Paoa Bilong Wanfala Smile
HEM samting wea happen for lelebet taem nomoa, bat bae iu rememberim for olowe. Hem garem hae price, bat nomata poor man savve sharem or nomata man wea rich hem barava needim tu. Wanem nao iumi story abaot? Wanfala smile.
Smile hem kamap taem masol long feis hem pull, hem mekem eye kamap braet and apim kona long mouth for showimaot man hem hapi. Long first tu-thri week bihaen hem born, wanfala baby hem smile, and diswan mekem Dadi and Mami hapi fogud. Baby hem no min for smile olsem. Olketa savveman sei diskaen smile hem kamap taem baby sleep and dream and diswan join witim feeling bilong hem and wei wea central nervous system go ahed for waka. Nomata taem iumi full-grown, diskaen smile maet kamap bihaen iumi kaikai or taem iumi lisin long music.
Bat, start taem hem kasem six week, baby savve smile from hem lukim wanfala feis or herem wanfala voice. Disfala wei for min for smile long pipol hem mekem iumi feel hapi, nomata iumi baby or full-grown man. Pipol sei kaen smile olsem hem helpem health bilong iumi. Mirtha Manno and Rubén Delauro, tufala doctor saed long wei for toktok, wea garem wanfala skul for helpem pipol kasem gud health thru long wei for smile and nara samting, wea nem bilong skul hia Smiling and Health, tufala sei wei for smile hem sendem wanfala electrical message go long pituitary gland. Then disfala gland hem mekem olketa endorphin, olketa chemical insaed long brain wea mekem iumi feel gud.
Narafala important reason for smile hem gudfala samting wea diswan duim long nara pipol. Wei for smile gud long samwan hem showimaot feeling bilong iumi long hem, nomata iumi no talem eni toktok. Iumi savve smile for sei hello, for sei sorre, or for encouragem man. Samfala taem, taem iumi lukluk long smile bilong wanfala pikinini insaed long wanfala foto, diswan mekem iumi smile tu.
Wei for kasem naes smile from samwan savve helpem iumi for feel moa relax and deal moabeta witim feeling for kros or olketa challenge wea iumi feisim. Bible sei: “No holem bak gudfala samting from olketa wea fit for kasem, sapos iu savve duim diswan.” (Proverbs 3:27) Tru nao, thru long disfala simpol samting, iumi savve givim gud samting long iumiseleva and nara pipol. Hem gud for traem best for sharem disfala nambawan present—hem nao naesfala smile!