Abraham—Fren Bilong God

WANFALA ples wea pipol go for stap bihaen long Flood hem Ur. Hem kamap wanfala important taon wea garem plande naesfala haos. Bat pipol long there worshipim olketa giaman god. Hem tu samting wea olketa duim long Baʹbel. Pipol long Ur and Baʹbel no olsem Noah and son bilong hem Shem, wea gohed for servem Jehovah.

Gogo, 350 year bihaen long flood, Noah hem dae. Then tufala year bihaen, disfala man wea iu lukim long piksa hem born. Hem wanfala spesol man long God. Nem bilong hem Abraham. Hem stap witim famili bilong hem long taon bilong Ur.

Wanday Jehovah talem Abraham: ‘Lusim Ur and olketa wantok bilong iu, and go long wanfala kantri wea mi bae showim long iu.’ Waswe, Abraham obeyim God and lusim gudfala living long Ur? Ia, hem duim olsem. And from Abraham hem obeyim God evritaem, hem kamap fren bilong God.

Samfala long famili bilong Abraham go witim hem tu taem hem lusim Ur. Wanfala nao dadi bilong hem Teʹrah. Narawan hem Lot, son bilong brata bilong hem. And waef bilong Abraham, Sarah go tu. Gogo olketa kasem wanfala ples wea garem nem Haʹran, and Teʹrah hem dae long there. Olketa stap farawe tumas from Ur.

Then lelebet taem bihaen, Abraham and famili bilong hem lusim Haʹran and kam long land bilong Caʹnaan. Long there Jehovah hem sei: ‘Diswan nao land wea mi bae givim long olketa pikinini bilong iu.’ So Abraham stap long Caʹnaan insaed long olketa tent.

God start for helpem Abraham and hem start for garem staka sheep and narafala animal and plande handred servant. Bat hem and Sarah no garem eni pikinini.

Taem Abraham hem 99 year, Jehovah hem sei: ‘Mi promisim iu bae kamap dadi bilong plande nation bilong olketa pipol.’ Bat hao nao diswan savve happen, from Abraham and Sarah olo tumas nao for garem eni pikinini?