Smile—Hem Gud for Iu!

FROM MAN WEA RAET FOR WEKAP! LONG JAPAN

TAEM hem tru wan, hem finisim wei for no trust. Hem aotem staka prejudice wea hipap insaed planti year. Hem mekem heart wea strong from wei for no biliv and no trust kamap soft. Hem givim gud feeling and hapi long staka. Hem sei, “Mi minim. No wari.” Hem barava ask, “Mi hope iu savve kamap fren bilong mi.” And wanem nao disfala barava strong tul? Hem wanfala smile. Hem savve kamap smile bilong IU.

Wanem nao wanfala smile? Olketa dictionary savve minim wanfala smile olsem ‘wanfala lukluk bilong feis wea tufala end bilong mouth tan ap lelebet, wea showimaot wei for enjoy, agree, or hapi.’ Secret bilong naes smile hem insaed long diswan. Wanfala smile hem wei for showimaot feeling bilong iu or for letem pipol savve long feeling bilong iu long wei wea no iusim toktok. Hem tru, wanfala smile maet showimaot iu les long samting tu, bat datwan difren story moa.

Waswe, wei for smile really savve affectim eniting? Waswe, iu rememberim taem smile bilong samwan hem mekem iu no fraet or iu feel relax? Or taem iu no lukim wanfala smile and diswan mekem iu seksek or feel olsem pipol les long iu? Yes, wanfala smile really savve affectim samting. Hem affectim man wea smile and datwan wea hem smile for hem. Job wea Bible storyim hem sei olsem abaotem olketa enemy bilong hem: “Mi smile long olketa—olketa no bilivim—and laet from feis bilong mi olketa no savve aotem.” (Job 29:24) “Laet” from feis bilong Job maet minim braet or hapi bilong hem.

Kam kasem distaem smile hem affectim pipol long gudfala wei. Wanfala smile wea showimaot feeling savve help for daonem hevi saed long feeling. Hem savve kamap olsem safety valve bilong wanfala pressure cooker pot. Taem iumi feel hevi or kros, wanfala smile savve help for katem daon datfala hevi and for deal witim kros. Olsem example, Tomoko planti taem lukim nara pipol lukluk strong long hem. Hem tingse olketa judgem hem, from olketa savve kwiktaem luk awe taem hem kotem eye bilong olketa. Tomoko feel lonely and no hapi. Wanday wanfala fren talem hem for trae smile taem hem kotem eye bilong pipol. Tomoko traem for tufala week and sapraes hao evriwan smile bak long hem! Hevi feeling finis nao. “Laef barava kamap moabeta,” hem sei. Yes, wanfala smile mekem iumi feel moa relax witim pipol and hem helpem iumi kamap moabeta long wei for fren.

Gudfala Wei wea Hem Affectim Iu and Nara Pipol

Wei for smile savve affectim feeling bilong man. Hem helpem man for garem gudfala wei for tingting. Hem gud for health tu. Wanfala toktok hem sei, “Wei for laf hem gud medicine.” Tru nao, olketa bigman saed long medical sei mind bilong man hem affectim health bilong hem long bigfala wei. Staka research showimaot wei for feel hevi for longtaem, garem nogud feeling, and olketa samting olsem savve mekem wei wea body faetem sik for wikdaon. Long narasaed, wei for smile mekem iumi feel gud, and wei for laf savve strongim wei wea body bilong iumi faetem sik tu.

Wanfala smile savve barava affectim pipol. Tingim sapos samwan kaonselem iu. Wanem lukluk long feis nao iu laekem man wea givim kaonsel for garem? Wanfala strongfala lukluk savve showimaot wei for kros, les, rejectim, or heit. Long narasaed, waswe, hem tru hao wanfala smile wea showimaot feeling long feis bilong man wea givim kaonsel bae mekem iu feel moa relax and there nao moa isi for acceptim kaonsel? Tru nao, wanfala smile hem help for katem daon rongfala tingting long taem bilong problem.

Gudfala Tingting Mekem Man Isi for Smile

Hem tru, staka long iumi no olsem olketa actor wea savve givim naes smile enitaem; and iumi no laek olsem tu. Iumi wantem smile bilong iumi for natural and for tru wan. Wanfala teacher bilong wei for fren gud hem sei: ‘Hem important for relax and givim smile wea kam from heart, sapos nomoa smile bilong iu bae no luk natural.’ Hao nao iumi savve smile tru from heart? Bible savve helpem iumi long diswan. Matthew 12:34, 35 sei olsem abaotem toktok bilong iumi: “Samting wea fulap insaed long heart nao mouth hem talem. Gudfala man hem sendem aot gudfala samting from gudfala riches bilong hem, bat nogud man hem sendem aot nogud samting from olketa nogud riches bilong hem.”

Remember, wanfala smile hem wei for showimaot feeling bilong iumi long wei wea no iusim toktok. Taem iumi tingim hao samting iumi talem hem kamaot from “samting wea fulap insaed long heart” and hao olketa “gudfala samting” hem kamaot from olketa “gudfala riches,” hem klia hao key for garem trufala smile hem insaed tingting and feeling bilong iumi. Yes, wanem insaed heart bilong iumi bae sure for showaot, no only thru long toktok and fasin bat tu long feis bilong iumi. So, iumi need for go ahed for kamap moabeta long wei for garem gudfala tingting evritaem. Wei wea iumi tingim pipol hem barava affectim lukluk long feis bilong iumi. So letem iumi ting strong long olketa gud fasin bilong olketa famili member, neiba, and gud fren bilong iumi. Iumi bae faendem hem moa isi for smile long olketa. Hem bae wanfala tru smile, from bihaen long hem hem wanfala heart wea fulap witim gudfala fasin, mercy, and kaenfala fasin. Eye bilong iumi bae shaen, and nara pipol bae savve iumi barava minim.

Bat, iumi mas luksavve hao, from living or ples wea olketa kam from, samfala pipol faendem moa hard for smile. Nomata sapos olketa fulap witim gudfala tingting for neiba bilong olketa, olketa no getius nomoa for smile. Olsem example, kastom bilong Japan sei olketa man mas evritaem bossim feeling and stap kwaet. Dastawe, staka long olketa no getius for smile long pipol olketa no savve. Maet samfala difren ples tu olsem. Or maet samfala garem fasin for shame and maet no faendem isi for smile long pipol. So iumi shud no judgem pipol long hao big nao smile bilong olketa or haomas taem nao olketa smile. Evri pipol difren, and hao and wei for story bilong olketa tu hem difren.

Nomata olsem, sapos wei for smile long pipol hem wanfala challenge for iu, hao sapos iu duim samting abaotem? Bible givim advaes: “Letem iumi no givap for duim wanem hem gud . . . Letem iumi duim samting wea hem gud long evriwan.” (Galatians 6:9, 10) Wanfala wei for duim “wanem hem gud” long pipol hem for smile long olketa—and hem samting iu savve duim! So no hol bak for greetim pipol and encouragem olketa witim smile. Hem samting wea pipol bae tinghae long hem. And tu, iu bae faendaot hao wei for smile bae moa isi taem iu mekem grow disfala fasin.

[Box long page 12]

Wanfala Warning

Hem sorre samting hao no evri smile hem tru wan. Olketa conman and pipol olsem savve smile naes tumas. Olketa savve hao wanfala smile savve mekem pipol trustim olketa mekem hem isi for trikim olketa. Pipol wea garem nogud fasin or wea dirty fasin muvim olketa savve smile naes tumas tu. Bat, smile bilong olketa hem emti, hem for giamanim man. (Ecclesiastes 7:6) So witim wei for no ova tumas for daotem pipol, iumi need for luksavve hao iumi stap insaed “olketa last day,” wea hard for deal witim, iumi need for “careful olsem snek bat no garem blame olsem kurukuru,” olsem Jesus seleva hem talem.—2 Timothy 3:1; Matthew 10:16.

[Piksa long page 13]

No hol bak for greetim pipol witim smile