Hao, God Markem Finis Taem for Man Dae?

Ansa from Bible

Nomoa, God no markem taem for man dae. Bible no sapotim datfala biliv blo fate, bat hem sei samtaems “samting wea man no expectim” nao savve happen wea kosim dae.​—Ecclesiastes 9:​11.

Hao, Bible talem dat taem hem stap “for dae”?

Yes, Ecclesiastes 3:2 sei taem hem stap for evri samting “taem for born, and taem for dae; taem for plant, and taem for pullimaot wat olketa plantim.” (King James Version) Bat, context blo disfala verse showim dat Bible storyim nomoa olketa samting wea savve happen lo laef blo iumi olketa man. (Ecclesiastes 3:​1-8) God no markem taem for each wan lo iumi bae dae, olsem hem no forcem wanfala farmer for plantim samting lo wanfala specific taem. Bat, point hem for no busy tumas lo olketa samting lo laef gogo iumi no tingim nao Creator blo iumi.​—Ecclesiastes 3:​11; 12:​1, 13.

Iumi savve laef longtaem

Nomata iumi no savve kontrolem olketa samting wea happen lo laef, iumi savve laef longtaem if iumi mekem olketa wise disison. Bible sei: “Teaching blo wise man hem source blo laef for helpem man no foldaon lo trap blo dae.” (Proverbs 13:14) And tu, Moses talem olketa Israelite dat olketa savve “laef longtaem” if olketa obeyim olketa komand blo God. (Deuteronomy 6:2) Bat, iumi savve katem short laef blo iumi taem iumi duim olketa nogud or karangge samting.​—Ecclesiastes 7:​17.

Nomata iumi wise or careful lo wat iumi duim, iumi no savve ranawe from dae. (Romans 5:​12) Bat, disfala situation bae change, Bible promisim dat wanfala taem bae kam wea “dae bae nomoa nao.”​—Revelation 21:4.