Wei for Story Tugeta wea Lead Go Long Laef

LONG evri creation long earth, olketa man nomoa laekem moa samting winim wei for story witim each other. Nomata wea olketa kam from, position olketa garem, sapos olketa man or woman, or sapos olketa skul gud or nomoa, olketa man showimaot olketa born witim wei wea olketa laek for story witim God.

Waswe, datwan hem wanfala krangge tingting? Barava nomoa nao! God wakem olketa man long image bilong hem. Hem putim insaed long iumi feeling for minim olketa spiritual samting. Insaed diswan hem wei wea iumi laek for story tugeta witim Dadi bilong iumi long heven. (Genesis 1:27; Matthew 5:3) For tok stret, God tingim wei for story tugeta witim hem olsem barava important dastawe hem nao “Datwan wea Herem prea.”—Psalm 65:2.

Hem wanfala privilege for iumi prea long Olmaeti Wan! Planti pipol bae tingim olsem hem wanfala privilege for story witim wanfala important man, olsem wanfala president or prime minister. Bat, Jehovah God nao hae winim eniwan moa long universe! And iumi no need for markem taem for story witim hem. Iumi savve prea long hem enitaem, eniwea. Iumi savve prea long hem long kwaet wei from heart. (1 Samuel 1:12-15) Bat, Jehovah laekem iumi for honest and obey long hem long wei for lisin. (Micah 6:8; Matthew 6:5-13) Gudfala wei for story tugeta hem wei wea tufala man nao story.

Waswe, Iu Lisin Long God?

Hao nao iu savve lisin long God? Main wei nao taem iu readim and followim olketa teaching wea stap insaed Word bilong hem, Holy Bible. (2 Timothy 3:16; 2 Peter 1:20, 21) Jesus sei: “Man mas laef . . . long evri toktok wea kamaot from mouth bilong Jehovah.” (Matthew 4:4) Waswe, iu lisin long God taem iu read and followim toktok bilong hem insaed long Bible?

Olketa wea story tugeta olowe witim Jehovah savve kasem hapi bilong hem and enjoyim “peace bilong God wea winim evri tingting bilong man.” (Philippians 4:6, 7; Proverbs 1:33) Olketa garem hope tu for laef olowe long wanfala paradaes earth, wea free from enikaen wari and safa wea iumi kasem distaem. (Psalm 37:29; John 17:3) Olketa hia olketa nambawan blessing for wei wea iumi iusim gud disfala spesol wei for story tugeta!

[Piksa long page 20]

Wei for readim Bible and prea hem insaed long wei for story tugeta witim God