Hao Nao for Protectim Miseleva From Sexual Harassment?
Ansa from Bible
Lukim olketa practical suggestion hia wea base lo wisdom wea stap insaed Bible:
Garem limit lo waka ples. Kaen and respectim olketa workmate blo iu, bat avoidim wei for fren klos witim olketa wea bae mekem olketa ting dat iu bae acceptim nomoa for duim sex witim olketa.—Matthew 10:16; Colossians 4:6.
Dress modestly. For werem kaleko wea showim body savve givim rong message. Bible encouragem wei for werem kaleko wea ‘modest and showim iu luksavve lo stret samting.’—1 Timothy 2:9.
Chusim olketa frens blo iu wisely. If iu spendem taem witim frens wea savve flirt or hapi nomoa for duim sex witim olketa narawan, pipol bae treatim iu olsem olketa tu.—Proverbs 13:20.
Rejectim story wea hem dirty. Lusim ples if iu herem conversation hem lead go for “rabis toktok, or olketa dirty toktok for mekfani.”—Ephesians 5:4, God’s Word Bible.
Garem wei for luksavve. For example, careful lo olketa invitation for stay lo waka ples afta hours if iu no garem valid reason for duim datwan.—Proverbs 22:3.
Mas strong and tok stret. If samwan sexually harassim iu, tok stret lo hem dat iu no laekem wat hem duim. (1 Corinthians 14:9) For example, iu maet sei: “No tasim mi taem iu go pas, hem mekem mi feel uncomfortable. Mi laek for iu stop for duim datwan.” Iu maet raetem leta go lo hem and talem hem wat happen, hao iu feel abaotem datwan, and wat iu bae duim next taem. Talem klia dat stand blo iu hem base lo wat hem stret and religious biliv blo iu.—1 Thessalonians 4:3-5.
Kasem help. If samwan continue for harassim iu, storyim datwan lo wanfala trusted fren, famili member, or coworker or lo samwan wea garem experience for helpem olketa victim. (Proverbs 27:9) Staka victim blo sexual harassment faendem prea hem big sapot for olketa. Even if iu no enitaem prea bifor, no anda estimatem help wea iu savve kasem from Jehovah, “God blo evri comfort.”—2 Corinthians 1:3.
Sexual harassment kosim problem for staka million pipol lo waka ples, bat Bible savve help.