Hu Nao Waef blo Cain?

Ansa from Bible

Cain, eldest pikinini blo first human couple, maritim wanfala lo olketa sista blo hem or nara klos female relative blo hem. Iumi sei olsem bikos lo samting wea Bible talem abaotem Cain and famili blo hem.

Tru samting abaotem Cain and famili blo hem

Evri human descended from laen blo Adam and Eve. God “wakem olketa man from evri nation aot lo wanfala man [Adam] nomoa, for olketa stap lo full earth.” (Acts 17:26) Eve waef blo Adam, hem nao “mami blo evriwan wea laef.” (Genesis 3:20) So, Cain mas maritim wanfala gele wea kam from laen blo Adam and Eve.
Cain and brata blo hem Abel nao tufala first pikinini wea born lo Eve. (Genesis 4:1, 2) Taem Cain kasem panis from hem killim dae brata blo hem, hem komplen olsem: “Eniwan wea lukim mi bae killim mi dae stret.” (Genesis 4:14) So hu nao Cain fraetem? Bible sei dat Adam “garem olketa nara son and dota.” (Genesis 5:4) Hem barava klia, Cain maet fraetem olketa nara pikinini wea born from laen blo Adam and Eve, nogud olketa bae killim hem dae.
Early lo human history, hem common samting for maritim relative. For example, datfala faithful man Abraham, maritim haf sista blo hem. (Genesis 20:12) First law wea againstim kaen marit olsem hem lo Law blo Moses, wea kamap samfala centuries afta taem blo Cain. (Leviticus 18:9, 12, 13) Luk olsem olketa pikinini wea born from klos relative lo taem bifor no garem sik taem olketa born, olsem pikinini lo taem blo iumi.
Bible showim story blo Adam, Eve, and famili blo olketa hem accurate lo history. Genealogy wea go bak kasem Adam hem no stap nomoa lo buk blo Genesis wea Moses raetem, bat hem stap tu lo raeting blo olketa historian olsem Ezra and Luke. (Genesis 5:3-5; 1 Chronicles 1:1-4; Luke 3:38) Olketa Bible raeta talem dat story abaotem Cain hem wanfala historical event.—Hebrews 11:4; 1 John 3:12; Jude 11.