Hu Nao Antichrist?

Ansa from Bible

Antichrist hem no refer for wanfala individual person or organization, bikos Bible sei “staka antichrist” nao stap. (1 John 2:​18) Datfala term “antichrist,” hem kam from wanfala Greek word wea minim “againstim (or instead lo) Christ,” and savve refer lo eniwan wea duim olketa samting hia:

• Denyim dat Jesus hem Christ (Messiah) or Jesus hem Son blo God.​—1 John 2:​22.

• Againstim Christ, Anointed Wan blo God.​—Psalm 2:​1, 2; Luke 11:23.

• Pretend hem nao Christ.​—Matthew 24:24.

• Persecutim olketa follower blo Christ, bikos Jesus ting lo wat olketa hia duim, olsem olketa duim lo hem tu.​—Acts 9:5.

• Claimim dat hem wanfala Christian bat hem duim olketa samting wea brekem law and hem laea.​—Matthew 7:​22, 23; 2 Corinthians 11:13.

Bible story abaotem each individual wea duim olketa samting hia olsem olketa antichrist, bat Bible refer lo evriwan olsem “datfala antichrist.” (2 John 7) Antichrist hem start lo taem blo olketa aposol and hem active kam kasem distaem. Bible profesi story abaotem olketa samting hia.​—1 John 4:3.

Hao for identifyim olketa antichrist

• Olketa promotim olketa false idea abaotem Jesus. (Matthew 24:​9, 11) For example, olketa wea teachim Trinity or Jesus hem Olmaeti God actually opposim teaching blo Jesus, wea sei: “Dadi hem hae winim mi.”​—John 14:28.

• Olketa antichrist rejectim wat Jesus talem abaotem wat Kingdom blo God hem duim. For example, samfala religious leader sei dat Christ iusim olketa human gavman for duim wat hem bae duim. Bat disfala teaching contradict witim wat Jesus talem, wea sei: “Kingdom blo mi hem no part lo disfala world.”​—John 18:36.

• Olketa sei Jesus hem Lord blo olketa, bat olketa no obeyim komand blo hem, includim komand for preachim gud nius abaotem Kingdom.​—Matthew 28:19, 20; Luke 6:​46; Acts 10:42.