Kingdom Bilong God Bae Mekem Peace Kamap

Klosap nao, Kingdom bilong God bae rulim full earth, and olketa man bae garem peace and stap gud. Sams 72:7 sei evriwan bae “garem gudfala laef.” Bat, wanem taem nao bae Kingdom bilong God start for rul ovarem earth? Wanem nao bae happen long datfala taem? And wanem nao iu savve duim for stap anda long Kingdom?

WANEM TAEM NAO BAE KINGDOM KAM?

Bible storyim wanfala saen wea showimaot Kingdom hem klosap for kam. Hem sei iumi bae lukim olketa war, bigfala hangre, olketa nogud sik, staka earthquake, and staka pipol bae duim nogud samting.—Matthew 24:3, 7, 12; Luke 21:11; Revelation 6:2-8.

Nara profesi sei: “Long olketa last day bae hem barava difren and bae evri samting hem hard tumas. Pipol bae tingim olketa seleva nomoa, laekem tumas selen, . . . and no obeyim dadi and mami. Olketa bae no savve tinghae, bae no faithful, no garem love insaed long famili, and no willing for agree. Olketa bae laea for spoelem narawan, no savve kontrolem seleva, raf, and no laekem gud samting, . . . bighed, and praod tumas. Olketa bae no lovem God, bat bae interest nomoa for enjoyim seleva.” (2 Timothy 3:1-4) Distaem, staka pipol garem olketa nogud wei hia.

Olketa samting hia start for happen long 1914. Staka savveman sei world hem barava change start long datfala year. Olsem example, Peter Munch sei: “Bifor datfala war start long 1914, evri samting long world hem gud tumas. Bat bihaen datwan, world hem barava change and evri samting start for nogud nao.”

Nomata olsem, olketa nogud samting hia showimaot klosap nao Kingdom bilong God bae rulim earth. Bat Jesus storyim wanfala gud samting wea bae happen firstaem. Hem sei: “Olketa disaepol bilong mi bae talemaot disfala gud nius abaotem Kingdom long evri ples long world mekem pipol long evri kantri mas herem. Bihaen datwan nao, world bae finis.”—Matthew 24:14.

Datfala gud nius abaotem Kingdom, hem nao main message bilong Olketa Jehovah’s Witness. Dastawe main pablikeson bilong olketa garem title Wastaoa wea Talemaot Kingdom Bilong Jehovah. Hem storyim gudfala samting wea Kingdom bilong God bae duim for olketa man.

WANEM NAO BAE HAPPEN TAEM KINGDOM HEM KAM?

Taem Kingdom hem kam:

1. No eni bigman bilong olketa gavman long world bae rul insaed long datfala Kingdom.

2. Olketa bigman bilong olketa gavman long world bae no laekem Kingdom for rul bikos olketa no laek for lusim paoa bilong olketa.—Sams 2:2-9.

3. Kingdom bilong God bae faetem olketa gavman wea laek gohed rulim olketa man, and bae finisim olketa. (Daniel 2:44; Revelation 19:17-21) Bible sei datfala war hem Armageddon.—Revelation 16:14, 16.

4. Olketa wea laekem Kingdom bilong God for rul bae no dae long Armageddon, and bihaen datwan peace bae kamap long earth. Bible sei olketa hia bae “wanfala big crowd,” wea maet hem staka million pipol.—Revelation 7:9, 10, 13, 14.

WANEM NAO IU SAVVE DUIM FOR STAP ANDA LONG KINGDOM?

First samting iu need for duim hem for lanem moa samting abaotem God. Jesus prea olsem long God: “For olketa kasem laef olowe, olketa mas lane abaotem iu, wea iu nomoa trufala God, and lane abaotem Jesus Christ, wea iu sendem kam.”—John 17:3.

Taem iumi savve gud long Jehovah God iumi bae kasem staka gud samting. Tingim tufala hia: First samting, iumi bae garem strongfala faith long God. Datfala faith hem mekem iumi sure Kingdom bilong God hem stap and klosap nao bae hem rul ovarem earth. (Hebrew 11:1) Mek-tu samting, love wea iumi garem for God and for narawan bae kamap strong. Sapos iumi lovem God iumi bae willing for obeyim hem. Sapos iumi lovem olketa narawan datwan bae muvim iumi for followim disfala toktok bilong Jesus wea sei: “Samting wea iufala laekem pipol for duim long iufala, sem samting nao iufala mas duim long olketa.”—Luke 6:31.

From God hem Dadi wea lovem iumi, hem laekem iumi for garem gudfala laef. Bible sei hem laekem iumi for garem “datfala tru laef.” (1 Timothy 6:19) Staka million pipol distaem no garem gudfala laef and olketa stragol for kasem wanem olketa needim. Next article bae storyim olketa gudfala samting wea iumi bae kasem taem Kingdom hem rul and iumi garem “datfala tru laef.”