve mekem prea blo iumi hem specific?

¹⁴ Mekem prea blo iumi specific. Michael, wea iumi storyim finis sei: “Taem mi readim olketa story lo jw.org abaotem olketa brata blo iumi lo prison, mi trae for imaginim hao nao bae mi feel if mi nao insaed datfala situation. Mi savve mi bae wari abaotem waef blo mi, and bae mi laek for mek sure dat hem garem wat hem needim. Datwan hem helpem mi for specific taem mi prea for olketa brata blo iumi lo prison wea marit finis.”—Heb. 13:​3, ftn.

¹⁵ Taem iumi ting raonem laef blo olketa brata blo iumi lo prison, bae iumi luksavve lo samfala specific samting wea iumi savve prea abaotem. For example, iumi savve prea for olketa prison gard for kaen lo olketa and for olketa lo authority for letem olketa brata blo iumi for free for worship. (1 Tim. 2:​1, 2) Iumi savve prea tu for kongregeson blo olketa for kasem encouragement from example blo olketa faithful brata hia, or prea for olketa wea no worshipim Jehovah for luksavve lo gudfala wei blo olketa brata hia and lisin lo message blo iumi. (1 Pet. 2:12) Iumi savve duim sem samting tu taem iumi prea for olketa brata and sista blo iumi wea deal witim olketa nara hard taem. If iumi luksavve lo situation blo each wan, talem nem blo olketa lo prea, and prea specific for olketa, iumi showim dat love blo iumi for each other hem “kamap big.”—1 Thess. 3:12.

GAREM STRET TINGTING ABAOTEM PREA

16. Hao nao iumi savve garem stret tingting abaotem olketa prea blo iumi? (Matthew 6:8)

¹⁶ Olsem iumi lanem finis, olketa prea blo iumi savve affectim situation blo samwan wea iumi prea for hem. Nomata olsem, iumi need for garem stret tingting abaotem olketa prea blo iumi. Really, Jehovah savve finis abaotem olketa samting wea iumi prea abaotem, and iumi shud no advaesem hem lo hao for deal witim wanfala situation. Jehovah savve finis wat olketa servant blo hem needim, even bifor olketa, or iumi savve. (Readim Matthew 6:8.) So if olsem, why nao iumi shud prea for olketa narawan? Iumi storyim finis samfala reason lo disfala article, bat wanfala nara reason hem bikos iumi kea abaotem pipol. Love motivatim iumi for prea for each other. And Jehovah hapi for lukim olketa servant blo hem showimaot love olsem hem.

17-18. Wat nao wanfala example wea showim why iumi prea for olketa brata and sista?

¹⁷ Nomata hem maet luk olsem olketa prea blo iumi no affectim situation blo samwan, prea blo iumi showim iumi lovem olketa brata and sista, and Jehovah lukim datwan. Tingim disfala example: Imaginim wanfala famili wea garem tufala smol pikinini, wanfala boy and wanfala gele. Datfala boy hem sik and leidaon lo bed. Datfala gele sei olsem lo dadi blo hem: “Plis helpem brata blo mi. Hem barava sik!” Datfala dadi hem savve finis lo wat boy blo hem needim, hem lovem son blo hem and lukaftarem gud. Nomata olsem, datfala dadi hapi tumas for lukim hao gele blo hem kea abaotem brata blo hem dastawe hem askem dadi for helpem hem.

¹⁸ Datwan nao wat Jehovah laekem iumi for duim, for kea abaotem each other and prea for each other. Taem iumi duim olsem, olketa prea blo iumi showimaot iumi barava tingim olketa narawan and Jehovah lukim datwan. (2 Thess. 1:3; Heb. 6:10) And tu, olsem iumi storyim finis, samfala taem olketa prea blo iumi savve affectim situation blo samwan wea iumi prea for hem. Dastawe, iumi laek for duim best blo iumi for remember for prea for each other.