Followim Example blo Jehovah lo Wei for Hambol

1. Why nao wei wea Jehovah hambol hem barava nambawan?

TAEM iu tingim pipol distaem wea garem paoa for rul, hao, iu tingse olketa garem wei for hambol? Maet nomoa. Bat Jehovah hem hambol nomata hem olmaeti. (Ps. 113:​5-8) No eniwan hambol olsem Jehovah, and no enitaem hem praod lo olketa samting hem duim. Iumi bae kasem gud samting taem iumi storyim fofala naes wei blo Jehovah lo hao hem deal witim iumi, and lanem hao each wan lo olketa wei hia showimaot hem barava hambol. Iumi bae lanem tu hao Jesus followim example blo Dadi blo hem for hambol. Taem iumi storyim olketa samting hia datwan bae helpem iumi for fren klos witim Jehovah and for barava followim wei blo hem for hambol.

JEHOVAH HEM ISI FOR IUMI STORY WITIM

2. Wat nao Psalm 62:8 talem iumi abaotem Jehovah? (Lukim tu piksa.)

² Staka taem hem no isi for story lo pipol wea praod. From olketa ting olketa gud winim narawan, olketa duim samting wea mekem pipol hol bak for go lo olketa or les lo olketa tu. Bat Jehovah no olsem! From Dadi blo iumi lo heven hem hambol, hem laekem iumi for story lo hem and talem hem wat iumi wari abaotem lo mind and heart blo iumi. (Readim Psalm 62:8.) Olsem wanfala loving dadi wea redi for lisin lo olketa pikinini blo hem wea storyim feeling blo olketa, Jehovah hapi and lisin lo prea blo olketa wea worshipim hem. Staka prea olsem hem insaed Bible, wea datwan showim Jehovah hem man wea isi for iumi story witim. (Josh. 10:​12-14; 1 Sam. 1:​10-18) Bat hao if samtaems iumi feel olsem iumi no fit for story lo Jehovah bikos lo samfala samting?

3. Why nao iu sure dat Jehovah laekem iu for evritaem prea lo hem?

³ Iumi savve story lo Jehovah lo prea nomata if iumi feel olsem iumi no fit for kasem love blo hem. Why nao iumi sei olsem? Lo parabol blo Jesus abaotem son wea lus, Jesus comparem Jehovah witim wanfala dadi wea kaen lo son blo hem wea repent and feel olsem hem no fit for dadi acceptim hem bak lo famili. Wat nao datfala dadi duim taem son blo hem kam bak lo haos? Jesus sei, semtaem dadi lukim go son blo hem nomoa hem “ran go lo hem, and hem holem and kissim hem.” (Luke 15:​17-20) Jehovah hem olsem datfala dadi. Semtaem hem herem prea blo olketa wea heart blo olketa brek and olketa sorre bikos olketa feel guilty or wari, wei wea hem hambol muvim hem for barava lisin gud lo olketa. (Lam. 3:​19, 20) Jehovah barava tingim olketa, lo wei wea hem comfortim and mekem olketa for luksavve lo mercy and love blo hem for olketa, wea datwan hem olsem hem ran go lo olketa. (Isa. 57:15) Hao nao Jehovah duim datwan distaem? Staka taem hem iusim olketa elder, olketa famili member wea worshipim hem, and olketa brata and sista. (Jas. 5:​14, 15) Jehovah provaedem olketa help olsem bikos hem laekem iumi for kam klos lo hem.

4. Hao nao Jesus showimaot hem man wea isi for pipol story witim?

⁴ Jesus followim example blo Dadi blo hem. Jesus hambol olsem Dadi blo hem. Taem Jesus lo earth, pipol feel free for story witim hem. Olketa no hol bak for ask kwestin lo hem. (Mark 4:​10, 11) So taem hem askem tingting blo olketa abaotem samting, olketa savve talem wat nao really tingting blo olketa. (Matt. 16:​13-16) Taem olketa mekem mistek, olketa no fraet nogud Jesus kros lo olketa, bikos olketa savve Jesus hem kaen, showimaot mercy, and hem patient. (Matt. 17:​24-27) Hem important for lukim hao from Jesus barava followim example blo Dadi blo hem, datwan mekem olketa follower blo hem savve gud go moa lo Jehovah. (John 14:9) Olketa savve dat Jehovah no olsem olketa religious leader lo dat taem wea raf, praod and wea no interest lo pipol. Bat Jehovah hambol and isi for story witim.

5. Hao nao wei for hambol savve mekem hem moa isi for olketa narawan story witim iumi?

⁵ Hao nao iumi savve followim example blo Jehovah? Taem iumi gohed lane for hambol, datwan bae mekem hem moa isi for olketa narawan story witim iumi. If iumi no hambol bae iumi jealous, praod, and no savve forgive, wea datwan savve mekem olketa narawan no laek klos lo iumi. Bat if iumi hambol bae iumi kaen, patient, and forgivim narawan, wea datwan savve mekem olketa narawan klos lo iumi. (Col. 3:​12-14) Olketa elder mas traem best for mekem olketa narawan feel free for story witim olketa. For duim datwan, olketa need for spendem taem witim olketa brata and sista. Diswan minim olketa bae traem best for attendim kongregeson meeting in person, winim for attend lo videoconferencing if no eni gud reason for datwan. And lo taem wea fitim, olketa bae trae for preach witim olketa pablisa lo haos tu haos ministry. Taem olketa brata and sista savve gud lo olketa elder, bae olketa feel free for askem help from olketa elder lo enitaem wea olketa needim.

JEHOVAH HEM REASONABLE

6-7. Storyim olketa example wea showim Jehovah willing for change followim wat olketa servant blo hem askem.

⁶ Staka praod pipol no willing for change taem olketa deal witim narawan. Bat from Jehovah hambol hem willing for change or adjust, nomata hem winim evriwan lo evriting hem duim. Tingim hao hem deal witim Miriam, sista blo Moses. Hem and Aaron komplen againstim Moses, man wea Jehovah iusim for story for Hem. So really, Miriam no respectim Jehovah. From datwan, Jehovah barava kros lo Miriam and mekem hem kasem leprosy. Bat taem Aaron begim Moses, and Moses begim Jehovah for healim sista blo tufala, wat nao God duim? From God no praod, hem willing for aotem panisment wea hem givim finis. Bikos Hem hambol, hem lisin lo Moses and healim Miriam.—Num. 12:​1-15.

⁷ And tu, Jehovah showimaot hem hambol taem hem deal witim King Hezekiah. Jehovah iusim profet blo Hem for talem Hezekiah dat hem bae dae. Hezekiah krae and begim Jehovah for healim hem. So Jehovah showim mercy lo datfala king and addim 15 years moa lo laef blo hem. (2 Ki. 20:​1, 5, 6) Yes, from Jehovah hambol datwan muvim hem for sorre lo narawan and willing for adjust.

8. Olketa wanem example nao showim dat Jesus hem reasonable? (Mark 3:​1-6)

⁸ Jesus followim example blo Dadi blo hem. Taem Jesus lo earth, hem no hol bak for adjust for duim gud samting for olketa narawan. For example, hem healim pipol lo Sabbath nomata pipol wea againstim hem no acceptim wat hem duim. (Readim Mark 3:​1-6.) Olsem hed blo Christian kongregeson Jesus gohed showim hem reasonable. For example, taem samwan lo kongregeson duim serious sin, hem patient witim hem, and givim inaf chance mekem hem savve changem wei blo hem.—Rev. 2:​2-5.

9. Hao nao iumi savve gohed for showim dat iumi reasonable? (Lukim tu piksa.)

⁹ Hao nao iumi savve followim example blo Jehovah? Iumi mas gohed hambol for followim example blo Jehovah wea reasonable lo hao hem ting and wat hem duim. (Jas. 3:17) For example, parents wea reasonable bae no expectim evri pikinini blo olketa for duim sem samting. Jacob hem showim gud example lo diswan, olsem iumi lukim lo Genesis 33:​12-14. Parents wea hambol and reasonable shud avoidim wei for comparem wanfala pikinini witim nara pikinini lo famili. Olketa elder tu mas reasonable. Wanfala wei for duim diswan hem taem olketa willing for adjustim tingting followim disison blo majority lo body of elders if wat olketa disaedem hem no brekem Bible principle. (1 Tim. 3:​2, 3) And hem gud for iumi evriwan trae for minim tingting blo olketa narawan nomata sapos hao iumi ting lo wanfala samting hem difren. (Rom. 14:1) Yes, evriwan lo kongregeson shud traem best for ‘showimaot lo evriwan dat olketa willing for acceptim tingting blo narawan.’—Phil. 4:5.

JEHOVAH HEM PATIENT

10. Hao nao Jehovah showim hem patient?

¹⁰ Maet staka taem iu lukim praod pipol no laekem olketa narawan for talem olketa for weit. From olketa praod datwan mekem olketa no patient. Bat Jehovah no olsem, hem patient winim eni narawan! For example, lo taem blo Noah Jehovah sei dat Hem bae weit for 120 years bifor Hem distroem wicked pipol. (Gen. 6:3) So Noah garem inaf taem for teachim olketa pikinini blo hem and buildim datfala ark witim help blo famili blo hem. Bihaen, wanfala angel wea representim Jehovah hem patient for lisin lo Abraham taem Abraham kwestinim hem abaotem hao Sodom and Gomorrah bae distroe. Maet samwan wea praod bae sei, ‘Iu no garem raet for kwestinim mi!’ Bat from datfala angel hem followim example blo Jehovah, hem patient witim Abraham.—Gen. 18:​20-33.

11. Olsem 2 Peter 3:9 storyim, why nao Jehovah patient lo taem blo iumi?

¹¹ Jehovah hem patient tu lo taem blo iumi. Hem gohed for weitim taem wea hem disaedem finis for distroem wicked pipol. Why nao hem patient? “Bikos hem no laekem eniwan for dae bat hem laekem evriwan for repent.” (Readim 2 Peter 3:9.) Hao, gud samting kamaot from wei wea Jehovah hem patient? Yes! Staka million pipol wea garem honest heart kamap fren blo hem. And iumi hope staka million moa bae duim sem samting. Nomata olsem, patient fasin blo Jehovah garem limit. Jehovah lovem pipol, bat bae hem no letem pipol for gohed followim tingting blo olketa seleva. Bae hem no letem olketa wicked samting gohed for olowe.—Hab. 2:3.

12. Hao nao Jesus followim example blo Jehovah for patient?

¹² Jesus followim example blo Dadi blo hem. For staka thousand years finis Jesus followim example blo Jehovah for patient. Jesus lukim taem Satan laea abaotem Jehovah and olketa wea faithful. (Gen. 3:​4, 5; Job 1:11; Rev. 12:10) Jesus lukim tu hao staka pipol safa tumas. Imaginim, masbi Jesus laek tumas “for finisim olketa waka blo Devil”! (1 John 3:8) Wat nao helpem Jesus for patient for weitim taem wea Jehovah bae talem hem for distroem evri samting wea Devil duim? Wanfala reason hem bikos Jesus hem hambol, so hem leavim datwan lo hand blo Jehovah from hem nao garem raet for disaedem datwan.—Acts 1:7.

13. Hao nao Jesus patient witim olketa aposol blo hem, and why?

¹³ Taem Jesus lo earth, hem patient tu witim olketa aposol. For example, evritaem wea olketa aposol savve argue abaotem hu lo olketa nao hem important, Jesus no feel nogud and givap lo olketa. Bat, hem gohed patient witim olketa. (Luke 9:46; 22:​24-27) Hem sure hao gogo bae olketa changem wei blo olketa. Hao, iu mekem olketa sem mistek evritaem? If olsem, for sure iu hapi tumas for garem wanfala King wea barava hambol and patient witim iu.

14. Wat nao savve helpem iumi for gohed patient?

¹⁴ Hao nao iumi savve followim example blo Jehovah? Taem iumi mekem grow wei for “garem tingting blo Christ,” datwan bae helpem iumi for garem tingting blo Jehovah and duim samting olsem hao Hem duim. (1 Cor. 2:16) Hao nao for iumi savve gud lo tingting blo Christ? No eni shortkat for datwan. Iumi mas readim evritaem olketa story abaotem laef blo Jesus lo olketa Gospel. Then iumi need for ting raonem hao olketa story hia showim tingting blo Jesus abaotem olketa samting. And iumi mas askem Jehovah for helpem iumi for garem sem tingting olsem Jesus. Taem iumi gohed garem tingting blo Christ, iumi bae barava followim example blo God, wea datwan bae mekem iumi for patient lo iumiseleva and lo olketa brata and sista.—Matt. 18:​26-30, 35.

JEHOVAH HONORIM OLKETA WEA HAMBOL

15. Wat nao Jehovah duim for pruvim samting wea Psalm 138:6 talem hem tru?

¹⁵ Readim Psalm 138:6. Hem wanfala privilege for Sovereign blo universe hem honorim olketa wea hambol! Tingim samfala hambol pipol wea Bible storyim wea Jehovah honorim olketa. Maet iumi no savve gud lo samfala lo olketa, bat Jehovah includim olketa insaed Bible. Jehovah iusim Moses for raetem nem blo wanfala woman wea nem blo hem Deborah, wea stap lo taem blo olketa faithful man bifor. Hem faithful for waka for famili blo Isaac and Jacob for samting olsem 125 years! Nomata iumi no savve lo staka samting abaotem disfala loyal woman, Jehovah mek sure Moses raet abaotem hem, wea datwan showim Jehovah lovem hem. (Gen. 24:59; 35:​8, ftn.) Staka handred year bihaen, Jehovah chusim David, wanfala shepherd boy, and mekem hem kamap king ovarem Israel. (2 Sam. 22:​1, 36) Afta Jesus born, God sendem olketa angel for talem olketa hambol shepherd dat future Messiah hem born lo Bethlehem. Datwan hem wanfala privilege bikos olketa shepherd hia nao first wan for savve lo datwan. (Luke 2:​8-11) And taem Joseph and Mary tekem Jesus go lo temple, Jehovah givim privilege lo Simeon and Anna for lukim Son blo Hem. (Luke 2:​25-30, 36-38) Yes, “nomata Jehovah hem hae, hem luksavve lo man wea hambol”!

16. Hao nao Jesus followim example blo Dadi blo hem lo hao hem treatim olketa narawan?

¹⁶ Jesus followim example blo Dadi blo hem. Hem honorim hambol pipol, olsem Dadi blo hem duim. Hem teachim pipol wea ‘no skul gud and man nating’ for savve lo truth abaotem Kingdom blo God. (Acts 4:13; Matt. 11:25) Jesus healim tu olketa wea sik and hem duim datwan lo wei wea mekem olketa feelim love and kasem respect tu. (Luke 5:13) Lo naet bifor Jesus dae, hem wasim feet blo olketa aposol, wea datwan hem waka blo wanfala slave. (John 13:5) And bifor Jesus go ap lo heven, hem givim privilege lo evri hambol follower blo hem for duim disfala barava important waka, wea hem nao for helpem pipol for kasem laef olowe.—Matt. 28:​19, 20.

17. Hao nao iumi savve showim iumi honorim olketa narawan? (Lukim tu piksa.)

¹⁷ Hao nao iumi savve followim example blo Jehovah? Iumi honorim pipol taem iumi sharem gud nius witim evriwan wea lisin, nomata wat nao baekgraon, skin kala, or education level blo olketa. And iumi honorim olketa brata and sista taem iumi ting lo olketa olsem olketa winim iumi, nomata wat kaen ability or privilege nao iumi garem. (Phil. 2:3) Jehovah hem hapi taem iumi hambol for “lead” lo wei for showim honor lo each other lo olketa wei hia, and lo olketa nara wei tu.—Rom. 12:10; Zeph. 3:12.

18. Why nao iu laek for followim example blo Jehovah lo wei for hambol?

¹⁸ Taem iumi duim best for followim example blo Dadi lo heven lo wei for hambol, bae hem moa isi for pipol story witim iumi, bae hem moa isi for iumi reasonable, and bae hem moa isi for iumi patient. And bae iumi honorim olketa narawan, olsem Jehovah hem duim. Taem iumi waka hard for fren klos witim God blo iumi wea hambol, datwan bae mekem each wan lo iumi for barava spesol lo eye blo hem!—Isa. 43:4.