Paoa Bilong Music
“Music nomoa witim wei for kwiktaem pullim feeling savve kwaetim mind wea hard for settle.”
WILLIAM CONGREVE raetem disfala toktok samting olsem 300 year bifor insaed buk bilong hem Hymn to Harmony. Planti handred year bifor diswan, olketa oldfala raeting bilong Greece sei “training saed long music hem givim moa paoa winim eni narawan, bikos beat and note bilong music go deep insaed soul bilong iumi.”
Olketa dadi and mami lukim diswan hem tru for olketa teenager bilong olketa wea hard feis and bighed taem olketa evritaem herem hevi metal music. Hem showaot tu long Germany insaed olketa year bilong 1930 and 1940 taem olketa Nazi iusim music for march wea muvim feeling wea redyim bigfala crowd for herem strongfala tok bilong Adolf Hitler.
Tru nao, music savve affectim and pullim mind and heart long gud or nogud wei. Olsem example, pipol biliv hao samfala kaen music savve mekem wei wea pikinini grow saed long tingting and feeling kamap moabeta. Nomata olketa wea short tongue samfala taem savve singim toktok wea olketa kanduit talem.
Insaed buk Music and the Mind, Anthony Storr sei wei wea music affectim pipol wea no muvim gud body bilong olketa mekem man barava sapraes. Hem storyim wanem happen long wanfala woman wea sik: “Hem no savve muv from hem kasem [Parkinson’s] disease go kasem taem hem tingim olketa tune wea hem savve long hem taem hem young. Diswan seknomoa mekem hem fit for muv moa.”
Samting for Wari Abaotem
So luk olsem paoa bilong music garem gud saed. Nomata olsem, danger stap long wei wea nogud or greedy pipol maet iusim paoa bilong music for spoelem man. Samfala study wea luk insaed diswan showimaot samfala music kosim man for againstim pipol.
Long wei wea saportim diswan, Psychology of Women Quarterly magasin hem sei: “Samfala pruv stap for showimaot wei for lukluk long olketa rok video hem affectim man long sem wei olsem wei for lukluk long dirty piksa, from olketa man wea lukluk long olketa rok video showimaot wei for no garem feeling and raf long olketa woman winim olketa man wea no lukim raf rok video.”
Bat diswan no affectim man nomoa. Hem affectim olketa woman tu. Datfala sem report sei moa: “Olketa man and woman tu maet start for acceptim olketa nogud message wea olketa song hia talem for daonem woman.”
Datfala buk Sex Roles agree witim diswan taem hem sei: “Wanfala study no longtaem go nomoa . . . faendemaot hao nogud famili living wea join witim wei for lukim music video evritaem hem join witim olabaot tingting and fasin saed long sex midolwan olketa young girl.” Barava raf fasin and nogud toktok saed long sex bilong samfala rap music kosim wanfala judge long U.S. for givim disison hao wanfala rap kaset hem “olsem rotten samting insaed community.”
Waswe, datfala judge ova tumas? Nomoa! Datfala buk Adolescence hem sei “olketa young wan and dadi and mami bilong olketa evriwan reportim hao young pipol wea lisin long hevi metal and rap music kasem moa hevi long living.” Hevi hia hem “olketa fasin wea againstim and laek for distroem samting” and for no kasem gud result long skul.
Tru tumas, olketa study showimaot klia wei wea music and sex, suisaed, and nogud fasin olketa join tugeta. Bat waswe, diswan minim evri music hem join long nogud samting? Readim wanem olketa nextfala article talem abaotem diswan.
[Blurb long page 4]
Music savve affectim mind and heart long gud or nogud wei