Tufala Niu Member blo Governing Body
LO OCTOBER 5, 2024, wanfala spesol announcement hem kamap lo annual meeting: Brata Jody Jedele and Jacob Rumph kasem appointment for kamap member lo Governing Body blo Olketa Jehovah’s Witness. Tufala brata hia gohed faithful for servem Jehovah for staka year.
Jody Jedele and waef blo hem Damaris
Brata Jedele hem born lo Missouri, U.S.A. and hem growap insaed lo truth. Famili blo hem stap klosap lo territory wea no staka Witness stap. From datwan, hem meetim staka brata from olketa difren baekgraon wea kam for helpem olketa for preachim gud nius. Love and wan mind wea olketa showimaot hem barava kasem heart blo hem. Hem baptaes taem hem teenager, lo October 15, 1983. Hem enjoyim ministry, and afta hae skul, hem start for regular pioneer lo September 1989.
Taem Brata Jedele hem young, parents blo hem savve tekem hem and sista blo hem for visit lo Bethel. Olketa visit hia encouragem tufala for markem goal for waka lo Bethel, and gogo tufala kasem datfala goal. Brata Jedele start waka lo Wallkill Bethel lo September 1990. Firstaem hem waka lo Klining Department and afta lo Medical Services.
During lo datfala taem, olketa Spanish-languis kongregeson hem start for staka and needim olketa brata. So Brata Jedele attendim wanfala Spanish-languis kongregeson and start for lanem Spanish. No longtaem bihaen, hem meetim Damaris, wanfala pioneer sista lo datfala circuit. Gogo, tufala marit, and Damaris kam waka lo Bethel tu.
Lo 2005, tufala lusim Bethel for go lukaftarem faithful parents blo tufala. During lo datfala taem, tufala serve olsem regular pioneer. Brata Jedele help for teach lo Pioneer Service Skul, and hem serve lo Hospital Liaison Komiti and Regional Building Komiti.
Lo 2013, Brata and Sista Jedele kasem invitation for go bak lo Bethel for sapotim construction project lo Warwick. Since dat taem, tufala serve tu lo Patterson and Wallkill. Brata Jedele hem waka lo Local Design/Construction Department and lo Hospital Information Services. Lo March 2023, hem kasem appointment for kamap helper blo Service Komiti. Taem hem ting bak lo olketa assignment wea hem kasem, hem sei: “Taem iu feisim niu assignment, samtaems iu savve fraet. Bat lo taem olsem iu need for remember dat iu mas depend lo Jehovah bikos hem nao man wea savve mekem iu fit for duim eniting wea hem laekem.”
Jacob Rumph and waef blo hem Inga
Brata Rumph hem born lo California, U.S.A. Taem hem smol, mami blo hem, hem inactive, nomata olsem mami blo hem traem best for teachim hem olketa truth from Bible. And tu, each year hem savve go visitim granmami blo hem, wea hem wanfala faithful Witness. Granmami blo hem helpem hem for interest lo truth, and taem hem 13 years old hem ask for wanfala Bible study. Lo September 27, 1992, taem hem teenager, hem baptaes. Gud samting nao, gogo mami blo hem kamap active moa and evriwan lo famili blo hem start for progress and gogo olketa baptaes.
Taem Brata Rumph hem young, hem lukim hapi wea olketa pioneer garem. So afta hem completim hae skul, hem start for pioneer lo September 1995. Lo 2000, hem muv go lo Ecuador for serve lo ples wea needim staka pablisa. Taem hem lo Ecuador, hem meetim Inga wanfala pioneer sista from Canada, and gogo tufala marit. Bihaen tufala marit, tufala serve lo wanfala taon lo Ecuador witim wanfala smol grup blo olketa pablisa. Distaem, datfala smol grup kamap wanfala kongregeson wea gohed strong.
Bihaen, Brata and Sista Rumph kamap spesol pioneer, and then tufala duim circuit waka. Lo 2011, tufala kasem invitation for attendim 132 class blo Gilead. Afta tufala graduate, tufala serve lo samfala difren ples raonem world and enjoyim staka difren assignment olsem Bethel service, missionary waka, and circuit waka. And tu, Brata Rumph garem privilege for kamap instructor blo Skul for Olketa Kingdom Evangelizer.
Then bikos lo datfala COVID-19 pandemic, Brata and Sista Rumph go bak lo United States. Tufala kasem invitation for waka lo Wallkill Bethel, and Brata Rumph kasem training lo Service Department. Gogo, tufala assign go bak lo Ecuador branch, and Brata Rumph hem serve lo Branch Komiti. Lo 2023, tufala assign go lo Warwick. Lo January 2024, olketa appointim Brata Rumph for serve olsem helper blo Service Komiti. Taem hem ting abaotem olketa ples wea hem serve lo hem, hem sei, “Samting wea mekem assignment hem spesol hem no datfala ples bat hem pipol wea iu waka witim.”
Iumi appreciatim hard waka blo olketa brata hia, and iumi “gohed tinghae lo olketa man olsem.”—Phil. 2:29.