Wat Nao Niu Jerusalem?

Ansa from Bible

Disfala expression “Niu Jerusalem,” hem appear tu taems insaed Bible. Hem wanfala symbolic city wea representim grup blo olketa follower blo Jesus wea bae go lo heven for rul witim hem lo Kingdom blo God. (Revelation 3:​12; 21:2) Bible kolem tu disfala grup lo bride blo Christ.

Key for identifyim Niu Jerusalem

1. Niu Jerusalem hem lo heven. Each taem wea Bible story abaotem Niu Jerusalem, hem sei hem kam daon from heven, and olketa angel gaedem olketa gate blo city hia. (Revelation 3:​12; 21:​2, 10, 12) And tu, size blo disfala big city hem pruvim dat hem no fit for stap lo earth. Measurement blo hem “12,000 stadia,” or “furlong,” raonem.a (Revelation 21:16; King James Version) Olketa saed blo hem almost 560 kilometers (350 mi) hae, extend go ap kasem spes.

2. Niu Jerusalem hem wanfala grup blo olketa follower blo Jesus, hem bride blo Christ. Bible kolem Niu Jerusalem “datfala bride, wea hem bae waef blo datfala Lamb.” (Revelation 21:​9, 10) Lo disfala symbolic description, Lamb hem refer lo Jesus Christ. (John 1:​29; Revelation 5:​12) ‘Waef blo Lamb,’ or bride blo Christ, hem representim olketa Christian wea bae unite witim Jesus lo heven. Bible comparem relationship between Jesus and olketa Christian hia hem olsem relationship between hasband and waef. (2 Corinthians 11:2; Ephesians 5:​23-​25) And tu, olketa raetem lo olketa ston lo faondeson blo Niu Jerusalem “12-fala nem blo 12-fala aposol blo datfala Lamb.” (Revelation 21:14) Disfala detail helpem iumi for confirmim identity blo Niu Jerusalem, since olketa Christian wea bae laef lo heven “God buildim antap lo datfala faondeson blo olketa aposol and olketa profet.”​—Ephesians 2:​20.

3. Niu Jerusalem hem part lo wanfala gavman. Ancient Jerusalem hem kapitol blo Israel, ples wea King David, son blo hem Solomon, and olketa descendant blo hem rul lo “throne blo Jehovah.” (1 Chronicles 29:23) Jerusalem, wea olketa kolem lo “datfala holy taon,” hem representim rul blo God lo famili laen blo David. (Nehemiah 11:1) Bible kolem tu Niu Jerusalem, “datfala holy taon,” bikos hem refer lo olketa wea bae joinim Jesus lo heven for “kamap olketa king for rul ovarem disfala earth.”​—Revelation 5:​9, 10; 21:2.

4. Niu Jerusalem givim olketa blessing for pipol lo earth. Wei wea Niu Jerusalem hem “kamaot from heven, from God,” hem showim dat God bae iusim for duim olketa samting lo earth. (Revelation 21:2) Disfala expression joinim Niu Jerusalem witim Kingdom blo God, wea God iusim for accomplishim will blo hem ‘lo earth, olsem hem duim lo heven.’ (Matthew 6:​10) Purpose blo God for pipol lo disfala earth hem includim olketa blessing hia:

   • Removim sin. “Wanfala river wea garem wata blo laef” hem flow kam from Niu Jerusalem and supplyim wata for “olketa tree blo laef” wea hem “for healim pipol lo olketa nation.” (Revelation 22:​1, 2) Disfala physical and spiritual healing bae removim sin and mekem pipol for kasem bak perfect laef, olsem wat God planim lo firstaem.​—Romans 8:​21.

   • Gud relationship between God and olketa human. Sin separatem olketa human from God. (Isaiah 59:2) Taem God aotem sin from pipol datwan bae mekem disfala profesi for completely fulfill: “Tent blo God hem stap witim olketa pipol. And hem bae stap witim olketa, and olketa bae kamap pipol blo hem. And God nao bae stap witim olketa.”​—Revelation 21:3.

   • End blo safaring and dae. Thru lo Kingdom blo hem, God “bae draem evri tias from eye blo olketa, and dae bae nomoa nao, krae and sorre and pain tu bae nomoa.”​—Revelation 21:4.