Wat Nao Bible Talem Abaotem Fasting?
Ansa from Bible
Lo Bible taems, fasting hem acceptable lo God taem man duim witim raet motive. Bat taem man duim datwan witim rong reason, God no hapi lo datwan. Nomata olsem, Bible no komandim man for fasting or hem no stopem tu for pipol distaem duim fasting.
Wat circumstance nao mekem samfala man lo Bible taems for fasting?
Taem olketa askem help and guidance from God. Pipol wea wakabaot go lo Jerusalem fasting for showim olketa barava needim help blo God. (Ezra 8:21-23) Samtaems Paul and Barnabas chus for fasting taem olketa appointim olketa kongregeson elder.—Acts 14:23.
Taem olketa focus lo wat God laekem. Afta Jesus baptaes, hem fasting for 40 days for redyim hemseleva for duim will blo God lo ministry blo hem.—Luke 4:1, 2.
Taem olketa showim olketa repent from past sins blo olketa. God iusim profet Joel for talem olketa Israelite wea no faithful: “Kam bak lo mi witim full heart blo iufala, and iufala fasting and iufala krae and krae big.”—Joel 2:12-15.
Taem olketa keepim Day blo Atonement. Lo Law wea God givim for nation blo Israel hem includim tu komand for fasting lo annual Day blo Atonement (Day for Kasem Forgiveness).a (Leviticus 16:29-31) For fasting lo occasion olsem hem helpem olketa Israelite bikos hem remindim olketa dat olketa no perfect and needim forgiveness blo God.
Wat nao samfala rong motive for fasting?
For impressim olketa narawan. Jesus teachim dat fasting hem shud personal and private samting between man seleva and God.—Matthew 6:16-18.
For pruvim man hem raeteous. Fasting no savve mekem wanfala person hae winim olketa narawan saed lo wei and spirituality blo hem.—Luke 18:9-14.
For trae compensatim sin wea man gohed duim. (Isaiah 58:3, 4) God only acceptim fasting wea man duim from hem obey and repent from heart for eni sin wea hem commitim.
For showim dat man hem worshipim God. (Isaiah 58:5-7) God hem olsem dadi wea nating hapi taem olketa pikinini blo hem duim samting for showim olketa lovem hem from samwan nao forcem olketa for duim, no from heart.
Hao, olketa Christian mas fasting?
No. God talem olketa Israelite for fasting lo Atonement Day, bat hem finisim datfala law afta Jesus dae and peim aot sin blo pipol wea repent. (Hebrews 9:24-26; 1 Peter 3:18) Olketa Christian no stap anda lo Law blo Moses, wea Atonement Day hem part lo hem. (Romans 10:4; Colossians 2:13, 14) Dastawe, each Christian savve disaed whether bae hem fasting or nomoa.—Romans 14:1-4.
Olketa Christian luksavve dat fasting hem no important samting lo worship. No enitaem Bible storyim dat fasting savve mekem man kasem tru hapi. Bat, worship nao mekem wanfala Christian for hapi, wea hem wei blo Jehovah, “datfala hapi God.”—1 Timothy 1:11; Ecclesiastes 3:12, 13; Galatians 5:22.
Tingting wea no stret abaotem wat Bible talem abaotem fasting
Tingting wea no stret: Aposol Paul talem olketa Christian marit couple for fasting.—1 Corinthians 7:5, King James Version.
Tru samting: Olketa oldest Bible manuscript no mentionim fasting lo 1 Corinthians 7:5.b Luk olsem, olketa Bible copyist nao addim wanfala reference lo fasting, no lo disfala verse nomoa bat lo Matthew 17:21; Mark 9:29; and Acts 10:30 tu. Staka modern Bible transleison omitim olketa reference hia abaotem fasting wea no tru.
Tingting wea no stret: Olketa Christian shud fasting for commemoratim 40 days wea Jesus fasting lo wilderness afta hem baptaes.
Tru samting: Jesus never komandim olketa disaepol blo hem for fasting, and no eni Scripture storyim dat olketa Christian lo bifor keepim datwan.c
Tingting wea no stret: Olketa Christian shud fasting taem olketa commemoratim dae blo Jesus.
Tru samting: Jesus no komandim olketa disaepol blo hem for fasting taem olketa commemoratim dae blo hem. (Luke 22:14-18) Hem tru Jesus talem dat olketa disaepol blo hem bae fasting taem hem dae, bat datwan hem no wanfala komand, hem just talem nomoa wat bae happen. (Matthew 9:15) Bible talem olketa Christian wea hangere for kaikai lo haos blo olketa bifor olketa celebratem Memorial lo dae blo Jesus.—1 Corinthians 11:33, 34.
a Lo Atonement Day God talem olketa Israelite: “Iufala mas showimaot iufala sorre bikos lo olketa sin blo iufala.” (Leviticus 16:29, 31; King James Version) Disfala expression hem savve refer lo fasting. (Isaiah 58:3) Dastawe, Contemporary English Version iusim disfala rendering: “Iufala mas no kaikai for showim iufala sorre bikos lo olketa sin blo iufala.”
b Lukim A Textual Commentary on the Greek New Testament, wea Bruce M. Metzger raetem, Third Edition, page 554.
c Regardim history blo 40-day fasting lo Lent, New Catholic Encyclopedia sei olsem: “Lo first thri centuries, datfala period for fasting for prepare for paschal [Easter] feast hem no gohed for wan week. Wan or tufala day nomoa hem usual limit. . . . Firstaem wea fasting for 40 days kamap hem lo mek-fifth canon blo Council blo Nicaea (325), nomata samfala scholar disputem whether pipol shud keepim Lent.”—Second Edition, Volume 8, page 468.