Fraetem Dae​—Hao Nao Iu Savve Ovakamim datwan?

Ansa from Bible

Hem stret for duim samting for protectim laef blo iumi, bikos dae hem olsem wanfala enemy wea mekem iumi fraet. (1 Corinthians 15:26) Bat, kaen wei for fraetem dae wea base lo olketa laea story or superstition, hem mekem pipol for “slave for full laef blo olketa.” (Hebrews 2:​15) Taem iumi savve lo truth, bae hem mekem iumi free and no fraetem dae. Wei for fraet savve mekem iumi for no enjoyim laef.​—John 8:​32.

Truth abaotem dae

• Olketa wea dae no savve tingim eni samting. (Psalm 146:4) Iu no need for fraet dat bae iu kasem pain or safa afta iu dae, bikos Bible sei taem man hem dae, hem olsem hem sleep nomoa.​—Psalm 13:3; John 11:11-​14.

• Pipol wea dae no savve spoelem iumi. Even olketa enemy wea violent bifor, taem olketa “dae finis [olketa] no garem paoa” for duim eni samting. (Proverbs 21:16) Bible sei “heit . . .  and jealous fasin blo olketa, evri samting hia finis nao.”​—Ecclesiastes 9:6.

• Dae hem no end lo laef blo iumi olketa man. Thru lo resurrection hope, God bae mekem pipol wea dae for laef bak.​—John 5:​28, 29; Acts 24:15.

• God promisim wanfala taem lo future wea “dae bae nomoa nao.” (Revelation 21:4) Bible sei lo datfala taem: “Raeteous pipol bae onam disfala earth, and bae olketa stap lo hem for olowe.” Datwan minim no eniwan bae fraetem dae.​—Psalm 37:29.