Wat Nao Bible Talem Abaotem Wei for Putim Mekap and Werem Jewelry?
Ansa from Bible
Nomata Bible no storyim staka detail abaotem disfala subject, Bible no stopem wei for putim on makeup, werem jewelry, or other tings wea mekem samwan luk naes. Bible no focus lo physical appearance, bat hem storyim samting wea mekem samwan “luk naes, . . . hem nao for garem kwaet fasin and for no raf.”—1 Peter 3:3, 4.
Bible no stopem wei for werem samting for mekem samwan luk naes
Olketa faithful woman lo bifor werem tings wea mekem olketa luk naes. Rebekah, wea hem maritim Isaac, son blo Abraham, hem werem wanfala gold nose ring, olketa gold bangol, and olketa nara expensive jewelry wea hem receivim olsem gift from future dadi-in-law blo hem. (Genesis 24:22, 30, 53) Esther tu acceptim olketa “beauty treatment” for redyim hem for kamap queen blo Persian Empire if gogo king bae chusim hem. (Esther 2:7, 9, 12) Olketa beauty treatment hia hem includim “cosmetics,” or “difren kaen makeup.”—New International Version; Easy-to-Read Version.
Bible iusim jewelry lo olketa illustration wea storyim positive samting. For example, Bible sei: “Ear wea laek for lisin lo kaonsel wea wise man givim hem olsem gold earring and nekles wea olketa wakem lo pure gold.” (Proverbs 25:12) Lo sem wei tu, God seleva comparem hao hem treatim nation blo Israel lo wanfala hasband wea decoratem waef blo hem witim olketa bangol, nekles, and olketa earring. Diswan mekem datfala nation for “luk naes tumas.”—Ezekiel 16:11-13.
Rong idea abaotem mekap and jewelry
Rong idea: Lo 1 Peter 3:3, Bible stopem “wei for staelem hair, [and for] werem olketa gold samting.”
Tru samting: Context blo disfala verse showim dat Bible sei samting wea insaed lo heart nao mekem samwan hem luk naes, winim for samwan mekem aotsaed lo body nomoa hem luk naes. (1 Peter 3:3-6) Olketa nara verse lo Bible tu storyim olketa similar comparison.—1 Samuel 16:7; Proverbs 11:22; 31:30; 1 Timothy 2:9, 10.
Rong idea: Bikos wicked Queen Jezebel iusim eye shadow, or “kalam eye blo hem lo blak kala,” datwan pruvim for werem makeup hem rong.—2 Kings 9:30.
Tru samting: Jezebel, wea iusim demon for spoelem man and hem murder, God judgem hem for olketa wicked tings wea hem duim and no for appearance blo hem.—2 Kings 9:7, 22, 36, 37.