Followim Bible Saed Long Wei for Lukaftarem Health
‘Iu mas iusim full strong and evri savve bilong iu for lovem God bilong iu Jehovah.’—MARK 12:30.
1. Wanem nao plan bilong God for olketa man long firstaem?
HEM no plan bilong Jehovah God for olketa man sik and dae. Hem putim Adam and Eve long garden bilong Eden, wea datfala word hem minim “paradaes for man hapi.” Hem laekem tufala for mas “lukaftarem” datwan, no for 70 or 80 year nomoa, bat for olowe. (Gen. 2:8, 15; Ps. 90:10) Sapos tufala gohed faithful long Jehovah and tufala lovem hem and stap anda long rul bilong hem, bae tufala no dae. Olketa bae garem gudfala health and nating kasem olketa problem wea pipol kasem taem olketa olo.
2, 3. (a) Wanem nao Ecclesiastes hem sei abaotem wei for olo? (b) Hu nao kosim wei for dae wea iumi kasem from Adam? Hao nao Jehovah bae stretem diswan?
2 Long Ecclesiastes chapter 12, Bible iusim interesting toktok for storyim “olketa hardfala taem” wea olketa man kasem taem olketa olo. (Readim Ecclesiastes 12:1-7.) Hem markem white hair witim flaoa bilong “almond tree.” Hem sei olketa leg olsem “olketa strong man” wea distaem hem bend and no strong. Olketa woman wea go long window for lukaotem laet bat faendem hem dark nomoa hem piksarem eye wea nogud nao. From plande teeth bilong man wea olo hem aot finis, diswan hem olsem “olketa woman for smasem wheat olketa stop for waka nao bikos olketa no staka.”
3 Hem no plan bilong God long firstaem for leg bilong man hem seksek, eye nogud, and for hem no garem eni teeth. Nara samting tu, wei for dae wea iumi kasem from Adam hem wanfala long “olketa samting wea Devil duim,” wea Son bilong God bae iusim Messiah Kingdom for stretem datwan. Aposol John hem talem olsem: “Son bilong God hem kam for finisim olketa samting wea Devil duim.”—1 John 3:8.
Hem Stret Nomoa for Man Tingim Health Bilong Hem
4. Why nao olketa wea worshipim Jehovah tingim health bilong olketa? Bat wanem nao olketa luksavve long hem?
4 Go kasem taem wea Jesus stretem evri samting wea Devil duim, samfala wea worshipim Jehovah bae kasem olketa nogud samting wea kamaot from sik and wei for olo. Hem fitim for tingim health taem man kasem olketa samting olsem and for duim olsem savve helpem hem. Iumi no laekem eni sik for mekem hem hard for iumi worshipim Jehovah witim “full strong” bilong iumi. (Mark 12:30) Bat nomata iumi trae for healthy iumi mas luksavve hao gogo bae iumi olo nao, and hem hard for iumi missim evri sik wea savve kasem olketa man tu.
5. Wanem nao iumi savve lanem from olketa wea faithful for worshipim God bifor wea sik?
5 Health bilong plande wea faithful for worshipim Jehovah bifor hem nogud tu. Wanfala nao hem Epaphroditus. (Phil. 2:25-27) Narawan hem Timothy, wea hem gudfala fren bilong Paul. Staka taem hem savve garem sik long bele. Paul givim hem idea for “drinkim lelebet wine” for helpem bele bilong hem. (1 Tim. 5:23) Paul tu hem garem “wanfala nila long body” bilong hem. Maet diswan hem eye nogud or maet eni nara sik wea no eni medicine hem fitim nao. (2 Cor. 12:7; Gal. 4:15; 6:11) Disfala “nila long body” hem mekem Paul for prea staka taem long Jehovah. (Readim 2 Corinthians 12:8-10.) God no duim eni mirakol for finisim datfala “nila long body” bilong Paul. Bat hem strongim hem for gohed nomoa nomata datwan hem no isi. Samting wea mekem Paul hem wik hem showimaot paoa bilong Jehovah nao. Waswe, iumi savve lanem eni samting from diswan tu?
No Ova Tumas for Tingim Health
6, 7. Why nao iumi mas no ova tumas for tingim health bilong iumi?
6 Olketa Jehovah’s Witness acceptim plande difren kaen treatment. Plande taem disfala magasin bilong iumi Awake! hem savve storyim olketa samting abaotem health. Nomata olketa article hia no talem iumi wanem treatment nao for man acceptim, bat iumi tinghae long help wea olketa doctor savve givim long iumi. Iumi savve hem hard for eniwan garem perfect health distaem. So hem no wise for ova tumas for tingim olowe health bilong iumi. Pipol wea “no garem eni hope” wea tingse disfala laef nomoa iumi garem, olketa acceptim nomoa enikaen treatment for finisim sik bilong olketa, bat iumi mas no garem kaen tingting olsem. (Eph. 2:2, 12) Iumi barava no laek for duim eni samting nomoa for sevem laef bilong iumi wea bae mekem Jehovah no hapi. Iumi barava savve hao sapos iumi faithful long God, bae iumi “hol strong long datfala laef wea hem barava tru laef nao.” Iumi bae laef olowe long niu world wea hem promisim.—1 Tim. 6:12, 19; 2 Pet. 3:13.
7 Iumi no ova tumas for warim health bilong iumi bikos long nara samting tu. Wei for tingim olowe health bilong iumi savve mekem man tingim hemseleva nomoa. Paul hem talem warning abaotem diswan. Hem talem olketa long Philippi for “no tingim nomoa samting for [olketa] seleva, bat tingim tu samting for olketa narawan.” (Phil. 2:4) Hem stret for tingim health bilong iumi. Bat wei for barava tingim pipol wea iumi preachim “disfala gud nius abaotem kingdom” long olketa bae helpem iumi for no tingim olowe health bilong iumi.—Matt. 24:14.
8. Sapos iumi ova tumas for tingim health bilong iumi, datwan savve mekem iumi duim wanem?
8 Sapos wanfala Christian tingim olowe health bilong hem, datwan savve mekem hem for no tingim tumas worship wea hem givim long Jehovah. Datwan savve mekem iumi forcem nara man for followim tingting bilong iumi abaotem wanem kaen kaikai nao hem gud for body, wanem kaen treatment nao hem gud, and wanem kaen medicine nao savve helpem body. Hem gud for followim toktok bilong Paul long olketa samting hia. Hem sei olsem: “Duim olketa samting wea barava important, mekem no eniwan savve blamem iufala long eni samting and iufala no mekem nara pipol stambol go kasem day bilong Christ.”—Phil. 1:10.
Wanem Nao Barava Important?
9. Wanem nao wanfala barava important samting wea iumi mas duim? Why nao olsem?
9 Sapos iumi luksavve long olketa samting wea barava important, iumi bae busy for helpem nara pipol for fren witim God. Iumi duim datwan taem iumi go preaching and teachim pipol abaotem Bible. Disfala waka hem mekem iumi hapi, and no iumiseleva nomoa kasem gud samting bat pipol wea iumi teachim tu kasem gud samting. (Prov. 17:22; 1 Tim. 4:15, 16) Samfala taem olketa Wastaoa and Awake! magasin garem samfala article wea storyim olketa brata and sista wea sik tumas. Olketa storyim wanem nao helpem olketa for no wikdaon and hao wei for busy for helpem pipol savve long Jehovah and olketa nambawan promis bilong hem mekem olketa no tingim tumas sik bilong olketa.a
10. Why nao hem important for iumi tingting gud abaotem treatment wea iumi chusim?
10 Taem wanfala Christian hem sik, hem mas “karem lod bilong hemseleva” for chusim wanem treatment hem bae kasem. (Gal. 6:5) Jehovah laekem iumi for tingting gud abaotem treatment wea iumi chusim. Wei for tinghae long olketa Bible principle helpem iumi for ‘stap klia long blood.’ Wei for respectim Bible tu savve helpem iumi for stap klia long eni treatment wea savve againstim olketa Bible principle or spoelem wei wea iumi fren witim Jehovah. (Acts 15:20) Samfala treatment hem lelebet join witim kastom samting. Jehovah no laekem wei wea olketa bighed Israelite iusim olketa demon for helpem olketa. Hem sei olsem: “No tekem kam moa eni iusles grain sakrifaes. Mi barava les for smelem incense bilong iufala. Mi no laekem tu olketa niu moon, olketa sabbath, wei wea iufala iusim paoa bilong olketa spirit and olketa hipap bilong iufala for worship.” (Isa. 1:13) Taem iumi sik iumi no laek duim eni samting wea bae mekem God no laek herem prea bilong iumi and spoelem wei wea iumi fren witim Hem.—Lam. 3:44.
Important for Garem “Gudfala Tingting”
11, 12. Hao nao “gudfala tingting” savve helpem iumi taem iumi chusim wanfala treatment?
11 Taem iumi sik iumi savve Jehovah bae no duim eni mirakol for healim iumi, bat iumi savve askem Jehovah for helpem iumi garem gudfala tingting taem iumi chusim eni treatment. Iumi laek for followim olketa Bible principle. Sapos hem bigfala sik maet hem no wise for acceptim tingting bilong wanfala doctor nomoa bat for askem tingting bilong nara doctor. Diswan hem fitim wanem Proverbs 15:22 hem talem. Hem sei olsem: “Taem pipol no story gud tugeta hem hard for olketa mekem gudfala plan, bat taem plande pipol story tugeta olketa kasem gud samting.” Aposol Paul encouragem olketa Christian for “no followim disfala world bat for garem gudfala tingting, for raeteous, and for lovem God.”—Titus 2:12.
12 Problem wea kasem staka wea sik distaem hem kasem tu wanfala woman wea sik long taem bilong Jesus. Long Mark 5:25, 26, hem sei olsem: “Wanfala woman long there hem garem sik wea blood hem ran olowe for twelvfala year finis. Hem go lukim staka doctor and spendem evri selen bilong hem finis, bat treatment wea olketa givim hem no finisim sik bat just mekem hem worse go moa.” Jesus healim woman hia and barava kaen long hem. (Mark 5:27-34) From samfala Christian barava trae hard for faendem eni gud treatment, olketa chusim treatment wea againstim nao olketa Bible principle.
13, 14. (a) Long wanem wei nao Satan savve iusim treatment wea iumi chusim for mekem iumi no faithful long Jehovah? (b) Why nao iumi mas stap klia nomata long eni samting wea join lelebet witim devildevil tu?
13 Satan bae duim enikaen samting for stopem iumi for no worshipim Jehovah. Hem savve iusim wei for durong and aftarem material samting for spoelem wei wea samfala fren witim God. Bat long olketa narawan hem savve iusim olketa treatment wea join witim kastom samting for mekem olketa no faithful long Jehovah. Iumi prea long Jehovah for sevem iumi from “Satan” and for helpem iumi stap klia long “evrikaen wei for no obeyim law” bilong Jehovah. So iumi mas no letem Satan spoelem iumi from iumi duim eni samting wea join witim kastom samting and devildevil.—Matt. 6:13; Titus 2:14.
14 Jehovah hem talem olketa Israelite hem tambu for olketa duim magic and for iusim kastom samting for trae savve long wanem bae happen. (Deut. 18:10-12) Taem Paul storyim “olketa nogud samting wea man laek for duim” hem storyim tu “samting wea join witim devildevil.” (Gal. 5:19, 20) And nara samting tu, “pipol wea duim samting wea join witim devildevil” bae no stap insaed long niu world bilong Jehovah. (Rev. 21:8) So diswan hem showimaot klia hao Jehovah hem heitim tumas eni samting wea join witim devildevil.
“Evriwan Mas Luksavve Iu No Ova Tumas”
15, 16. Why nao iumi needim gudfala tingting taem iumi chusim wanfala treatment? Wanem wise kaonsel nao governing body talem long first century?
15 Taem iumi tingim evri samting wea iumi storyim hia, bae hem wise for no iusim eni treatment sapos iumi tingse datwan hem join witim kastom samting. Bat mas careful bikos maet iumi no minim gud wanfala treatment, and from datwan, maet iumi tingse hem join witim kastom samting. Iumi laek followim tingting bilong Jehovah long eni samting abaotem health. Samting wea helpem iumi for duim diswan nao hem for garem wei for luksavve long samting and savve long olketa Bible principle. Long Proverbs chapter 3 hem sei olsem: ‘Barava trustim Jehovah and no depend long savve bilong iuseleva. Tingim hem long evri samting wea iu duim, and hem nao bae showim iu stretfala wei for iu followim. Barava tinghae long wisdom and wei for tingting gud bikos diswan bae mekem iu laef.’—Prov. 3:5, 6, 21, 22.
16 Iumi laek for kasem gudfala treatment for sik bilong iumi and for healthy nomata iumi olo. Bat iumi mas careful nogud wei wea iumi trae hard for duim diswan hem spoelem wei wea iumi fren witim God. Wei for iumi followim olketa Bible principle taem iumi lukaotem treatment and olketa nara samting long health bae mekem pipol lukim ‘iumi no ova tumas’ long wanem iumi duim. (Phil. 4:5) Long wanfala barava important leta, governing body long first century talem for olketa Christian mas stap klia from wei for worshipim idol, from blood, and wei for durong. Datfala leta hem sei: “Sapos iufala gohed for stap klia from olketa samting hia, iufala bae stap gud.” (Acts 15:28, 29) Hao nao olsem?
For Tingim Perfect Health Long Future Helpem Iumi Balance Distaem
17. Hao nao wei for followim olketa Bible principle hem helpem iumi for healthy?
17 Hem gud for iumi wanwan tingim kwestin hia, ‘Waswe, mi luksavve long olketa gud samting wea mi kasem from mi barava followim olketa Bible principle abaotem blood and samting Bible talem abaotem wei for no durong?’ Tingim gud samting wea iumi kasem tu taem iumi traem best for “stap klia long evri samting wea savve mekem body and tingting bilong iumi for no klin.” (2 Cor. 7:1) Taem iumi followim wanem Bible talem abaotem wei for klin long body, bae iumi no kasem staka sik. Wei for no iusim tobacco and nogud drug mekem iumi no spoelem body bilong iumi and wei wea iumi fren witim God. Tingim tu hao iumi helpem body bilong iumi taem iumi no ova tumas long kaikai and drink. (Readim Proverbs 23:20; Titus 2:2, 3.) Hem tru, for rest gud and duim exercise hem savve helpem body bilong iumi, bat main samting wea helpem body bilong iumi and wei wea iumi fren witim God nao hem taem iumi followim samting wea Bible talem.
18. Wanem nao main samting iumi shud tingim? Wanem profesi nao iumi barava laekem tumas for kamap tru?
18 Main samting nao, iumi shud evritaem duim samting wea helpem iumi for fren gud witim Dadi bilong iumi long heven. Hem nao givim iumi ‘laef distaem and bae mekem iumi laef long future’ long niu world wea hem promisim. (1 Tim. 4:8; Ps. 36:9) From ransom sakrifaes bilong Jesus, God bae forgivim olketa sin bilong iumi, wea datwan nao bae mekem iumi garem perfect health and barava fren gud witim Jehovah insaed niu world bilong hem. Disfala Pikinini Sheepsheep bilong God, wea hem nao Jesus Christ, bae leadim iumi go long “staka springwata wea givim laef,” and God bae aotem evri tias from eye bilong iumi. (Rev. 7:14-17; 22:1, 2) Long datfala taem tu, disfala profesi bae kamap tru: “No eniwan bae sei: ‘Ei, mi sik ia.’ ”—Isa. 33:24.
19. Long distaem and long future, hao nao bae Jehovah helpem iumi?
19 Iumi barava trustim hao taem for Jehovah sevem iumi hem klosap nao and iumi barava tingim day wea Jehovah bae finisim wei wea iumi sik and dae. Go kasem datfala taem, iumi savve trustim Dadi long heven wea lovem iumi bae helpem iumi for gohed and no givap taem sik hem spoelem iumi bikos ‘hem tingim iumi tumas.’ (1 Pet. 5:7) So iumi mas lukaftarem gud health bilong iumi bat duim long wei wea followim samting wea Bible hem talem!
[Footnote]
a Wastaoa bilong September 1, 2003 long page 17 hem showim title bilong samfala article olsem.
Review
• Hu nao kosim wei for sik, and hu nao bae finisim evri samting wea kamaot from sin?
• Nomata hem stret for iumi tingim health bilong iumi, iumi mas stap klia long wanem?
• Why nao Jehovah laekem iumi for tingting gud abaotem treatment wea iumi chusim?
• Hao nao wei for followim olketa Bible principle savve helpem iumi for lukaftarem health bilong iumi?
[Piksa long page 23]
Taem God wakem olketa man hem no plan bilong hem for olketa sik and olo
[Piksa long page 25]
Nomata pipol bilong Jehovah savve sik, preaching waka savve mekem olketa hapi