Hu or Wat Nao “datfala Alpha and datfala Omega”?

Ansa from Bible

“Datfala Alpha and datfala Omega” hem refer lo Jehovah God, datfala Olmaeti. Disfala term hem occur thri taems insaed Bible.​—Revelation 1:8; 21:6; 22:13.a

Why nao God kolem hemseleva “datfala Alpha and datfala Omega”?

Alpha hem first leta and omega hem last leta lo Greek alphabet, languis wea olketa iusim for raetem part lo Bible wea olketa kolem lo Niu Testament, wea includim tu buk blo Revelation. Stret ples wea tufala leta hia stap lo Greek alphabet hem showim dat Jehovah nomoa hem start and end. (Revelation 21:6) Longtaem kam finis, hem nao Olmaeti God, and hem bae continue olsem Olmaeti God forever. Hem nomoa only wan wea stap “start from bifor kam and for olowe.”​—Psalm 90:2.

Hu nao “first wan and last wan”?

Bible iusim disfala term for Jehovah God and Son blo hem, Jesus, bat mining blo tufala hem difren. Lukim tufala example hia.

• Lo Isaiah 44:6, Jehovah hem sei: “Mi nao first wan, and mi nao last wan. No eni God moa stap, bat mi nomoa.” Lo verse hia Jehovah helpem iumi for luksavve dat hem nao everlasting tru God, no eni narawan moa olsem hem. (Deuteronomy 4:​35, 39) From datwan, disfala expression “first wan and last wan” hem garem sem mining olsem “datfala Alpha and datfala Omega.”

• And tu, disfala term “First wan [pro’tos, no alpha] and Last wan [e’skha·tos, no omega]” hem occur lo Revelation 1:​17, 18 and 2:8. Lo olketa verse hia, context showim dat wanfala man hem dae and gogo hem laef bak. Dastawe, olketa verse hia no refer lo God bikos hem no savve dae. (Habakkuk 1:​12) Bat, Jesus nao hem dae and laef bak finis. (Acts 3:​13-​15) Hem nao first human for laef bak lo spirit body and go ap lo heven, wea distaem hem stap lo there “for olowe.” (Revelation 1:​18; Colossians 1:​18) Jesus openem wei for evri human savve laek bak moa. (John 6:​40, 44) Dastawe, hem nao last wan wea Jehovah mekem hem for laef bak. (Acts 10:40) From datwan, hem stret for sei Jesus hem “First wan and Last wan.”

Hao, Revelation 22:13 pruvim dat Jesus nao “datfala Alpha and datfala Omega”?

No. Lo Revelation 22:13, man wea story no specifically talem hu nao datwan, and lo disfala chapter staka difren man nao story. Professor William Barclay koment lelebet abaotem disfala sekson blo Revelation, hem sei: “Olketa tings wea happen, olketa no raetem followim order; . . . and staka taem hem hard for savve hu nao actual speaker.” (The Revelation of John, Volume 2, Revised Edition, page 223) Dastawe, “datfala Alpha and datfala Omega” lo Revelation 22:13, iumi savve sei hem sem Person wea garem title hia wea iumi lukim lo olketa nara verse lo Revelation, Jehovah God.