5. Waswe, Bae Iumi Gohed for Safa?

Why Iumi Need for Savve

Sapos iumi savve God bae finisim wei for safa, bae iumi no blamem God taem iumi safa and bae iumi garem hope for future.

Samting for Tingim

Nomata pipol laek for finisim wei wea iumi safa, hem hard for olketa duim datwan. Tingim olketa samting hia:

Nomata olketa doctor duim staka research for trae stopem olketa sik . . .

Heart problem hem still main sik wea killim dae staka pipol.
Evri year staka pipol dae from cancer.
Lo buk Frontiers in Immunology, David Bloom sei: “Nomata olketa niu medicine stap distaem, sik no savve finis, and olketa difren kaen sik gohed for kamap.”

Nomata samfala pipol garem gudfala living . . .

Evri year staka million pikinini dae, especially lo ples wea pipol poor.
Staka billion pipol go toilet olobaot nomoa.
Staka handred million no garem klin wata.

Nomata pipol savve olketa shud treatim gud narawan . . .

Lo staka kantri samfala man salem pipol for kamap slave, bat no eniwan stopem olketa. Wanfala report from United Nations sei diswan maet bikos gavman no savve, or maet gavman no fit for duim eni samting abaotem datwan.

LANEM MOA SAMTING

Lukim video Wanem Nao Kingdom Bilong God? lo jw.org.

Ansa From Bible

God tingim iumi.

Hem no laekem iumi for kasem pain and sorre.

“[God] no save fogetem olketa pua pipol, an hemi no save letem olketa fo safa. Hemi no save fogetem olketa. Taem olketa krae long hem fo hemi helpem olketa, hemi gohed fo ansarem olketa.”—SAMS 22:24.

“Putim evri wari bilong iufala long hand bilong [God] bikos hem tingim iufala.”—1 PETER 5:7.

Pipol bae no gohed for safa.

Bible sei God bae duim samting.

“[God] bae draem evri tias long eye bilong olketa. No eniwan bae dae and no enitaem bae pipol sorre or krae or feelim pain tu.”—REVELATION 21:3, 4.

God bae stretem evri samting wea kosim pipol for safa.

Hem bae iusim Kingdom blo hem, wea Bible sei hem wanfala gavman, for duim datwan.

“God long heven bae hemi mekem wanfala kingdom fo kamap wea no eniwan save spoelem enitaem. An bae no eni narafala king moa save winim hem. . . . Rul blong hem bae hemi stap evritaem olowe.”—DANIEL 2:44.