Hao, Iu Savve Laef for Olowe?
Ansa from Bible
Bible promis olsem: “Man wea duim wat God laekem bae laef olowe.” (1 John 2:17, Holy Bible—Easy-to-Read Version) Wat nao God laekem iu for duim?
Lane abaotem God and Son blo hem Jesus. Lo prea blo Jesus, hem sei: “Diswan nao hem for kasem laef olowe, olketa mas gohed lane abaotem iu, wea iu nomoa datfala tru God, and lane abaotem Jesus Christ, wea iu sendem kam.” (John 17:3) Wat nao involve insaed lo wei for “gohed lane abaotem” God and Jesus? Iumi savve lane abaotem tufala, taem iumi studyim Bible and applyim message insaed Bible lo laef blo iumi.a Bible hem talem iumi wat Creator blo iumi, Jehovah God, man wea givim laef lo iumi hem laekem. (Acts 17:24, 25) Bible hem talem iumi tu abaotem Son blo hem, Jesus wea teachim pipol ‘olketa toktok wea savve leadim man for kasem laef olowe.’—John 6:67-69.
Showim faith lo ransom sakrifaes blo Jesus. Jesus kam lo earth “for helpem pipol and for givim laef blo hem olsem ransom.” (Matthew 20:28) Ransom sakrifaes blo Jesus openem wei for olketa human laef olowe lo Paradaes lo earth.b (Psalm 37:29) Jesus sei: “God lovem tumas pipol lo world dastawe hem givim kam spesol Son blo hem, mekem evriwan wea showimaot faith lo hem no dae bat kasem laef olowe.” (John 3:16) Disfala verse showim dat man need for duim moa samting winim for biliv nomoa lo Jesus. Iumi mas “showimaot faith lo hem,” chus for live followim olketa teaching blo hem, and duim will blo Dadi blo hem.—Matthew 7:21; James 2:17.
Buildim strong frenship witim God. God laekem iumi for kam klos lo hem and kamap fren blo hem. (James 2:23; 4:8) God hem stap for olowe. Hem bae no dae, and hem laekem olketa frens blo hem tu for laef olowe. Thru lo Word blo hem, God talem wat nao hem laekem for evriwan wea lukaotem hem. Hem sei: “Iufala bae enjoyim laef for olowe.”—Psalm 22:26.
Tingting wea No Stret Abaotem Laef Olowe
Tingting wea no stret: Wat olketa human duim bae mekem pipol for laef olowe.
Tru samting: Nomata samfala doctor promis for increasim human laef span, olketa kaen effort olsem bae nating mekem man laef for olowe. Only God nomoa savve givim iumi everlasting laef, bikos only hem nomoa “source blo laef.” (Psalm 36:9) Hem promis for “swallom daon dae for olowe” and givim everlasting laef lo evri man wea faithful.—Isaiah 25:8; 1 John 2:25.
Tingting wea no stret: Pipol blo samfala race nomoa bae laef olowe.
Tru samting: God no fevarem eniwan. Bat, “lo evri nation, man wea fraet lo hem and duim samting wea stret bae God acceptim hem.” (Acts 10:34, 35) Pipol blo evri ethnic and cultural baekgraon wea obeyim God savve laef olowe.
Tingting wea no stret: Laef olowe bae hem boring.
Tru samting: Blessing for laef olowe hem kam from God, wea lovem iumi and laekem iumi for hapi. (James 1:17; 1 John 4:8) Hem savve dat in order for iumi hapi, iumi need for duim olketa gudfala waka. (Ecclesiastes 3:12) God promisim dat olketa wea laef olowe lo earth bae duim waka wea mekem olketa satisfae, waka wea bae benefitim olketa and olketa loved wans blo olketa.—Isaiah 65:22, 23.
And nara samting, pipol wea laef olowe bae continue for lanem olketa niu tings abaotem Creator blo olketa and olketa bigfala samting wea hem wakem. Hem wakem olketa human for garem desire for laef olowe and for lane abaotem hem, nomata olsem olketa “hard for faendaot lo evri waka wea tru God hem duim from start go kasem end.” (Ecclesiastes 3:10, 11) Dastawe, olketa wea laef olowe bae always garem olketa interesting tings for lanem and duim.
a Olketa Jehovah’s Witness offerim wanfala free Bible study program. For moa information, watchim disfala video Hao Nao Mifala Conductim Wanfala Bible Study?
b Lukim article “Wat Nao Jesus Duim for Sevem Iumi?”