Hao, God Savve Changem Mind blo Hem?
Ansa from Bible
Yes, hem savve change mind blo hem taem pipol changem wei blo olketa. For example, taem God sendem judgment message lo pipol blo Israel bifor, hem sei: “Maet olketa bae lisin, and each wan bae tane bak from wicked wei blo hem, and mi bae changem tingting blo mi abaotem trabol wea mi bae mekem for kasem olketa bikos lo olketa wicked samting wea olketa duim.”—Jeremiah 26:3.
Staka Bible transleitim disfala verse and sei God savve “changem tingting blo hem” abaotem trabol wea hem plan for mekem, wea datwan savve minim hem mekem mistek. Bat, original Hebrew word savve minim “changem mind or tingting.” Wanfala scholar raet olsem: “Taem man changem wei blo hem, datwan mekem God changem judgment blo hem tu.”
Bat, just bikos God savve changem mind blo hem, hem no minim dat hem mas changem mind blo hem. Lukim samfala situation wea Bible sei God no changem mind blo hem:
God no letem Balak for mekem Hem changem mind blo Hem and hem cursim nation blo Israel.—Numbers 23:18-20.
Taem King Saul blo Israel no laek for lusim nogud wei blo hem, God rejectim hem for king, and hem no changem mind blo hem abaotem datfala disison.—1 Samuel 15:28, 29.
God bae fulfillim promis blo hem for mekem Son blo hem priest for olowe. God bae no changem mind blo Hem.—Psalm 110:4.
Hao, Bible talem dat God no savve change?
Yes, lo Bible God sei: “Mi nao Jehovah, mi no savve change.” (Malachi 3:6) Bible sei tu God “no savve change olsem shadow wea savve muv and change.” (James 1:17) Bat diswan no againstim wat Bible talem abaotem wei wea God savve changem mind blo hem. Taem Bible sei God no savve change hem minim hem no changem personality blo hem and olketa standard saed lo love and justice. (Deuteronomy 32:4; 1 John 4:8) Bat, hem savve givim olketa difren instruction lo pipol lo olketa difren taem. For example, God givim opposite instruction lo King David lo tufala difren taem wea olketa go faet, bat tufala instruction hia waka gud.—2 Samuel 5:18-25.
Hao, God sorre dat hem creatim olketa human?
Nomata God regret dat staka pipol ignorem and rejectim hem, hem no sorre dat hem creatim olketa human. Taem Bible describem olketa samting wea happen bifor Flood lo taem blo Noah, hem sei: “Jehovah hem regret from hem wakem olketa man lo earth, and heart blo hem sorre tumas.” (Genesis 6:6) Lo disfala verse, datfala word “regret” hem kam from Hebrew word wea savve minim “changem mind.” God changem mind blo hem abaotem staka pipol wea laef bifor Flood bikos olketa barava wicked. (Genesis 6:5, 11) Nomata hem sorre dat olketa chus for followim nogud wei blo olketa, hem no changem tingting blo hem abaotem full human race. Tru samting, hem sevem olketa man lo datfala Flood thru lo wat Noah and famili blo hem duim.—Genesis 8:21; 2 Peter 2:5, 9.