Wat Nao Pasova?
Ansa from Bible
Pasova hem celebration blo olketa Jew for rememberim taem wea God mekem olketa Israelite free from wei for slave lo Egypt lo 1513 B.C.E. God komandim olketa Israelite for rememberim datfala important event each year lo mek 14 day lo month wea olketa Jew kolem lo Abib, wea bihaen olketa kolem lo Nisan.—Exodus 12:42; Leviticus 23:5.
Why nao olketa kolem Pasova?
Datfala word “Pasova” hem refer go lo taem wea God sevem olketa Israelite taem hem killim dae evri firstborn lo Egypt. (Exodus 12:27; 13:15) Bifor God mekem disfala trabol kasem olketa blo Egypt, hem talem olketa Israelite for splasim lelebet blood blo young sheepsheep or goat wea olketa killim dae, lo frame blo tufala saed lo door. (Exodus 12:21, 22, footnote) If God lukim disfala saen lo door blo olketa, bae hem “go pasim” haos blo olketa and no killim dae firstborn blo olketa.—Exodus 12:7, 13.
Hao nao olketa celebratem Pasova lo Bible taems?
God givim olketa instruction lo olketa Israelite lo hao for celebratem first Pasova.a Diswan hem samfala features blo Pasova wea Bible storyim.
Sakrifaes: Lo mek-ten day blo Abib (Nisan), each famili bae selectim wanfala wan year old young sheepsheep (or goat), and lo mek-14 day, olketa bae killim dae datfala animal. Lo first day blo Pasova, olketa Jew bae splasim lelebet blood blo hem lo tufala frame lo saed blo door and frame antap door lo haos, olketa roastim datfala full animal, and kaikaim datwan.—Exodus 12:3-9.
Meal: Olketa Israelite kaikaim datfala young sheepsheep (or goat), witim bred wea no garem yeast and saoa kabis olsem part blo Pasova meal.—Exodus 12:8.
Festival: Afta Pasova, olketa Israelite celebratem Festival blo Bred wea No Garem Yeast for seven days. During dat taem olketa bae no kaikaim bred wea garem yeast.—Exodus 12:17-20; 2 Chronicles 30:21.
Education: Lo taem blo Pasova, parents savve iusim datfala taem for teachim pikinini blo olketa abaotem Jehovah God.—Exodus 12:25-27.
Travel: Afta, olketa Israelite travel go lo Jerusalem for celebratem Pasova.—Deuteronomy 16:5-7; Luke 2:41.
Olketa nara kastom: Lo taem blo Jesus, olketa savve drinkim wine and singsing tu lo taem blo Pasova celebration.—Matthew 26:19, 30; Luke 22:15-18.
Tingting wea no stret abaotem Pasova
Tingting wea no stret: Olketa Israelite kaikaim kaikai blo Pasova lo Nisan 15.
Tru samting: God komandim olketa Israelite for killim dae wanfala young sheepsheep just afta sunset lo Nisan 14 and kaikaim lo sem naet. (Exodus 12:6, 8) Followim kalenda blo olketa Israelite, day blo olketa start from sunset go kasem sunset lo next day. (Leviticus 23:32) Dastawe, olketa Israelite killim dae datfala young sheepsheep and kaikaim kaikai blo Pasova lo start blo Nisan 14.
Tingting wea no stret: Olketa Christian shud celebratem Pasova.
Tru samting: Afta Jesus celebratem Pasova lo Nisan 14, 33 C.E., hem startim wanfala niu celebration wea hem: Evening Kaikai blo Lord. (Luke 22:19, 20; 1 Corinthians 11:20) Datwan nao replacem datfala Pasova, bikos iumi rememberim sakrifaes blo “Christ [datfala] Pasova Lamb.” (1 Corinthians 5:7) Ransom sakrifaes blo Jesus hem winim Pasova sakrifaes, bikos hem mekem evri pipol free from wei for slave lo sin and dae.—Matthew 20:28; Hebrews 9:15.
a Afta samfala taem go pas, samfala adjustment hem kamap. For example, taem olketa Israelite celebratem first Pasova, olketa duim datwan “kwiktaem” bikos olketa need for redi for lusim Egypt. (Exodus 12:11) Bat, taem olketa arrive lo Promis Land, olketa Israelite no need moa for hariap for celebratem datwan.