Wat Nao Saen blo “Olketa Last Day,” or “Taem blo End”?

Ansa from Bible

Bible describem olketa event, condition, and attitude wea pruvim dat “world hem gogo for finis,” or “end blo world.” (Matthew 24:3; King James Version) Bible kolem disfala taem period “olketa last day” and “taem blo end,” or “end blo world.”—2 Timothy 3:1; Daniel 8:19; Easy-to-Read Version.

Wat nao samfala Bible profesi abaotem “olketa last day”?

Bible talemaot staka samting wea bae happen semtaem and bae hem “saen” wea pruvim iumi stap lo olketa last day. (Luke 21:7) Tingim samfala example:

War happen evriwea lo world. Jesus profesi olsem: “Pipol lo wanfala kantri bae faetem pipol lo nara kantri and kingdom againstim nara kingdom.” (Matthew 24:7) And tu, Revelation 6:4 profesi abaotem wanfala man wea raedem horse hem representim war wea bae “aotem peace from earth.”

Bigfala hangere. Jesus profesi olsem: “Bigfala hangere” bae kamap. (Matthew 24:7) Buk blo Revelation profesi abaotem nara man wea raedem horse, hem representim bigfala hangere bae kamap evriwea lo world.—Revelation 6:5, 6.

Big earthquake. Jesus talem dat “olketa earthquake bae kasem staka ples.” (Matthew 24:7; Luke 21:11) Olketa big earthquake hia wea happen raonem world mekem staka pipol safa and lusim laef blo olketa winim enitaem bifor.

Sik. Jesus talem dat olketa nogud sik, or “rabis sik” bae kamap.—Luke 21:11, Contemporary English Version.

Crime. Hem tru, crime hem exist for staka century finis, bat Jesus talem dat lo olketa last day “pipol wea brekem law olketa kamap staka.”—Matthew 24:12.

Spoelem earth. Revelation 11:18 talem olketa man bae “spoelem earth.” Olketa duim datwan lo staka difren wei, thru lo wei wea olketa raf or duim corrupt samting, and tu, duim olketa nara samting wea savve spoelem environment.

Attitude blo pipol barava worse. Lo 2 Timothy 3:1-4, Bible talem pipol bae “no savve tinghae, no loyal . . . no willing for agree, laea for spoelem nem blo narawan, no garem wei for kontrolem seleva, raf, heitim gud samting, betrayim fren blo olketa, bighed, praod.” Attitude blo pipol bae worse gogo “bae evri samting hem hard tumas.”

Famili brekdaon. Lo 2 Timothy 3:2, 3, Bible talem dat staka pipol bae “no garem love insaed famili” and olketa pikinini bae “disobeyim parents.”

Pipol bae no lovem God. Jesus talem dat: “Love blo staka pipol moa bae no strong nao olsem bifor.” (Matthew 24:12) Jesus minim dat staka pipol bae no lovem God olsem bifor. And tu, 2 Timothy 3:4 sei dat lo olketa last day, pipol olsem bae “laek tumas for duim samting wea olketa seleva laekem instead for lovem God.”

Pipol hypocrite. Lo 2 Timothy 3:5, Bible talem dat pipol bae claimim olketa worshipim God bat bae no live followim olketa standard blo hem.

Understanding abaotem Bible profesi hem increase. Buk blo Daniel talem lo “taem blo end,” knowledge blo staka pipol abaotem olketa Bible truth bae increase, includim accurate understanding abaotem olketa profesi hia.—Daniel 12:4, footnote.

Global preaching waka. Jesus talem: “Disfala gud nius abaotem Kingdom bae olketa talemaot lo evri ples lo earth.”—Matthew 24:14.

Pipol mekfani and bae no tinghae. Jesus talem pipol bae no laek for savve lo olketa pruv wea showim end hem klosap. (Matthew 24:37-39) Worse go moa, 2 Peter 3:3, 4 talem dat samfala pipol bae mekfani abaotem olketa saen, and sei datwan no pruvim eniting.

Evri profesi fulfill. Jesus talem lo olketa last day olketa profesi hia bae fulfill lo semtaem, no just tu thri nomoa or staka lo olketa, bat evriwan wantaem.—Matthew 24:33.

Hao, iumi stap lo “olketa last day”?

Yes. Olketa samting wea happen lo world witim tu Bible chronology, hem showim olketa last day start lo 1914, hem year wea World War I start. For lukim hao olketa samting wea happen lo world showim iumi stap lo olketa last day, watchim disfala video:

Lo 1914, Kingdom blo God hem start for rul lo heven, and first samting wea hem duim hem aotem Satan datfala Devil and olketa demon blo hem from heven and allowim olketa for duim samting wea bae affectim earth nomoa. (Revelation 12:7-12) Iumi savve lukim influence blo Satan hem mekem attitude blo pipol worse tumas and pipol duim olketa nogud samting wea mekem “evri samting hem hard tumas” lo olketa last day.—2 Timothy 3:1.

Staka pipol wari tumas bikos evri samting hard tumas. Olketa wari dat no enitaem bae pipol stap gud tugeta moa. Samfala even fraet dat gogo lo future bae no eni man laef lo disfala world.

Bat, olketa narawan wea feel nogud lo olketa samting wea happen lo disfala world gogo olketa garem hope for future. Olketa convince dat klosap Kingdom blo God bae duim samting for removim olketa problem wea happen lo world. (Daniel 2:44; Revelation 21:3, 4) Olketa patient for weitim taem wea God fulfillim olketa promis blo hem, and olketa kasem comfort lo toktok blo Jesus: “Man wea bae sev nao hem man wea faithful go kasem end.”—Matthew 24:13; Micah 7:7.