Hao, Bible Story Abaotem Purgatory?
Ansa from Bible
Nomoa, hem no storyim. Datfala word “purgatory” no stap insaed Bible, and Bible no teachim dat soul blo olketa wea dae go lo purgatory mekem olketa klin from sin blo olketa.a Tingim wat Bible teachim abaotem sin and dae and hao hem contradict witim doctrine blo purgatory.
Faith lo blood blo Jesus nao mekem man klin from sin, no purgatory. Bible sei dat “blood blo Son blo [God], Jesus, hem mekem iumi klin from evri sin blo iumi” and dat “Jesus Christ . . . iusim blood blo hem for mekem iumi kamap free from olketa sin blo iumi.” (1 John 1:7; Revelation 1:5, New American Bible) Jesus “givim laef blo hem olsem ransom for staka pipol” for peim olketa bak from sin blo olketa.—Matthew 20:28, NAB.
Pipol wea dae no savve lo eni samting. “Olketa wea laef savve dat olketa bae dae, bat olketa wea dae no savve lo eni samting.” (Ecclesiastes 9:5, NAB) Man wea dae finis no savve feelim eniting, so bae hem no go lo purgatory for fire mekem hem klin from sin blo hem.
Man bae no kasem panisment for olketa sin afta hem dae. Bible hem sei dat “wages blo sin hem dae” and “man wea dae hem free nao from olketa sin blo hem.” (Romans 6:7, 23, NAB) Full panisment blo sin hem nao dae.
a Saed lo purgatory, datfala buk Orpheus: A General History of Religions sei dat “no eni word abaotem diswan stap insaed olketa Gospel.” And tu, New Catholic Encyclopedia sei olsem: “Olketa faendaot datfala Catholic doctrine blo purgatory hem base lo tradition, hem no base lo Holy Scripture.”—Second Edition, Volume 11, page 825.
b Lukim datfala New Catholic Encyclopedia, Second Edition, Volume 11, page 824.