Gud Samting Kamaot From Wanfala Smile!

Helen standap witim trolley and hem smile. Tufala young gele wakabaot go pas lo hem.

WANFALA taem tufala young gele wakabaot lo taon blo Baguio City, lo Philippines. Tufala go pas lo sista wea standap witim trolley. Sista hia nem blo hem Helen and hem smile big lo tufala. Nomata tufala no go story lo hem, tufala hapi for lukim smile blo Helen.

Taem tufala gele insaed lo bas for go bak lo haos, tufala lukim big saen lo wanfala Kingdom Hall wea garem toktok jw.org. Tufala luksavve hem sem toktok wea olketa bin lukim lo trolley. Tufala go daon from bas and go chekim nara saen lo gate blo Kingdom Hall wea showim taem blo olketa meeting.

Tufala young gele hia smile taem tufala lukim Helen lo Kingdom Hall.

Bihaen datwan, tufala kam lo wanfala meeting. Taem tufala go insaed lo Kingdom Hall tufala sapraes for lukim Helen lo there! Tufala luksavve Helen nao woman wea smile big lo tufala. Helen sei: “Taem tufala wakabaot kam lo mi, mi lelebet fraet bikos mi no savve lo tufala, and mi wari maet mi duim eni rong samting.” Bat then tufala explainim wanem nao mekem tufala luksavve lo Helen.

Tufala enjoyim meeting and hapi for meetim olketa brata and sista. Bihaen lo meeting, tufala lukim samfala klinim Kingdom Hall, and tufala laek for help tu. Distaem wanfala gele hia no stap lo Philippines, bat nara gele start for studyim Bible and kam lo olketa meeting. Gud samting hia kamaot from wanfala smile nomoa!