Ansa Hem Kam Nao!

TINGIM wanfala world wea pipol really wantem, really lovem evri pikinini, and olketa pikinini kasem blessing bilong dadi and mami wea garem love and really want for provaedem best help and instruction for pikinini bilong tufala. Tingim wanfala world wea evri pikinini hem gud saed long body and mind, no eni pikinini stap long street, and wea olketa pikinini no missim young laef bilong olketa from olketa poor and mas waka!

Hem samting for wantem? Barava nao. Iumi fit for bilivim? Olketa Jehovah’s Witness ting olsem, and for tufala reason.

Olketa Dadi and Mami Savve Provaedem Part Long Datfala Ansa

Bae iu agree hao full-grown pipol garem paoa for stretem—samfala taem maet for stopem tu—samfala problem bilong olketa pikinini. Bat, diswan needim olketa wea full-grown for willing for duim olsem. Yes, olketa dadi and mami seleva savve duim samfala samting for stretem problem hia.

Olsem example, full-grown pipol wea followim kaonsel from Bible for “wanfala waef mas no lusim hasband bilong hem . . . and wanfala hasband mas no lusim waef bilong hem” no garem olketa pikinini wea safa from olketa stap long famili wea brekdaon long wei for separate or divorce.—1 Corinthians 7:10, 11.

Full-grown pipol wea willing for followim kaonsel bilong Bible for “wakabaot stret, no long wild party and wei for drunk,” no garem olketa pikinini wea safa long olketa problem from dadi and mami bilong olketa garem fasin for drunk or depend long drug.—Romans 13:13; Ephesians 5:18.

Full-grown pipol wea willing for followim kaonsel bilong Bible for “stap klia from fornication” help for daonem chance for pikinini bilong olketa growap long wei wea no eniwan wantem hem, maet long famili wea no garem wanfala dadi or mami.—1 Thessalonians 4:3; Matthew 19:9.

Full-grown pipol wea willing for followim kaonsel bilong Bible for, “No mekem pikinini bilong iufala kros evritaem, nogud heart bilong olketa kamap hevi,” and wea “lovem pikinini bilong olketa” bae no garem olketa pikinini wea kasem pain long mind or body from olketa difren wei wea spoelem olketa.—Colossians 3:21; Titus 2:4.

Main point hem, sapos evri full-grown man bae willing for followim kaonsel long Bible wea Jesus givim, “Dastawe, evri samting wea iufala wantem olketa man for duim long iufala, iufala tu mas duim olsem long olketa,” waswe, bae planti million pikinini stap wea no eniwan wantem or lovem?—Matthew 7:12.

Hem hapi samting hao planti full-grown pipol willing for duim evriting wea stap antap. Bat, sorre samting, no evriwan willing, and long there nao hem problem. And nomata olketa wea willing, olketa faendem hao wei wea man no perfect and planti samting wea olketa seleva no savve kontrolem, planti taem spoelem hard waka bilong olketa. Olketa man savve provaedem part long ansa long olketa problem bilong olketa pikinini, bat hem klia tumas hao olketa no savve provaedem full ansa.

Wanfala Gavman Bilong God for Provaedem Full Ansa

Man for raet John Ruskin, wea iumi storyim long lastfala article, hem biliv strong hao “firstfala waka bilong wanfala Gavman hem for mek sure evri pikinini wea born garem haos, kaleko, kaikai, and education, go kasem taem hem fit for disaed for hemseleva.” Bat, Ruskin luksavve hao, “for [duim] diswan Gavman mas garem kaen paoa ovarem pipol wea distaem iumi hard tumas for lukim.”

Wanfala gavman from God nomoa savve garem kaen paoa wea Ruskin storyim. And promis stap for kaen gavman olsem—datwan wea Jesus storyim long Matthew 6:9, 10. Taem disfala gavman wea God wakem garem full kontrol long earth, bae hem iusim paoa bilong hem ovarem evri pipol—givim haos, kaleko, kaikai, and education long evriwan, and olketa pikinini tu. (Isaiah 65:17-25) Bat perfect gavman hia bae duim moa samting.

Anda long Kingdom bilong God olketa man bae fit for bringimap olketa pikinini long wei wea balance. (Job 33:24-26) Olketa young pipol bae growap long wei bilong peace and olsem wanfala famili raonem full world, datfala goal wea olketa talemaot long UN Declaration of the Rights of the Child. (Psalm 46:8, 9) No enitaem moa bae eni need kamap for wanfala International Year of the Child or for wanfala Convention on the Rights of the Child.

For givim bak perfect health long olketa dadi and mami and long olketa pikinini wea disable bae isi samting for Christ Jesus, King bilong disfala gavman long heven. Olketa mirakol bilong healing wea hem duim taem hem stap long earth, mekem iumi sure hem bae duim moa. (Luke 6:17-19; John 5:3-9; 9:1-7) Nomata for resurrectim olketa pikinini and dadi and mami wea dae finis bae no hard tumas for hem duim!—Matthew 9:18-25.

Iumi hapi tumas for savve hao taem for God duim samting for olketa pikinini long earth hem klosap!

[Box/Piksa long page 12]

Help for Young Pipol

Olketa Jehovah’s Witness barava interest for helpem young pipol for missim olketa problem and for showim best wei for deal witim olketa problem wea olketa kanduit missim. Dastawe, long olketa year wea go finis, olketa pablisim samfala samting for helpem young pipol—for olketa wea smol wea no skul yet and olketa teenager tu. Insaed olketa pablikeson hia hem Bible Story Buk bilong Mi and Questions Young People Ask—Answers That Work and tu wanfala video wea garem title Young People Ask—How Can I Make Real Friends? Iu savve kasem olketa hia from Olketa Jehovah’s Witness wea stap long area bilong iu or sapos iu raet long olketa wea pablisim disfala magasin.

For saed bilong olketa pikinini bilong olketa seleva, long wei for evritaem storyim olketa problem, Olketa Jehovah’s Witness showimaot long pikinini hao olketa wantem and lovem olketa. Olketa dadi and mami planti taem iusim information wea stap long olketa pablikeson antap for study olsem wei for provaedem program for trainim olketa young wan. Maet iu laek for duim sem samting witim olketa pikinini bilong iu.