WORLD FULAP LO TRABOL

1 | Protectim Health blo Iu

WHY HEM IMPORTANT

Wanfala disaster or nogud samting wea happen savve affectim health blo pipol lo staka difren wei.

Pipol savve stress taem olketa nogud samting happen, and taem man stress for longtaem hem isi for hem kasem sik.
Taem disaster happen, hem no isi for hospital lukaftarem gud evriwan and no inaf medical supply hem stap.
Olketa hard taem wea kamap mekem pipol short lo selen, and no fit for peim healthy kaikai or medicine.

Samting Iu Need for Savve

Olketa big sik and wei for stress savve affectim hao iu ting lo samting, datwan savve mekem iu for no lukaftarem gud health blo iu. From datwan, maet hem mekem iu for sik big moa.
If iu no lukaftarem gud health blo iu, maet hem kamap worse and laef blo iu stap lo danger.
Taem iu healthy, iu bae redi for mekem olketa gudfala disison lo taem blo trabol.
Nomata iu garem selen or nomoa, iu savve duim samting for protectim health blo iu.

Wanem Iu Savve Duim Distaem

Staka taem man wea wise hem luksavve lo danger and duim samting for no kasem datwan. Diswan fitim tu saed lo health. Wei for klin savve help for katem daonem sik and for preventim datwan. For preventim sik, hem gud winim for iumi sik and trae for kiurim.

“Taem iumi keepim haos and body blo iumi klin, iumi sevem selen wea iumi savve iusim for peim lo doctor and medicine.”—Andreas.a

a Olketa nem lo disfala magasin mifala changem.

HAO FOR DEAL WITIM—Samfala Idea

Lo taem blo trabol, followim olketa idea hia for protectim health blo iu

WEI FOR KLIN

Wei for klin

Bible sei: “Man garem save, hemi lukim trabol, hem go long sef ples.” (Provebs 22:3) Trae for luksavve and stap klia lo olketa samting wea savve mekem health blo iu stap lo danger.

Evritaem wasim hand witim soap and wata, especially bifor iu holem kaikai or bihaen iu iusim toilet.
Evritaem klinim and disinfectim olketa ples and samting lo haos wea iu savve tasim evritaem.
Sapos fitim, trae for no go klosap lo pipol wea garem sik wea isi for spred.

EVRITAEM KAIKAIM HEALTHY KAIKAI

Kaikaim healthy kaikai

Bible sei: “No eni man heitim body bilong hemseleva bat hem feedim and lovem body bilong hem.” (Ephesus 5:29) Iumi showimaot iumi lukaftarem body blo iumi taem iumi careful lo wat iumi kaikaim and drinkim.

Drinkim staka wata.
Kaikaim olketa difren kaen frut and vegetable.
No kaikaim tumas olketa kaikai wea garem gris, solt, and sugar.
No smokem tobacco, drinkim tumas alcohol, or iusim drug.

“For mekem mifala no kasem sik, mifala evritaem trae for kaikaim healthy kaikai; sapos nomoa, mifala bae spendem nao lalas selen blo mifala lo medical. So, mifala iusim selen blo mifala for peim healthy kaikai.”—Carlos.

EXERCISE AND MAS REST GUD

Exercise

Bible sei: “Hem gud for rest lelebet winim for barava waka hard and aftarem wind.” (Ecclesiastes 4:6, NWT) Hem gud for waka bat iumi mas rest tu.

Stap strong and healthy. Iu savve start duim datwan taem iu wakabaot for exercise. Wei for exercise savve helpem iu for garem gud health nomata iu sik, olo, or disable.
Mas rest gud

Mas rest gud. If iu no sleep gud, hem savve mekem iu for stress and no savve concentrate. Gogo, datwan savve mekem iu for kasem olketa serious health problem.
Markem taem for sleep and followim datwan. Trae for sleep lo taem wea iu markem and wekap lo semtaem wea iu markem evri morning.
Trae for no watchim TV or iusim electronic device taem iu redi for sleep.
Bifor iu sleep, trae for no kaikai big, no drinkim tumas coffee and alcohol.

“Mi faendem hao taem mi no sleep gud datwan affectim health blo mi. Hem mekem hed blo mi for soa and body hem pain. Bat taem mi sleep gud, mi feel gud and redi for duim eni samting! Mi strong and healthy and no savve sik olowe.”—Justin.